– اۋىرعان جانعا العاشقى بولىپ جەتەتىن جەدەل جاردەم قىزمەتىندە ەڭبەك ەتەتىن مامانداردىڭ ەڭبەگى ەرەكشە قۇرمەتكە يە. دەگەنمەن سوڭعى جىلدارى ارنايى اۆتوكولىكتەردىڭ دەنى ەسكىرىپ, تالاپ ۇدەسىنە ساي كەلمەي جاتقانى بايقالادى. اۋىلداردى ارالاپ, حالىقپەن كەزدەسۋلەردە وسى ماسەلە ءجيى كوتەرىلىپ وتىرادى. وسىعان بايلانىستى تۇرعىنداردىڭ تالاپ-تىلەگىن ەسكەرە وتىرىپ, زاماناۋي ۇلگىدەگى 20 جەدەل جاردەم رەانيموبيلى بەرىلدى. جەرگىلىكتى بيۋدجەتتەن 1 قىزمەتتىك اۆتوبۋس پەن ارنايى تەحنيكا دا ءبولىنىپ وتىر, – دەدى ن.نالىباەۆ.
سالتاناتتى ءىس-شارادا قوعام قايراتكەرى تۇرعانباي ماحانوۆ ارىپتەستەرىن قۇتتىقتاپ, كورسەتىلىپ جاتقان قولداۋعا ريزاشىلىق تانىتتى. جاڭا كولىكتى بولعان دارىگەرلەر دە العىسىن جەتكىزدى.
بيىل سالادا جۇرت قۋانتار جاڭالىق كوپ. قازالى اۋدانىنىڭ ورتالىعى ايتەكە بي كەنتىندە حالىققا باستاپقى مەديتسينالىق-سانيتارلىق كومەك كورسەتەتىن اۋداندىق ەمحانا عيماراتى, وسى اۋدانداعى جۇبان جانە ارال اۋدانىنداعى تاستۇبەك ەلدى مەكەندەرىندە مەديتسينالىق بەكەتتەر پايدالانۋعا بەرىلدى. جاز سوڭىندا وبلىس ورتالىعىنداعى سول جاعالاۋدان قۇنى 2,7 ملرد تەڭگە بولاتىن قان ورتالىعىنىڭ ىرگەتاسى قالاندى. كەلەر جىلى رەسپۋبليكالىق بيۋدجەتتەن 750 ملن تەڭگە ءبولىنىپ, قىزىلوردا قالاسىندا كوپسالالى اۋرۋحانا مەن ەمحانا قۇرىلىسى باستالادى.
الداعى 2 جىلدا «اۋىلدىق دەنساۋلىق ساقتاۋدى جاڭعىرتۋ» قاناتقاقتى جوباسى اياسىندا قۇنى 9,7 ملرد تەڭگەگە 27 جاڭا نىسان سالىنادى. ونىڭ باسىم بولىگى دارىگەرلىك امبۋلاتوريا بولماق.
قىزىلوردا وبلىسى
