بيداي دەمەكشى, جۋىردا Qazaqstan تەلەارناسىنان قىرباق قاردىڭ استىندا بيىلعى جىلدىڭ جال-جال بولىپ ءۇيىلىپ جاتقان التىن ءدانىن كورسەتتى. ساپ سارى, شاشقان مونشاقتاي ءمولدىر. تاباناقى, ماڭداي تەردىڭ بۇلاي قالۋى قابىرعاڭدى قايىستىرادى, ءىشىڭ اشيدى, ءجۇزىڭ جاسيدى.
بۇل قالايعا بەرىلگەن جاۋاپ, استىق تاسيتىن ۆاگون جەتپەيدى ەكەن. سامارقاۋلىق, نەمكەتتىلىك جۇرتتىڭ ەڭبەگىن ەش كەتىرۋ دەگەن وسى.
ءيا, اينالىسىپ جاتىرمىز دەيدى.
ديقاننىڭ بوزتورعايداي شىرىلداعان ءۇنى قۇلاق تۇندىرادى. ويتكەنى قار مەن جاڭبىر سولتۇستىك ازاماتتارىنىڭ اپشىلارىن قۋىرىپ بارادى. كورەتىن كوز, ەستيتىن قۇلاق تابىلسا, قانە. ول ۋاقىتشا قيىندىق قوي, دەپ مۇرىن شۇيىرەتىندەر تابىلار. كوكتەمنىڭ ءبىر كۇنى جىلعا ازىق دەپ جانتالاسقان ەڭبەكشىنىڭ جانىن ۇقپاۋ, ءاتۇستى قاراۋ ايىپ. ايىپتى ساعىزداي سوزباي جۋ – ادامدىق.
ەگەر استىقتى وندىرە الماسا, ديقان كىنالى دەرىمىز حاق. ال باردى ۇيلەستىرە الماسا, كىمدى جازعىرامىز؟ بۇلاي دەۋىمىزگە ءبىر سەبەپ, سول كۇنگى اقپارات بارىسىندا, ءبىر شەنەۋنىك, قاراعاندىداعى كومىر كەزەگى تۋرالى قويىلعان سۇراققا بايلانىستى حالىقتى جازعىردى. «جازداي ايتتىق كومىر ءتۇسىرىپ الىڭدار دەپ, تىڭدامادى, كەزەك سودان ءورشىپ تۇر» دەدى.
دۇرىس, بۇعان حالىق ايىپتى دەيىك, جاز بويى استىق تاسيتىن ۆاگون سايلاماعانعا كىم كىنالى؟ ءىشتىڭ اشىپ, ءجۇزدىڭ جاسۋى وسىندايدان بولسا كەرەك.
سۇلەيمەن مامەت
