بورلى كەن ورنى اقتوعاي اۋدانىنىڭ اۋماعىندا ورنالاسقان. بالقاش قالاسىنان سولتۇستىككە قاراي 60 شاقىرىم, قوڭىرات كەنىشىنەن 45 شاقىرىم, شىعىس قوڭىراتتان 38 شاقىرىم قاشىقتىقتا جاتىر. بۇعان دەيىن جاسالعان بارلاۋ جۇمىستارى كەن ورنىنىڭ مينەرالدىق قورىن 115 ملن توننا شاماسىندا باعالاعان دەگەن دەرەك بار. ونداعى مىستىڭ ۇلەسى 0,35 پايىز كولەمىندە. يراندىق «Irkaz Metal Corporation» جشس-نىڭ بىرنەشە كۇن بۇرىن عانا تۇساۋى كەسىلگەن كاتودتى مىس گيدرومەتاللۋرگيا زاۋىتى ءدال وسى بورلىنىڭ قويناۋىندا.
زاۋىتتىڭ جوبالىق قۋاتى جىلىنا 5 مىڭ توننا كاتودتى مىستى قۇرايدى. بولاشاقتا 140 ادام وسى زاۋىتتان ناپاقاسىن ايىرماق. قازىردىڭ وزىندە اقتوعاي اۋدانىنىڭ ونداعان تۇرعىنى جاڭا زاۋىتقا جۇمىسقا ورنالاسىپ ۇلگەرگەن. الداعى ۋاقىتتا ولاردىڭ قاتارى ءالى تولىعا تۇسەرى انىق. اقتوعاي اۋداندىق كاسىپكەرلىك جانە ونەركاسىپ ءبولىمىنىڭ باسشىسى سايلاۋكەن اۋباكىروۆ تە زاۋىتتىڭ جەرگىلىكتى تۇرعىنداردى جۇمىسقا الاتىنىن العا تارتتى.
– زاۋىتقا ينۆەستيتسيا قۇيعان يران كومپانياسى. جوبانىڭ قۇنى 9,1 ملرد تەڭگە. جالپى, زاۋىتقا ءوندىرىس ورىندارىن سالۋ ءۇشىن 1 748, 8 گەكتار جەر تەلىمى بەرىلدى. ءونىم ەكسپورتقا شىعارىلادى. قىتاي جانە ەۋروپا ەلدەرىنە جونەلتۋ كوزدەلىپ وتىر, – دەيدى س.اۋباكىروۆ.
بورلىنىڭ كاتودتى مىسى SX-EW تەحنولوگياسىمەن وندىرىلەدى. بۇل دەگەنىمىز – مىستى مەتالل تاباقشاعا تۇندىرۋ ارقىلى الۋ. مۇنداي كاتودتى مىستاردىڭ ساپاسى جوعارى ءارى تازا بولماق. م00k ماركاسىنا سايكەس كەلەدى. بۇل ماركا مىستىڭ ۇلەسى 99,9 پايىز دەگەندى بىلدىرەدى.
SX-EW كاتودتى مىس ءوندىرۋ تەحنولوگياسى – گيدرومەتاللۋرگيالىق پروتسەسكە نەگىزدەلگەن يننوۆاتسيالىق ءادىس. اتالعان زاماناۋي تەحنولوگيا ەلىمىزدە كەيىنگى ون جىلدا قولدانىلا باستاعان. مۇنداي وزىق تەحنولوگيا زاۋىت قۇرىلىسىندا اسا قوماقتى شىعىندى قاجەت ەتپەيدى. تاعى ءبىر ەرەكشەلىگى – ونىمدىلىگى از كەندەردىڭ قورىن پايدالانۋعا مۇمكىندىك بەرەتىندىگى. سونداي-اق قورشاعان ورتاعا تيگىزەر زالالى جوق.
«جىل سايىن وندىرىستىك قۋاتتىلىقتاردىڭ جەتكىلىكسىز كولەمىنە بايلانىستى قازاقستان مىس كونتسەنتراتىنىڭ شامامەن 30 پايىزىن (966 مىڭ توننا) شەتەلگە ەكسپورتتايدى. ال جاڭا كاسىپورىنداردىڭ اشىلۋى مىس كونتسەنتراتىن ەل ىشىندە بارىنشا قايتا وڭدەۋگە مۇمكىندىك بەرىپ, قوسىلعان قۇنى جوعارى ءونىم شىعارۋعا ىقپال ەتەدى», دەپ حابارلادى يندۋستريا جانە ينفراقۇرىلىمدىق دامۋ مينيسترلىگى.
ماشيناجاساۋ مەن اقپاراتتىق تەحنولوگيالاردىڭ دامۋىندا مىس ءوندىرىسىنىڭ ماڭىزى وراسان. ستاتيستيكاعا سۇيەنسەك, دايىن ءونىم تۇرىندەگى الەمدىك مىستىڭ 65 پايىزى پيرومەتاللۋرگيادان, 18 پايىزى سۇيىق ەكستراكتسيا مەن ەلەكتروليزدەن, ال 17 پايىزى مىس ونىمدەرىن قايتالاپ وڭدەۋدەن الىنادى.
قاراعاندى وبلىسى,
اقتوعاي اۋدانى
