«ITeachMe» قورى قۇزىرەتتىلىكتى دامىتۋ ورتالىعىنىڭ ديرەكتورى زاحيرا بەگاليەۆانىڭ ايتۋىنشا, جوبانىڭ ىرىكتەۋ كەزەڭى بيىل مامىردا قايتا باستالىپ, ەل بويىنشا 300-دەن اسا تالاپكەر ءوتىنىم قالدىرعان. بۇدان ءارى ىرىكتەۋدەن وتكەن جاستار ءبىلىم الىپ, مامانداردىڭ كومەگىمەن قولعا الاتىن ءىستىڭ جوبا-جوسپارىن دا تۇزەدى. وسىدان سوڭ دايىن بيزنەستى نارىققا شىعارىپ, گرانت الۋىنا دا بولادى.
سونىمەن بيىل بارلىق وڭىردەن 40 ستۋدەنت ىرىكتەلىپ, ولار بىرنەشە اي كاسىپكەرلىكتى دامىتۋ كۋرسىنان وتكەن. وسى ارالىقتا كاسىپكەرلىك, ەكولوگيا, امبەباپ ديزاين بويىنشا سەسسيالارعا قاتىسىپ, تالىمگەرلەرمەن جۇمىستى پىسىقتاپ, ەڭبەكتەنگەن. بۇدان سوڭ قۇرامىندا «شەۆرون» كومپانياسىنىڭ قوعاممەن بايلانىس جونىندەگى ۇيلەستىرۋشىسى جانار قوشپانوۆا, ەكولوگيا, گەولوگيا جانە تابيعي رەسۋرستار مينيسترلىگى ەكولوگيالىق ساياسات جانە ورنىقتى دامۋ دەپارتامەنتى ديرەكتورىنىڭ ورىنباسارى جازيرا جانكينا باستاعان قازىلار القاسى 32 پرەزەنتاتسيانى مۇقيات تىڭداعان. ولار ەكولوگيالىق ماسەلەلەردى قاپەرگە الىپ, ۇلتتىق كاسىپكەرلىكتى دامىتۋعا ۇلەس قوسادى دەپ ساناعان جوبالاردى ىرىكتەگەن. داۋىس بەرۋ ناتيجەسىندە قازىلار شەۆرون كومپانياسىنان 500 مىڭنان باستاپ, 1 ملن تەڭگەگە دەيىنگى بيزنەس يدەيالاردى دامىتۋعا ارنالعان جانە «شينحان بانك قازاقستان» اق-دان 150 مىڭنان 500 مىڭ تەڭگەگە دەيىنگى گرانت جەڭىپ العان 9 جوبانىڭ اۆتورى انىقتالدى. ناقتىراق ايتساق, «شەۆرون» كومپانياسى 6 تۇلەككە 1 ملن تەڭگەگە دەيىن گرانت بەرسە, «شينحان بانك قازاقستان» اكتسيونەرلىك قوعامىنان 3 گرانت العان ۇمىتكەر بار.
– پاندەميا سالدارى, قاڭتار قاسىرەتى حالىقتىڭ ومىرىنە ۇلكەن وزگەرىستەر اكەلدى. پاندەميادان كەيىنگى داعدارىس جاستارعا دا اسەر ەتتى. شاعىن جانە ورتا بيزنەستىڭ تۇرالاۋىنان جۇمىسسىز جاستار كوبەيدى. بۇگىندە توتەنشە جاعدايلاردان كەيىنگى احۋال وڭالىپ كەلەدى. كاسىپكەرلىكتىڭ كوكجيەگى كەڭەيۋدە. بىراق وسى جاعدايلاردىڭ بارلىعى جاستاردىڭ قىسقا مەرزىمدە دامۋدىڭ جاڭا باعىتىنا كوشۋگە دايىن ەمەستىگىن اڭعارتتى. دامۋدىڭ جاڭا باعىتىن ىزدەگەن كاسىپكەرلەر نارىقتىڭ وركەندەۋىنە ۇلەس قوسا وتىرىپ, «ITeachMe» باستاماسىن قۇرۋعا نەگىز بولدى. جوبا ەرەكشە قابىلەتتىلىگى بار توپتاردىڭ ەڭبەككە قابىلەتىن ارتتىرۋعا مۇمكىندىك بەرەدى. ولاردىڭ ەڭبەك نارىعىندا باسەكەگە قابىلەتتى بولۋىنا جاردەمدەسەدى. ءبىزدىڭ ماقساتىمىز – بيزنەس تەك پايدا اكەلىپ قويماي, تۇتىنۋشىلار ءۇشىن ەكولوگيالىق جاعىنان تازا بولۋى دەگەن ۇستانىمنىڭ شەڭبەرىندە قالىپتاستى, – دەيدى ز.بەگاليەۆا.
«EcoBusinessLab» جوباسى 20 مەن 40 جاس ارالىعىنداعى ازاماتتارعا ارنالعان. مۇندا ستۋدەنتتەر كاسىپكەرلىكتىڭ نەگىزدەرىن مەڭگەرۋمەن شەكتەلمەي, كەز كەلگەن ءىستى باستاردا ەكولوگيالىق ماسەلەلەردى ەسكەرۋدى ۇيرەنەدى. قوردىڭ باسشىلىعى كاسىپكەرلىكتىڭ بارلىق باعىتىندا ەكولوگيالىق ماسەلەلەردى ەسكەرە وتىرىپ, جوسپار تۇزۋگە بولاتىنىن ايتادى. سونداي-اق جوبادا قوعامنىڭ بارلىق توبىنداعى سۇرانىس ەسكەرىلگەن. بيزنەس يدەيا ازىرلەۋدە جاستار قالدىقتاردى ازايتۋ, وڭدەۋ, ەكولوگيالىق قۇرال-جابدىقتاردى پايدالانۋ سىندى ماسەلەنى ەسكەرگەن. ۇيلەسىمدى ىسكە اسقان ەرەكشە يدەيالاردىڭ ىشىندە قوستانايلىق اناستاسيا كراۆچەنكونىڭ قولعا العان «لاداگا» جوباسى مەن بەكجان قايىرعاليەۆ جەتەكشىلىك ەتەتىن تاماق قالدىقتارىن بيو تىڭايتقىشقا قايتا وڭدەۋ جوباسى دا بار. سونداي-اق جوبا تۇلەگى وفتالمولوگ روزا ادىقوۆا قايتا وڭدەلگەن پلاستيك قالدىعىنان كوزىلدىرىك جاساۋ ءىسىن قولعا العان. ساپالى, تابيعي ءارى قولجەتىمدى تاۋارعا سۇرانىستىڭ جوعارى بولاتىنى ايتپاساق تا بەلگىلى. ەندەشە, جوبا اياسىندا بيىل گرانت العان تۇلەكتەردىڭ ىسىنە ءبىز دە تابىس تىلەيمىز.
ساندىبەك ءاسانالى,
«Egemen Qazaqstan»
