مەملەكەت باسشىسى قاسىم-جومارت توقاەۆ وڭىرگە جۇمىس ساپارىندا قوناەۆ قالاسىن دامىتۋدىڭ جوسپارىنا ءجىتى كوڭىل ءبولىپ, وبلىس ورتالىعى مەن الماتى قالاسىنىڭ سەرىكتەستىگىنە سەرپىن بەرۋدى تاپسىرعان بولاتىن. سول مىندەتتىڭ ىشىندە ەكى قالانىڭ اراسىن جالعايتىن جەدەل پويىز جەلىسىن ىسكە قوسۋدى تاپسىرعان-دى. جاقىندا پرەزيدەنت تاپسىرماسى ورىندالىپ, قوناەۆ قالاسىنان شىعىپ, الماتى قالاسىنا توقتايتىن ەلەكتر پويىزى ىسكە قوسىلدى.
العاشقى رەيس جونەلتىلەر الدىندا ارنايى سالتاناتتى ءىس-شارا ءوتتى. وعان وبلىس اكىمىنىڭ ورىنباسارى, باسقارما باسشىلارى, قالا اكىمى, مەملەكەتتىك قىزمەتكەرلەر, اقساقالدار, «جولاۋشىلار تاسىمالى» اكتسيونەرلىك قوعامىنىڭ باس ديرەكتورى جانە تۇرعىندار قاتىستى. قوس شاھار اراسىن جالعايتىن پويىز ءۇشىن ەكى بەكەت ىسكە قوسىلعان. ونىڭ ءبىرى «قاپشاعاي» ستانساسى بولسا, ەكىنشىسى – اۆتوۆوكزال ماڭىنداعى ستانسا. وسى ۋاقىتقا دەيىن جولاۋشىلار الماتىعا كولىك ارقىلى جولعا شىقسا, ەندىگى كەزەكتە پويىزبەن دە دىتتەگەن جەرلەرىنە جەتەتىن بولادى. بيلەت قۇنى 400-450 تەڭگە شاماسىندا.
– اۋەلگى ءبىر اي كولەمىندە پويىز الماتى-1 ستانساسىنا قاتىناسا, جەلتوقسان ايىنان باستاپ الماتى-2 بەكەتىنە جۇرەتىن بولادى. ال بيلەت قۇنىنىڭ قولجەتىمدى بولىپ قالۋى ءۇشىن مەملەكەتتەن سۋبسيديا قاراستىرىلىپ جاتىر. بۇل ءۇشىن 2023 جىلى مەملەكەتتىك ساتىپ الۋ بويىنشا ارنايى كونكۋرس ويناتىلادى. ناتيجەسىندە جولاۋشىلاردى تاسىمالدايتىن كومپانيا بەكىتىلىپ, پويىزدىڭ قاتىناۋ ۋاقىتى مەن باعىتى قايتا قاراستىرىلادى جانە قاجەتتى قارجى بولىنەدى. جالپى, پويىز قوناەۆتان تاڭعى ساعات 6:00-دە شىقسا, الماتى قالاسىنان كەشكى 19:00-دە كەرى قايتادى. الداعى ۋاقىتتا قوسىمشا باعىت اشىلىپ, پويىز تاڭعى 6:00-دا الماتىدان قوناەۆ قالاسىنا اتتاناتىن بولادى. قوس قالانىڭ قوناقتارى مەن تۇرعىندارىنا جايلىلىق سىيلاۋ ءۇشىن, ەكى اراعا بارىپ كەلۋ ۋاقىتىن جيىلەتۋ ماقساتىندا «قازاقستان تەمىرجولى» كومپانياسىمەن الماتىدان بەرى قاراي باعىت اشۋ بويىنشا كەلىسسوزدەر جۇرگىزىپ جاتىرمىز, – دەيدى الماتى وبلىسى جولاۋشىلار كولىگى جانە اۆتوكولىك جولدارى باسقارماسىنىڭ باسشىسى الماس باتانوۆ.
الماتى وبلىسى
