«براكونەر» رەسپۋبليكالىق جەدەل الدىن الۋ ءىس-شاراسى بارىسىندا كۇرشىم اۋدانىنىڭ قۇيعان اۋىلدىق وكرۋگىنە قاراستى «قىزىل تۋ» وتكەلىندە جۇرگىزىلگەن تەكسەرۋ كەزىندە كۇرشىم اۋدانىنىڭ جەرگىلىكتى پوليتسيا قىزمەتى باسقارماسىنىڭ قىزمەتكەرلەرى 34 جاستاعى جەرگىلىكتى تۇرعىننىڭ باسقارۋىنداعى اۆتوكولىكتى توقتاتقان. تەكسەرە كەلە, ونىڭ رۇقسات قۇجاتتارىنسىز شايان اكەتىپ بارا جاتقاندىعى انىقتالعان. قۇقىق قورعاۋ ورگاندارى ۇسىنعان دەرەكتەرگە سۇيەنسەك, كولىكتە 364 كيلوگرامنان اساتىن 6320-عا جۋىق ءتىرى شايان بولعان. كۇرشىم اۋدانىنىڭ ينسپەكتسياسى زالال سوماسىن شامامەن 2 014 000 تەڭگەنى قۇرايدى دەپ ەسەپتەپ وتىر
– سوتقا دەيىنگى تەرگەۋ بارىسىندا كولىك جۇرگىزۋشىسى شايانداردى كەلىسىم جاسالعان كەزدە بەتپەردە كيگەن, بۇرىن تانىمايتىن بەس ەر ادامنان ساتىپ العانىن ايتقان. كەيىن تاۋاردى كۇيەۋ بالاسىنىڭ جۇك كولىگىنە تيەپ, وسكەمەنگە بەت العان. جولدا ونى ءتارتىپ ساقشىلارى ۇستاعان. قازىرگى تاڭدا كۇدىكتىگە قاتىستى قىلمىستىق كودەكستىڭ 335-بابى 1-بولىگىمەن سوتقا دەيىنگى تەرگەۋ باستالدى, – دەدى شىعىس قازاقستان وبلىسى پد باستىعىنىڭ ءبىرىنشى ورىنباسارى دۋمان قوجاحمەتوۆ.
ەستەرىڭىزگە سالساق, براكونەرلىكتى, بيولوگيالىق رەسۋرستار وبەكتىلەرىنىڭ زاڭسىز اينالىمىن انىقتاۋ جانە جولىن كەسۋ ماقساتىندا 20 قازاننان باستاپ شىعىس قازاقستان وبلىسىنىڭ اۋماعىندا «براكونەر» جالپى رەسپۋبليكالىق جەدەل-پروفيلاكتيكالىق ءىس-شاراسى ءوتىپ جاتىر. الدىن الۋ وپەراتسياسىنىڭ جۇمىسىنا جەرگىلىكتى پوليتسيا قىزمەتى, كوشى-قون جانە كريمينالدىق پوليتسيانىڭ كۇشتەرى, سونداي-اق, شقو تابيعي رەسۋرستار جانە تابيعاتتى پايدالانۋدى رەتتەۋ باسقارماسىنىڭ «ورمان جانە اڭشىلىق شارۋاشىلىعىنا جەدەل دەن قويۋ جاساعى» ينسپەكتورلارى جۇمىلدىرىلعان.
25 قازاندا شىعىس قازاقستان وبلىسىنىڭ تارباعاتاي اۋدانىنىڭ اۋماعىندا ومبى-مايقاپشاعاي تاسجولىنىڭ 29-شاقىرىمىندا اۋداندىق پوليتسيا ءبولىمىنىڭ قىزمەتكەرلەرى وسكەمەن قالاسىنىڭ 58 جاستاعى تۇرعىنىنىڭ باسقارۋىنداعى جۇك كولىگىن توقتاتقان. بەلگىلى بولعانى, ول رۇقسات قۇجاتتارىنسىز 20 تونناعا جۋىق كوكسەركە مەن تابان بالىعىن الىپ بارا جاتقان. كەلتىرىلگەن جالپى شىعىن 116 ميلليون تەڭگەدەن اسادى.
– وسكەمەندىككە قاتىستى قىلمىستىق كودەكستىڭ 335-بابى 1-بولىگىمەن سوتقا دەيىنگى تەرگەۋ باستالدى. بۇل باپ بويىنشا 3 جىلعا دەيىنگى مەرزىمگە باس بوستاندىعىنان ايىرۋ تۇرىندەگى جازا كوزدەلگەن, – دەپ اتاپ ءوتتى دۋمان قوجاحمەتوۆ.
«براكونەر» جەدەل الدىن الۋ ءىس-شارالارى 19 قاراشاعا دەيىن جالعاسادى.
شىعىس قازاقستان وبلىسى
