ازيا دوداسى: ازىرشە ءۇش التىن جۇلدە

ۆەلوسپورتتان قاراعاندىنىڭ تاس جولىندا باستالعان ازيا چەمپيوناتىنىڭ العاشقى كۇندەرى  قازاقستاندىق سپورتشىلار ءۇش التىن جۇلدەنى جەڭىپ الدى. ءبىرىنشى بولىپ التىن مەدالعا ەكا­تەرينا يۋرايتيس 15 كم قاشىقتىقتا جەكەلەگەن جارىستا يە بولدى. ول جاپون  يۋمي كايحارانى  ءبىر مينۋتتان اسا قاشىقتىققا قالدىرىپ, مارەگە ءبىرىنشى جەتتى. ءسويتىپ, ەكاتەرينا استانادا ترەكتە وتكەن جارىستى قوسقاندا ءۇشىنشى رەت ازيا چەمپيونى اتاعىن جەڭىپ الدى. استاناداعى سىندا ول  ەكى التىن مەدالعا يە بولعان ەدى. ال چەمپيون قىزىمىزدىڭ ءوزى جارىس­تان سوڭ جانكۇيەرلەردىڭ قولداۋىنا ريزا بولعانىن ايتىپ, ەندى كەلەسى بايگەگە دە جاقسى دايىندالۋعا تىرىساتىندارىن اتاپ ءوتتى. – قاراعاندىنىڭ سالقىن اۋا رايىنا قاراماستان تاس جولدا ىستىق بولدى. جانكۇيەرلەر وتە جاقسى قولداۋ كورسەتتى.  كوپ راحمەت, وسىنداي ىستىق ىقىلاس ۇنەمى كوپ كومەك كورسەتەدى.  ەندى, قىزدارمەن توپتىق جارىسقا دايىندالامىز. جەڭىسكە جەتۋگە بار كۇشىمىزدى سالىپ, جۇلدەلى ورىنعا تىرىسامىز, – دەدى ول. كەشە ءبىزدىڭ تاعى ءبىر سپورتشىمىز دميتري گرۋزدەۆ اۋا رايىنىڭ قولايسىزدىعىنا قاراماستان 45 كم شاقىرىمعا ارنالعان سىندا مارە سىزىعىن ءبىرىنشى كەسىپ, ەلىمىز قۇراماسىنا ەكىنشى التىن جۇلدەنى سىيعا تارتتى. ول جەكەلەگەن جارىستا قارسىلاستارىنىڭ ءبارىن شاڭ قاپتىرىپ, ەشكىمگە مارەگە ءبىرىنشى جەتۋگە ەشقانداي مۇمكىندىك بەرمەدى. ول قىرعىزستاندىق سپورتشى ۆاكەر يۋگەندى  1.19.20 سەكۋندتقا وزىپ شىقتى. بۇل ازيا چەمپيوناتىندا ءدميتريدىڭ العاشقى التىن مەدالى. 2011-2012 جىلدارى ول كۇمىس جۇلدەگەر بولعان. وسى كۇنى 30 كم قاشىقتىقتا جەكەلەگەن جارىستا  التىن مەدالدى ۆيكتور وكيشەۆ الدى. قازىر قازاقستان قۇراماسى استانادا وتكەن جارىستى ساناعاندا ازيا دوداسىندا بارلىعى 12 مەدالعا يە بولىپ وتىر. سونىڭ ىشىندە وتانداستارىمىز 7 التىن, 4 كۇمىس جانە 1 قولا جۇلدەنى يەلەنۋدە.  ءبىزدىڭ ەلدەن باسقا وڭتۇستىك كورەيا, جاپونيا جانە موڭعوليا قۇرامالارى دا جاقسى ونەر كورسەتۋدە. ماسەلەن, سەيسەنبى كۇنى الىشەر جۇماقان كۇمىس جۇلدە العان جاسوسپىرىمدەر اراسىندا 30 كم-گە ارنالعان جارىستا كورەيلىك كيم دجيحۋن التىن مەدالدى, جاپون كۋسابا كەيگو قولا جۇلدەنى يەلەندى. ايەلدەر اراسىندا 30 كم قاشىقتىققا ارنالعان سىندا تاعى ءبىر كورەي سپورتشىسى نا اەۋم چەمپيون اتانسا, جاپون قىزى يونامينە ەري كۇمىس جۇلدەنى, موڭعول تۋۆشينجارگال ەنگجارگال قولا مەدالدى ەنشىلەدى. ال ەكاتەرينا يۋرايتيس جەڭىپ العان 15 كم قاشىقتىقتا تاعى ءبىر جاپونيالىق كايحارا يۋمي مارەگە ەكىنشى بولىپ كەلسە, وزبەكستاندىق ەكاتەرينا كنەبەلەۆا ءۇشىنشى ورىندى قاناعات تۇتتى. قاراعاندى تاس جولىنداعى جارىستار ءارى قاراي جالعاسۋدا. داستان كەنجالين, «ەگەمەن قازاقستان».