كەزدەسۋدى وسى مەكتەپتىڭ العاشقى اسكەري دايىندىق ءپانىنىڭ مۇعالىمى جانبول ومىرزاقوۆ ۇيىمداستاردى. ال ءوزىنىڭ ەڭبەك جولىن اۋىل مەكتەبىندە پەداگوگ-ۇيىمداستىرۋشى بولىپ باستاعان, قازىر الماتى قالاسى مەدەۋ اۋدانى ج.جاباەۆ اتىنداعى №161 ليتسەي ديرەكتورى, ى.التىنسارين توسبەلگىسىنىڭ يەگەرى, حالىقارالىق جامبىل سىيلىعىنىڭ لاۋرەاتى روزا سۇرانشيەۆا ارداقتى ۇستاز اياگۇل ميرازوۆاعا جول باستاپ كەلدى. اۋىل مەكتەبىنە العاش اياق باسقان قۇرمەتتى قوناقتاردى ۇستازدار مەن وقۋشىلار شولپان قيسىمبەتوۆانىڭ «اياگ ۇلىم» انىمەن قوشەمەتتەپ قارسى الدى. وقۋشىلار مەكتەپ, ۇستاز تۋرالى جىر-شۋماقتارىن ارناسا, دومبىرا وركەسترى نۇرعيسا تىلەنديەۆتىڭ «القيسسا» كۇيىن تامىلجىتا ورىنداپ, مىڭ بۇرالعان ءبيشى قىزدار «قازاق ءبيىن» ۇلتتىق تانىم-تالعامعا ساي كوركەمدەدى.
مەكتەپ ءىشىن ارالاعان قادىرلى ۇستازدارعا 10-سىنىپ وقۋشىسى سابىرجان الىبەك «STEM» كابينەتى تۋرالى اعىلشىن تىلىندە اڭگىمەلەپ بەرىپ, بالالاردىڭ قولىنان شىققان ءتۇرلى روبوتتاردى تانىستىردى. كابينەتتىڭ جاساقتالۋى مەن وقۋشىلاردىڭ جۇمىسىنا ريزا بولعان ۇلاعاتتى ۇستاز روبوت تەحنيكاسى ساباعى وقۋشىنىڭ وي-ءورىسىن دامىتىپ, وقىپ, ۇيرەنىپ, زەرتتەۋلەر جۇرگىزىپ, ءوز جوبالارىن جۇزەگە اسىرۋعا مۇمكىندىك بەرەتىنىن ايتتى. مۇنان كەيىن مەكتەپتىڭ 1980 جىلعى تۇلەگى, ينتەرناتسيوناليست-جاۋىنگەر, «قىزىل جۇلدىز» وردەنىنىڭ يەگەرى, اۋعان سوعىسىندا ەرلىكپەن قازا تاپقان سەرىك ءاشىموۆتىڭ مۇراجايىمەن وقۋشىلار تانىستىرىپ, ەرلىك جايىندا ماعلۇمات بەردى. ال اياگۇل تورەقىزى مۇراجايدىڭ «تىلەك بۇرىشىنا» ءوز قولتاڭباسىن قالدىردى.
جالپى, اۋىل مەكتەبىندەگى اسكەري-پاتريوتتىق تاربيەنىڭ جاقسى جولعا قويىلعانىن اياگۇل تورەقىزى اسكەري جەتەكشى جانبول توقتاسىن ۇلىنىڭ العاشقى اسكەري دايىندىق كابينەتىن ارالاپ كورگەندەگى العان اسەرىنەن اڭعارۋعا بولادى. ۇلتتىق قۇندىلىقتار نەگىزىندە وتانشىلدىققا, جەكە تۇلعانى جان-جاقتى, ۇلتجاندى, قاھارماندىق رۋحتا, ادامگەرشىلىك قاسيەتتەرگە باۋلۋ ءدال وسى بولمەدەن باستاۋ الىپ تۇرعانداي كورىنەدى. اسكەري كابينەتتى ارالاپ كورگەندە ادامدار وزدەرىن مۇراجايدا جۇرگەندەي سەزىنەدى. ءبىر ايتا كەتەتىن جايت, ينتەرناتسيوناليست-جاۋىنگەر سەرىك اشىموۆكە ارنالعان مۇراجاي مەن وقۋشىلار ءبىلىم الاتىن العاشقى اسكەري دايىندىق كابينەتىندەگى تۋلار, ۆىمپەلدار, سۋرەتتەر, كورنەكىلىكتەردى جانبول توقتاسىن ۇلى ءوزىنىڭ جەكە قاراجاتىنا جاساعان. مەكتەپپەن تانىسقان اياگۇل تورەقىزى ءوزى باسقارعان كەزدەگى ءبىلىم ورداسىنىڭ جەتىستىكتەرىن, ۇلتتىق مەكتەپ تۋرالى, ۇستاز باقىتى توڭىرەگىندە سىر-سۇحبات كەزىندە سۇراقتارعا جاۋاپ بەردى.
ءوز كەزەگىندە بەرىكتاس اۋىلىنداعى ورتا مەكتەپ ديرەكتورى رايگۇل امانقۇلوۆا بۇل كەزدەسۋدىڭ ۇستازدار مەن وقۋشىلار ءۇشىن وتە اسەرلى بولعانىن, تاربيەلىك ءمانىنىڭ زور ەكەنىن تىلگە تيەك ەتىپ اياگۇل تورەقىزىنا العىسىن ءبىلدىردى. ال اۋىل اكىمى ساندۋعاش مولداعالىقوۆا قۇرمەتتى قوناقتارعا دەگەن ىستىق ءىلتيپاتىن ايتىپ, ءىس-شارانى تۇيىندەدى.
الماتى وبلىسى
