استانا. 29 مامىر . ەۋرازيالىق ەكونوميكالىق وداقتىڭ قۇرىلعانىن وتاندىق تاۋار وندىرۋشىلەر تەك قانا قولداۋى كەرەك. بۇل تۋرالى وڭتۇستىك قازاقستان وبلىسىندا ءوز كاسىبىن دوڭگەلەتىپ وتىرعان «بارىس 2007» جشس ديرەكتورى ازات قاراجانوۆ BNews.kz تىلشىسىنە بەرگەن سۇحباتىندا ايتتى.
كاسىپكەردىڭ ويىنشا, ەلىمىز وداققا مۇشە بولسا, قازاقستاندىق كاسىپكەرلەرگە رەسەي, بەلارۋستەگى كاسىپكەرلەرمەن تەڭەسۋىنە, باسەكەگە تۇسۋىنە مۇمكىندىك تۋادى.
«بۇل قۇجاتقا تەك قانا ەكونوميكالىق تۇرعىدان قاراعان دۇرىس. كىم قانداي تاۋار وندىرەدى, سول كاسىپكەردىڭ باعى شابادى. مەنىڭشە, قازاقستاندىق كاسىپكەرلەر باسەكەگە تۇسۋگە دايىن», − دەدى ازات قاراجانوۆ.
كاسىپكەر بۇعان قوسا وداققا مۇشە ەلدەر ءبىر ەرەجەگە باعىناتىنىن, بۇل دا كاسىپكەرلەردىڭ جۇمىسىن جەڭىلدەتەتىنىن اتاپ ءوتتى.
«ماسەلەن, ءبىزدىڭ كاسىپورىن شەتەلدىكتەرمەن باسەكەگە تۇسۋگە دايىن. باتىس ەۋروپادان جەتكىزىلگەن جابدىقتاردى ورناتتىق. جۇمىسشىلارىمىزدىڭ قارىم-قابىلەتى جوعارى. تاجىريبەسى مول. ونىمدەرىمىزدىڭ ساپاسى جوعارى, باعاسى ءتيىمدى. سوندىقتان دا باسەكەدەن قورىقپايمىز. نەگىزى, باسەكە كاسىپكەرلەردىڭ وسۋىنە, ورلەۋىنە الىپ بارادى», − دەدى ول.
ەستەرىڭىزگە سالا كەتەيىك, سايرام اۋدانىنىڭ تاسساي اۋىلىندا ورنالاسقان «بارىس 2007» جشس «ءمادينا» ساۋدا بەلگىسىمەن ماكارون ءوندىرىپ, ەلىمىزدىڭ بارلىق وڭىرلەرىنە, سونداي-اق تۇركىمەنستان, تاجىكستان, گرۋزيا, اۋعانستان سەكىلدى كوپتەگەن ەلدەرگە ەكسپورتقا جونەلتەدى.
ونىڭ كاسىپورنىندا قازاقستان مەن ورتا ازيا اۋماعىندا بۇرىن-سوڭدى بولماعان زاماناۋي يتاليان جابدىقتارى ورناتىلعان. اۆتوماتتاندىرىلعان جەلى ۇزدىكسىز رەجىمدە جۇمىس جاساپ, ساعاتىنا 3 500 كەلى ماكارون ونىمدەرىن نەمەسە جىلىنا 25 مىڭ توننا ءونىم شىعارۋعا مۇمكىندىك بەرەدى. فابريكا جەكە ينۆەستيتسيالار قاراجاتى ەسەبىنەن سالىندى, جوبانىڭ قۇنى - 10 ميلليون دوللار. كاسىپورىندا 120 ادام جۇمىس ىستەيدى.
مۇرات ايتقوجا.
دەرەككوز: BNews.kz.
فوتو: agencyrating.kz.
