«الداعى ۋاقىتتا ميكروقارجى ۇيىمدارى جىلدىق ءتيىمدى سىياقى مولشەرلەمەسى 56 پايىزبەن ستاندارتتى ميكرونەسيە ۇسىنا بەرەدى. سونىمەن بىرگە, كەپىلسىز تۇتىنۋشىلىق نەسيەلەر بويىنشا ازاماتتاردىڭ قارىزدارىن كوللەكتورلارعا ساتۋعا زاڭنامالىق تىيىم سالۋدى ەنگىزۋ پىسىقتالىپ جاتىر. 2022 جىلدىڭ سوڭىنا دەيىن ميكروقارجى ۇيىمدارى 432 مىڭ قارىز الۋشىنىڭ 33,1 ملرد تەڭگە سوما كولەمىندەگى پروبلەمالىق بەرەشەگىن قايتا قۇرىلىمداۋدى جوسپارلاپ وتىر. سونىڭ ىشىندە 107 مىڭ قارىز الۋشىنىڭ 0,8 ملرد تەڭگەسى ءىشىنارا كەشىرىلسە, 28 مىڭ قارىز الۋشىنىڭ 0,6 ملرد تەڭگەسى تولىقتاي كەشىرىلمەك», دەدى ن.ءابدىراحمانوۆ.
وسى كۇنگە دەيىن ميكروقارجى ۇيىمدارى بەرگەن كەپىلسىز تۇتىنۋشىلىق نەسيە كولەمى – 416 ملرد تەڭگە. قارىز الۋشىلار سانى 1,3 ملن ادامنان اسقان. بيىل قاڭتار-تامىز ايلارى ارالىعىندا تولەنبەگەنىنە 90 كۇننەن اسىپ كەتكەن كەپىلسىز تۇتىنۋشىلىق نەسيە 18,8 پايىزعا, 71,3 ملرد تەڭگەگە ءوسىپتى. ەل بويىنشا 434,2 مىڭ ادام ميكرونەسيەسىن تولەي الماي ءجۇر. ال كولەمى 50 اەك-كە دەيىنگى ونلاين ميكرونەسيەسىن قايتارا الماي جۇرگەن قارىز الۋشى سانى 15,8 پايىزعا, 380 مىڭ ادامعا وسكەن.
قازىرگى ۋاقىتتا پروبلەمالىق بەرەشەكتى قايتا قۇرىلىمداۋ ءتارتىبى زاڭمەن بەكىتىلگەن. قارىز الۋشى ءوتىنىش بەرگەن سوڭ ونىڭ قارىزدىق جۇكتەمەسىن تومەندەتۋ ماسەلەسى قارالادى. بۇل رەتتە ميكروقارجى ۇيىمىنىڭ قايتا قۇرىلىمداۋ شارتى قارىز الۋشىنىڭ قارجىلىق جاعدايىنا (تابىس دەڭگەيى, الەۋمەتتىك مارتەبەسى) بايلانىستى دا انىقتالاتىنىن ايتا كەتەيىك. سونداي-اق ميكروقارجى ۇيىمدارى بىرجاقتى تارتىپپەن قارىز الۋشىنىڭ قارىزىن ءىشىنارا نەمەسە تولىقتاي كەشىرۋ تۋرالى شەشىم قابىلداي الادى.
پروبلەمالىق بەرەشەك تولىق نەمەسە ءىشىنارا كەشىرىلگەن جاعدايدا پروۆيزيا جۇرگىزىلىپ, سونىڭ ەسەبىنەن قارىزدى جابۋدان پايدا بولعان شىعىن جابىلادى. قايتا قۇرىلىمداۋدى جۇرگىزۋ تۋرالى اقپارات قارىز الۋشىنىڭ نەسيە تاريحىندا كورىنىپ تۇراتىن بولادى.
«28 مىڭ قارىز الۋشىنىڭ 600 ملن تەڭگەسى تولىقتاي, 107 قارىز الۋشىنىڭ 800 ملن تەڭگەسى ءىشىنارا كەشىرىلەتىنى جايلى اقپارات شىقتى. اتالعان باستاما مقۇ-لارداعى پروبلەمالىق بەرەشەك دەڭگەيىن تومەندەتۋ اياسىندا جۇزەگە اسىرىلماق. ونلاين نەسيە بەرۋ جانە جالاقىعا دەيىن زايم بەرۋ قارقىنى وتە جوعارى. زايمدى 5 مينۋت ىشىندە بەرەتىن ۇسىنىستار كەز كەلگەن جەردەن ۇشىراسادى. بۇل قارىز الاتىن ادام سانىن كوبەيتەدى. قازىر اگەنتتىك 45 كۇنگە دەيىن بەرىلەتىن 50 اەك نەمەسە 153 150 تەڭگەگە دەيىنگى ميكروزايمدارعا تىيىم سالۋدى قاراستىرىپ جاتىر. قازىر بانك كوپ ادامعا كرەديت بەرمەيدى. ويتكەنى ولار بانكتەردىڭ سكورينگىنەن وتە المايدى. ولار ءۇشىن تىعىرىقتان شىعار جول – مقۇ-دان قارىز راسىمدەۋ. بىراق مقۇ-لاردىڭ پايىزدىق ستاۆكاسى, بەرەشەكتىڭ ءوسۋ كولەمىنەن حابارلارى از. نەسيە قىزمەتىن رەتتەۋدى جەتىلدىرۋ وڭ ىقپال ەتە الادى. بىراق ول ساياسي قۇرالعا اينالماۋى كەرەك», دەيدى تەلەگرامداعى RiskTakersKZ كانالى.
ميكروقارجى نارىعى تۇراقتى وسىمگە يە. 243 ميكروقارجى ۇيىمىنىڭ جيىنتىق قارىز پورتفەلى 2022 جىلدىڭ ەكىنشى توقسانىنىڭ سوڭىندا 838,3 ملرد تەڭگەگە جەتكەن. 2021 جىلدىڭ ۇقساس كەزەڭىمەن سالىستىرعاندا 58 پايىزعا ءوسىم بار. ال سوڭعى بەس جىلدا ميكرونەسيە كولەمى 6,4 ەسە ارتقان.
