وبلىستىق پەريناتالدىق ورتالىقتا 6 قىركۇيەكتە ايانگۇل ءسابيتوۆا ءۇش ۇلدى ومىرگە اكەلدى. سابيلەردىڭ ەكەۋىنىڭ سالماعى 1800, ال ءۇشىنشىسىنىڭ سالماعى 2200 گر بولعان. اكەسى مەن شەشەسى جاڭا تۋعان سابيلەرگە احماد, باتىرحان, يسمايل ەسىمىن بەرگەن.
– بۇرىن مەنىڭ دە, ايەلىم ايانگۇلدىڭ دە وتباسىندا ۇشەم ومىرگە كەلمەگەن. ءبىز ۇشەم دۇنيەگە كەلەتىنىن العاش ەستىگەندە, ارينە, قۋانىشىمىزدا شەك بولمادى. بۇل – قۇدىرەتى كۇشتى اللانىڭ بىزگە بەرگەن ۇلكەن سىيى, – دەيدى ءۇش ۇلدىڭ اكەسى ەسەت قۇمار.
ەندى مىنە, 8 قاراشادا اتىراۋ قالالىق پەرزەنتحاناسىندا تاعى ءبىر ۇشەم ومىرگە كەلدى. ەندى مۇرات سۇلتانوۆتىڭ وتباسى ەكى قىز, ءبىر ۇلمەن تولىعىپ وتىر. ەكى قىزدىڭ سالماعى – 1750, 1630, ۇلدىڭ سالماعى – 1960 گر.
– ءبىزدىڭ اۋلەتتە ۇشەم دە, ەگىز دە بولعان. مەنىڭ اتام بەرىشقالي جۇرگىزۋشى, اجەم نۇرسۇلۋ زاۋىتتا اسپاز بولىپ جۇمىس ىستەگەن. اكەم – وتباسىنداعى ۇلكەن بالا. اجەم نۇرسۇلۋ ءتورت بالادان سوڭ 54 جىل بۇرىن ۇشەمدى – ەكى ۇل, ءبىر قىزدى بوسانعان ەكەن. ۇشەمنىڭ سىڭارى بولعان اعايىمنىڭ ءبىرىنىڭ قىزىندا ەگىز بار. ەندى مىنە, ءدال سونداي قۋانىشقا ءبىز دە كەنەلىپ وتىرمىز. ايەلىم البينا ەكەۋمىز 2020 جىلى وتباسىن قۇرعان ەدىك, – دەيدى ۇشەمنىڭ اكەسى مۇرات سۇلتانوۆ.
ونىڭ دا, ايەلىنىڭ دە ماماندىعى – پەداگوگ. ءوزى 2020 جىلى ح.دوسمۇحامەدوۆ اتىنداعى اتىراۋ ۋنيۆەرسيتەتىن العاشقى اسكەري دايىندىق ءپانىنىڭ مۇعالىمى ماماندىعىمەن بىتىرگەن. الماتى قالاسىنداعى جوعارى وقۋ ورنىن بىتىرگەن ايەلى – دەنەشىنىقتىرۋ ءپانىنىڭ مۇعالىمى. قازىر مۇرات سۇلتانوۆ اتىراۋ قالاسىنداعى №38 مەكتەپ-ليتسەيدە, ايەلى البينا №33 ورتا مەكتەپتە تاڭداعان ماماندىعىمەن جۇمىس ىستەيدى.
اتىراۋ وبلىسى
