قوناەۆ قالالىق اۋرۋحاناسىنىڭ اۋماعىندا مەديتسينا قىزمەتكەرلەرىنە 35 جاڭا اۆتوكولىكتىڭ كىلتىن تاپسىرۋ ءراسىمى ءوتتى. ءىس-شاراعا الماتى وبلىسىنىڭ اكىمى مارات سۇلتانعازيەۆ قاتىستى. قۇتتىقتاۋ سوزىندە ول وڭىردە مەديتسينا سالاسىنا كوپ كوڭىل بولىنەتىنىن اتاپ ءوتتى.
– ۋاقتىلى شۇعىل كومەك كورسەتۋ ءۇشىن بريگادالاردى كوبەيتىپ, سانيتارلىق كولىكتى جاڭارتىپ جاتىرمىز. وبلىسقا ليزينگ بويىنشا 35 ماشينا ءبولىندى, ونىڭ جەتەۋى قوناەۆ قالاسىنا تيەسىلى. بۇل دارىگەرلەردىڭ جۇمىس ىستەۋىن ءبىرشاما جەڭىلدەتەدى. ويتكەنى جاڭا «جەدەل جاردەم» كولىگى زاماناۋي تەحنيكامەن جابدىقتالعان, – دەدى م.سۇلتانعازيەۆ.
جالپى, جەرگىلىكتى بيۋدجەت ەسەبىنەن Hyundai H-350 جانە JAC Sunray ماركالى سانيتارلىق كولىكتىڭ 35 بىرلىگى ساتىپ الىنعان ەكەن. الماتى وبلىسى دەنساۋلىق ساقتاۋ باسقارماسىنىڭ باسشىسى ومىرزاق نيازبەكوۆتىڭ ايتۋىنشا, بارلىق اۆتوكولىك قاجەتتى جابدىقتارمەن جابدىقتالعان. بۇل ساپالى جانە شۇعىل كومەك كورسەتۋگە مۇمكىندىك بەرەدى.
– جەدەل جانە شۇعىل مەديتسينالىق كومەكتى 142 بريگادا كورسەتەدى. سانيتارلىق اۆتوكولىك پاركىن تولىقتىرۋ ەسەبىنەن جەدەل جانە شۇعىل مەديتسينالىق كومەك بريگادالارىنىڭ سانىن 8-گە ۇلعايتۋ جانە اۋىلدىق ەلدى مەكەندەردىڭ مەديتسينالىق ۇيىمدارىنىڭ الىستىعىن ەسكەرە وتىرىپ, ولاردىڭ سانىن 150-گە دەيىن جەتكىزۋ جوسپارلاندى. بۇل اۆتوپاركتى جاڭارتۋعا جانە تولىقتىرۋعا مۇمكىندىك بەرەدى. مۇنىڭ ءبارى وبلىس حالقى ءۇشىن جەدەل جانە شۇعىل مەديتسينالىق كومەكتى ۋاقتىلى كورسەتۋگە مۇمكىندىك بەرەدى, – دەدى ءو.نيازبەكوۆ.
ال جاڭادان بەرىلگەن «جەدەل جاردەم» كولىكتەرى جامبىل, بالقاش, كەگەن, رايىمبەك, ۇيعىر, تالعار, قاراساي اۋداندارىنىڭ, سونداي-اق بورالداي مەن قوناەۆ قالالارىنان تۇسەتىن شاقىرتۋلارعا قىزمەت كورسەتۋگە ءبولىندى.
الماتى وبلىسى
