كورەرمەن سپەكتاكلدەن جاس ماعجاننىڭ, ومىرگە عاشىق ماعجاننىڭ, ەلىنىڭ اۋىر ءحالى ءۇشىن شەكسىز ازاپ شەككەن, باسىن قاتەرگە تىككەن ماعجاننىڭ جانە بىرنەشە مارتە گەنوتسيدكە ۇشىراعان قازاق حالقىنىڭ اۋىر تاعدىرىن كوردى. ەكى كۇن قاتارىنان قويىلعان سپەكتاكل تالعامى بيىك كورەرمەن كوڭىلىنەن شىقتى. ەلىمىزگە تانىمال ەركەبۇلان دايىروۆ, زارينا كارمەن, الي مارات سىندى تەاتر ارتىستەرى ۇلى اقىن, عالىم, اۋدارماشى, الاش قوزعالىسىنىڭ قايراتكەرى ماعجان جۇماباەۆتىڭ تاعدىرىن, سول كەزدەگى قازاق حالقىنىڭ تىرشىلىگىن كورەرمەنگە جەتكىزە ءبىلدى. تۋىندىنىڭ قويۋشى رەجيسسەرى – داۆيدە ليۆەرمور, رەجيسسەرى – Chiara Ocella. ال ماعجان بەينەسىن بەلگىلى, تالانتتى ءارتىس ەركەبۇلان دايىروۆ سومدادى. رولدەردە ويناعان اكتەرلەردىڭ دەنى جاستار. ماعجان اقىن ءوزى جىرلاپ وتكەندەي «مەن جاستارعا سەنەمىن» يدەياسى تەاتر ساحناسىندا جالعاسىن تاپتى.
ايتا كەتەلىك, تۇركىستاندا مادەنيەت پەن ونەرگە قۇمار قاۋىم ەسەلەپ كوبەيۋدە. سونىڭ ءبىر دالەلى – «ماعجان» سپەكتاكلىنە بيلەت تولىق ساتىلىپ كەتكەن. باسقا قالالاردان دا كەلگەن كورەرمەن كوپ. ونەرسۇيەر قاۋىم تار زامانعا ساياحاتتادى, كۇيزەلدى, الاش ارداقتىلارىنىڭ ۇلتتى ساقتاپ قالۋ جولىنداعى ارپالىسىن كوردى, وي ءتۇيدى, ۇلتقا قىزمەت قانداي بولاتىنىن اڭعاردى. ياعني تۇركىستان مۋزىكالىق دراما تەاترى ۇلى اقىن, قايراتكەر ماعجان جۇماباەۆتىڭ بولمىسىن اشا ءبىلدى.
تۇركىستان
