ماسكەۋدەگى دوڭگەلەك ۇستەل

«روسسيا سەگودنيا» حالىقارالىق اقپارات اگەنتتىگىندە قازاقستاننىڭ رەسەي­دەگى ەلشىلىگىنىڭ باستاماسىمەن «ەۋ­را­زيا­لىق ەكونوميكالىق وداق: ىق­پال­داس­تىقتىڭ جاڭا ءمۇم­كىن­دىكتەرى» اتتى تا­قى­رىپپەن ءدوڭ­گەلەك ۇستەل ءوتتى, دەپ حا­بار­لادى قازاق­ستاننىڭ رەسەيدەگى ەلشى­لىگى. ءىس-شارا بارىسىندا رەسەيلىك جانە وتان­دىق ساراپشىلار ەۋرازيالىق ەكو­نو­ميكالىق وداق قىزمەتىنىڭ نەگىز­گى با­عىت­تارى مەن ونىڭ بولاشاق ءمۇم­كىن­دىكتەرى بويىنشا پىكىرلەستى. دوڭگەلەك ۇستەلدە وتاندىق ساياسات­تا­نۋشى نۇرلان ەرىمبەتوۆ, «ايف-قا­زاق­ستان» گازەتىنىڭ باس رەداكتورى سەرگەي كۋزوۆنيكوۆ جانە بەلگىلى رەسەيلىك ساراپشى يۋليا ياكۋشەۆا, ماكسيم شەۆچەنكو, دميتري جۋراۆلەۆ, الەكسەي پيلكو, ار­كا­دي دۋبنوۆ, كيريلل پريۆالوۆ, سونىمەن قاتار, باق وكىلدەرى قاتىستى. ءىس-شارانىڭ جۇرگىزۋشىسى رەتىندە اتاقتى رەسەي ءتىلشىسى ءارى كوسەمسوزشى ۆيتالي دىمارسكي قىزمەت ەتسە, ەلشىلىكتىڭ كەڭەسشى-ۋاكىلى مارات سىزدىقوۆ ارنايى ءسوز سويلەپ اشىپ, قازاقستان پرە­زي­دەنتى نۇرسۇلتان نازارباەۆ ەۋرا­زيا ىقپالداستىق ويىن العاشقى رەت جاريا­لاعاننان بەرى وتكەن 20 جىلدا ايماقتاعى ەلدەردىڭ ءوزارا قارىم-قاتىناستارىن جاڭا دەڭگەيگە كوتەرۋگە بارلىق نەگىزگى جاعدايلار قالىپتاسقانىن اتاپ كورسەتتى. «سولتۇستىك-وڭتۇستىك» ورتالىعىنىڭ باسشىسى يۋليا ياكۋشەۆا م.ۆلومونوسوۆ اتىن­داعى ماسكەۋ مەملەكەتتىك ۋنيۆەرسيتەتىندە ن.نازارباەۆ وتكەن ساۋىردە وقىعان ءدارى­سىنىڭ نەگىزگى ويلارىنا نازار اۋداردى. «1994 جىلى نۇرسۇلتان نازارباەۆ ءوزا­را تابىستى ىقپالداستىق جوباسىنىڭ ءۇر­دى­سىن ءوزى بەلگىلەگەن بولاتىن. جاقىندا قازاق­ستان پرەزيدەنتىنىڭ ەۋرا­زيالىق جوباسى ءبىرتۇتاس كەدەن اۋما­عى­نان ەۋرا­زيالىق ەكونوميكالىق وداق دەڭ­گەيىنە كوتەرىلمەك», دەدى يۋ.ياكۋشەۆا وسى ورايدا. رەسەيلىك  ساياساتتانۋشى ماكسيم شەۆ­­چەن­كونىڭ پىكىرىنشە, ەۋرازيالىق ىقپال­داستىق ستراتەگيالىق ماڭىزى زور جانار­ماي, كولىك جانە ادامي بىرلەسكەن قور­لارىن قۇرۋعا مۇمكىندىك بەرىپ, ەلدەرىمىزدىڭ الەمنىڭ ءداستۇرلى ىقپال ەتۋ ورتالىقتاردان تاۋەلدىلىگىن بارىنشا ازايتادى. «ارينە, ەۋرازيالىق ينتەگراتسيالىق جوباسىنىڭ (ەاەو) كەڭەس وداعىنا ەش قاتىسى جوق. ول مىناداي ماقساتتى شەشۋدى كوزدەيدى. ءبىرىنشىسى – جويىلعان ەكونوميكالىق بايلانىستاردى قايتا قال­پىنا كەلتىرۋ, ياعني ءبىرتۇتاس ەكونو­مي­كالىق كەڭىستىكتى  جانە بىرىككەن كەدەن وداعىن قۇرۋ, بيزنەس جۇرگىزۋدى  وڭايلاتۋ. اتالعان ءىس-شارانىڭ قورىتىندىلارى بويىنشا, ەۋرازيالىق ەكونوميكالىق وداق بولاشاقتا ەۋرووداق پەن قىتاي اراسىن بايلانىستىرۋشى  ورتالىق ءارى كوپىر رەتىندە قىزمەت ەتە الادى دەگەن ءبىراۋىزدى توقتامعا كەلدى.