7 قىركۇيەكتە جارما اۋدانىنداعى دالا ءورتىن ءسوندىرۋ كەزىندە ءورت ءسوندىرۋشى ايدوس توعىزباەۆ قاتتى كۇيىك الىپ, قىزمەتتىك بورىشىن وتەۋ كەزىندە قازا تاپقان ەدى. مارقۇمنىڭ ارتىندا بەس بالاسى قالدى.
ەسكە سالا كەتسەك, مەملەكەت باسشىسى قاسىم-جومارت توقاەۆ اباي وبلىسىنىڭ ءورت سوندىرۋشىلەرىن قازاقستان رەسپۋبليكاسىنىڭ مەملەكەتتىك ناگرادالارىمەن ماراپاتتاۋ تۋرالى جارلىققا قول قويعان بولاتىن.
اباي وبلىسىنىڭ اكىمى نۇرلان ۋرانحاەۆ پەن توتەنشە جاعدايلار ۆيتسە-ءمينيسترى مارات كۇلدىكوۆ ايدوس توعىزباەۆتىڭ وتباسىنا قر پرەزيدەنتىنىڭ اتىنان III دارەجەلى «ايبىن» وردەنىن تابىس ەتتى.
وبلىس اكىمدىگىنىڭ ءباسپاسوز قىزمەتى حابارلاعانداي, قايتىس بولعان ءورت ءسوندىرۋشىنىڭ وتباسىنا سەمەي قالاسىنان ءۇش بولمەلى پاتەر بەرىلدى.
«فيرما ازيا» جشس وكىلدەرى مەن وبلىستىق ءماسليحات دەپۋتاتى اسەمحان دوسقوجانوۆ «قاراعايلى» شاعىن اۋدانىنداعى تۇرعىن ۇيلەردىڭ بىرىندەگى پاتەردىڭ كىلتتەرىن مارقۇم ايدوس توعىزباەۆتىڭ جۇبايى مەن بالالارىنا تابىستاپ, قونىس تويىمەن قۇتتىقتادى», دەلىنگەن حابارلامادا.
