ەۋرازيالىق ەكونوميكالىق وداق تۋرالى شارتقا قول قويىلۋىنا بايلانىستى
قازاقستان حالقى اسسامبلەياسىنىڭ ەل ازاماتتارىنا
ۇندەۋى
قۇرمەتتى وتانداستار! ازاماتتار! بۇگىن ءبىز الەمدىك دەڭگەيدەگى وقيعاعا – ەۋرازيالىق ەكونوميكالىق وداقتى قۇرۋ تۋرالى شارتقا بەلارۋس, قازاقستان, رەسەي مەملەكەتتەرى باسشىلارىنىڭ قول قويۋ راسىمىنە كۋا بولىپ وتىرمىز. ەۋرازيالىق كەڭىستىكتە تەڭ قۇقىقتى, كوپعاسىرلىق دوستىق, اشىقتىق جانە ءوزارا سەنىمدىلىك قاعيداتتارىنا نەگىزدەلگەن XXI عاسىردىڭ جاڭا ينتەگراتسيالىق بىرلەستىگى قۇرىلىپ وتىر. ءۇش باۋىرلاس مەملەكەت ۇدەمەلى مودەرنيزاتسيالاۋ, تۇراقتىلىق پەن ۇلتتىق ەكونوميكالاردىڭ باسەكەگە قابىلەتتىلىگىن نىعايتۋ, ادامداردىڭ ءال-اۋقاتىن ارتتىرۋ ءۇشىن وزدەرىنىڭ الەۋەتتەرىن بىرىكتىرۋدە. بولاشاقتاعى ەكونوميكالىق قاۋىپسىزدىكتىڭ سەنىمدى نەگىزى قالانۋدا. ەلباسى 20 جىل بۇرىن باستاماشى بولعان ەۋرازيالىق ينتەگراتسيانىڭ عالامدىق يدەياسى ءوزىنىڭ ەلەۋلى ءپىشىنى مەن ناقتى بەينەسىن تاپتى. بۇل قازاقستان رەسپۋبليكاسىنىڭ پرەزيدەنتى نۇرسۇلتان ءابىش ۇلى نازارباەۆتىڭ ەڭبەگى, ىنتاسى جانە ساياسي جىگەرىنىڭ ناتيجەسى, حالىقارالىق بەدەلىنىڭ مۇلتىكسىز مويىندالۋىنىڭ دالەلى. شارتقا وتانىمىزدىڭ ەلورداسى – استانادا قول قويىلۋىنىڭ دا وزىندىك ءمانى بار. قازاقستان تاۋەلسىزدىك جىلدارى ەلباسىنىڭ جەتەكشىلىگىمەن مىقتى مەملەكەتكە اينالدى. ءبىزدىڭ ىشكى جالپى ءونىمىمىز جان باسىنا شاققاندا 14 مىڭ اقش دوللارىنا جەتتى, ال التىن-ۆاليۋتالىق رەزەرۆتەر 100 ملرد. اقش دوللارى مەجەسىنە كوتەرىلدى. ەلىمىز اسا ءىرى ادامي جانە ونەركاسىپتىك الەۋەتى بار, 170 ملن. تۇرعىنى بار نارىقتى بىرىكتىرەتىن, 20 ملن. شارشى كيلومەتردەن استام تەرريتورياسى نەمەسە جەر شارىنىڭ 15% قۇرلىعىن قۇرايتىن وراسان زور تابيعي رەسۋرستارى بار قۋاتتى ۇيىمنىڭ مۇشەسى بولدى. ەۋرازيالىق ەكونوميكالىق وداقتى قۇرۋ ەكسپورتتىق ءوندىرىستى, كولىكتىك ينفراقۇرىلىمدى ودان ءارى قارقىندى دامىتۋ بويىنشا جاڭا مۇمكىندىكتەردى اشادى, الەم مۇحيتىنا شىعۋ جولدارى اشىلادى. ينتەگراتسيادان بولاتىن ماكروەكونوميكالىق اسەر ەلىمىزدىڭ دامۋىندا قارقىندى قادام جاساۋعا, جاڭا مۇمكىندىكتەردى اشۋعا جانە يننوۆاتسيالىق ەكونوميكانىڭ وسۋىنە مۇمكىندىك بەرەدى. بىراق, ەڭ باستىسى, حالىقتىڭ ءال-اۋقاتىنىڭ ءوسۋى ءۇشىن وراسان زور مۇمكىندىكتەر اشىلادى. قازاقستان حالقى اسسامبلەياسى ەۋرازيالىق ەكونوميكالىق وداقتى قۇرۋدى تولىعىمەن قولدايدى. ەۋرازيالىق ەكونوميكالىق وداق الەمدىك ينتەگراتسيالار ورتالىقتارىنىڭ بىرىنە اينالاتىنىنا جانە جەتەكشى ينتەگراتسيالىق وداقتاردىڭ ۇشتىگىنە كىرەتىنىنە سەنىمدىمىز. قازىردىڭ وزىندە بىرلەستىكتىڭ قىزمەتىنە الەمنىڭ كوپتەگەن مەملەكەتتەرى جوعارى قىزىعۋشىلىق تانىتۋدا. ەلباسى «قازاقستان جولى – 2050: ءبىر ماقسات, ءبىر مۇددە, ءبىر بولاشاق» اتتى جولداۋىندا قازاقستاننىڭ ەڭ دامىعان 30 مەملەكەتتىڭ قاتارىنا قوسىلۋى بويىنشا قويعان مىندەتتەردى ورىنداۋ ءۇشىن ەۋرازيالىق ەكونوميكالىق وداق جۇمىلدىرۋشى باستاما بولاتىنىنا سەنىمدىمىز. ەۋرازيالىق ەكونوميكالىق وداق بولاشاق ۇرپاعىمىزدىڭ يگىلىگى ءۇشىن جاسالاتىن, ەلىمىزدىڭ ۇدەمەلى دامۋىنىڭ كەپىلى بولىپ تابىلاتىن قوعامدىق كەلىسىمدى, ەل بىرلىگىن جانە قازاقستاننىڭ تاۋەلسىزدىگىن نىعايتۋعا جاڭا سەرپىلىس بەرەتىنىن اتاپ وتەمىز! ءبىز وسى بولجامداردىڭ ىسكە اساتىنىن تاباندى تۇردە اتاپ ءوتىپ, قازاقستان حالقىن العا جەتەلەيتىن جاڭا مىندەتتەردى ورىنداۋ ءۇشىن ەلباسى, ەلىمىزدىڭ پرەزيدەنتى ن.ءا.نازارباەۆتىڭ جانىنا توپتاسۋعا شاقىرامىز. بىرگە جانە تەك العا! قازاقستان حالقى اسسامبلەياسى استانا قالاسى, 2014 جىلعى 29 مامىر
