قازاقستاننىڭ جوعارى وقۋ ورىندارىنىڭ ماگيستراتۋرا جانە دوكتورانتۋرا باعدارلامالارىندا ءبىلىم الۋشىلار دەرەكتەرمەن جۇمىس ىستەۋگە باعىتتالعان كونكۋرسقا قاتىسۋعا شاقىرىلادى. بۇل ءۇشىن 2-5 ادامنان تۇراتىن كوماندالار قۇرىپ, datathon.kz سايتىندا قاتىسۋ فورماسىن تولتىرۋ قاجەت. وتىنىمدەردى قابىلداۋ 15 قاراشاعا دەيىن جۇرگىزىلەدى. جوباعا قاتىسۋ ءۇشىن كوماندالار ستاتيستيك, ەكونوميست, data scientist, ماتەماتيك جانە ت.ب. سياقتى ءارتۇرلى سالاداعى مامانداردان قۇرالۋى مۇمكىن. ءبىر ۋنيۆەرسيتەتتەن بىرنەشە كوماندا قاتىسا الادى.
كونكۋرس بارىسىندا قاتىسۋشىلارعا وسى دەرەكتەردىڭ نەگىزىندە جاسالعان سينتەتيكالىق (جاساندى) دەرەكتەر ۇسىنىلادى. بۇل قۇپيالىلىق ساياساتىن بۇزباي ميكرودەرەكتەردى جاپپاي پايدالانۋ مۇمكىندىگىن اشادى.
«بۇعان دەيىن ءبىز دەرەكتەردى جوعارى وقۋ ورىندارىنا تەك ولاردىڭ سۇرانىسى بويىنشا ۇسىناتىنبىز. ەندى جەكە دەرەكتەردى قامتىمايتىن سينتەتيكالىق دەرەكتەردى پايدالانۋ مۇمكىندىگىن بەرە الامىز. وسىلايشا جاس عالىمدار ولاردىڭ نەگىزىندە جوبا شەشىمدەرىنىڭ ناقتى مودەلىن جاساي الادى. ءبىز جوعارى وقۋ ورىندارى بايقاۋعا اتسالىسىپ, قىزىقتى جوبالاردى ۇسىنادى دەپ ۇمىتتەنەمىز», دەيدى ستراتەگيالىق جوسپارلاۋ جانە رەفورمالار اگەنتتىگى ۇلتتىق ستاتيستيكا بيۋروسىنىڭ باسشىسى جاندوس شايماردانوۆ.
سونداي-اق جوباعا ءار ءتۇرلى سالا ساراپشىلارى كوماندالاردىڭ تالىمگەرلەرى رەتىندە قاتىسا الادى. بۇل ءۇشىن Datathon.kz سايتىندا تالىمگەرلەرگە ارنالعان جەكە ءوتىنىش فورماسىن تولتىرۋ قاجەت.
«Qazdatathon بايقاۋى data driven شەشىمدەرىن قابىلداۋ ءۇشىن دەرەكتەردى باسقارۋ جانە تالداۋ مادەنيەتىن قۇرۋدا نەگىز بولۋعا ءتيىس. بۇل اسىرەسە جاس ماماندار ءۇشىن ماڭىزدى. كونكۋرس قاتىسۋشىلارى بولاشاقتا وزدەرىنە پايدالى بولاتىن بىرەگەي تاجىريبە الادى دەپ ۇمىتتەنەمىز», دەيدى ۇلتتىق بانكتىڭ تولەم جانە قارجى تەحنولوگيالارىن دامىتۋ ورتالىعىنىڭ توراعاسى بينۇر جالەنوۆ.
كونكۋرس جەڭىمپازدارى مەن جۇلدەگەرلەرى دەمەۋشىلەر اتىنان ەلەكترونيكا دۇكەندەرىنە سىيلىق سەرتيفيكاتتارىن, دەرەكتەردى تالداۋعا ارنالعان «Qlik» باعدارلاماسىنىڭ جىلدىق ليتسەنزياسىن, بيزنەس-اناليتيكا بويىنشا كىتاپتار, سونداي-اق كونكۋرستى ۇيىمداستىرۋشىلار قۇرىلىمىندا تاعىلىمدامادان ءوتۋ مۇمكىندىگىن الادى. سونداي-اق, جەڭىمپاز كومانداعا ناقتى دەرەكتەر نەگىزىندە جوبانى ىسكە اسىرۋ مۇمكىندىگى بەرىلەدى.
