اقتاۋدا جاڭا زاۋىت سالىنباق

مۇناي بار, اقشا بار دەپ وزگەدەن ساتىپ الا بەرۋدى ادەتكە اينالدىرماي, ءىرى دە ىرگەلى زاۋىتتار مەن ءوندىرىس ورىندارىن وزىمىزدەن سالىپ, وندا وندىرىلگەن بۇيىمداردى شەتتىڭ نارىعىنا شىعارساق, وزگەلەر وزدەرىندە جوقتى بىزدەن كەلىپ اتتاي قالاپ ساتىپ الىپ جاتسا – ەكونوميكالىق دامۋ دەگەن وسى. جەر استىنىڭ بايلىعى بار دەگەنمەن, ونىڭ دا شەگى كورىنەتىنى تابيعي قۇبىلىس. ءبارىن سارقىپ الىپ, كەلەر ۇرپاققا استى دا, ءۇستى دە بوس قۇرعاق جەردى ساۋساقپەن نۇسقاپ «تابىستاپ» كەتۋدىڭ ماڭىزى قانشا؟ قازىر ەلىمىزدە جۇرگىزىلىپ جاتقان يندۋستريالىق-يننوۆاتسيالىق ءىس-شارالاردىڭ نەگىزى وسىندا جاتىر. ال, ءىرى جوبالاردى وزگەلەرمەن بىرلەسىپ, ولاردىڭ وزىق تەحنولوگيا­سىن, جەتكىلىكتى كۇشىن, عىلىمداعى الەۋەتىن پايدالانا وتىرىپ, ورتاق قاراجاتقا سالۋ دا ەكونوميكالىق تابىستى بولماق. وسى ورايدا, ەلىمىزگە ءتۇرلى مەملەكەتتەردەن رەسمي وكىلدەر كەلىپ, ءتۇرلى ماڭىزدى كەلىسىمشارتتارعا قول قويىپ, بىرلەسكەن ىستەردى قولعا الىپ جاتادى. سونىڭ ءبىرى, وتكەن جىلى قىركۇيەكتە يسپانيانىڭ پرەمەر-ءمينيسترى ماريانو راحويانىڭ قازاقستانعا ءىسساپارى بارىسىندا ناقتىلانعان بولاتىن. جۋىردا «اقتاۋ تەڭىز پورتى» ارنايى ەكونوميكالىق ايماعىندا «اقتاۋ تەڭىز پورتى» ەەا جانە «IndoxSamrukKazakhstan» جشس اراسىندا ايماق جۇمىسىنا قاتىسۋ­شىلار رەتىندە قىزمەتتى جۇزەگە اسىرۋ جونىندە شارتقا قول قويىلدى. بۇل اتاۋى ءالى كەڭىنەن تانىس ەمەس كومپانيا – «IndoxSamrukKazak­hstan» جشس – «سامۇرىق-قازىناينۆەست» جانە يسپانيالىق «RosRokaindox»-تىڭ بىرلەسكەن كاسىپورنى. جاڭا كاسىپورىن «مۇناي ونىمدەرى, سۇيى­تىلعان جانە سىعىمدالعان گاز ءۇشىن جابدىقتار قۇرۋعا ارنالعان ءوندى­رىستىك كەشەن» اشۋ جوباسىن دامىتۋ ماقساتىندا قۇرىلعان بولاتىن. قازاقستان اۋماعىندا تابيعي سۇيى­تىلعان گاز نارىعىن دامىتۋ ءۇشىن قاجەتتى ينفراقۇرىلىم جانە جابدىقتار قۇرۋ جوباسى قاراس­تىرىلادى, سونداي-اق, ىشكى قاجەت­تىلىكتى وتەۋمەن بىرگە سىرتقا ءونىم شىعارۋ مۇمكىندىگى كوزدەلەدى. جوبانى جۇزەگە اسىرۋ بارىسىندا ينجەنەر-تەحنيك قىزمەتكەرلەردى دايارلاۋعا باعىتتالعان بىرەگەي عىلىمي-زەرتتەۋ ورتالىعى قۇرى­لىپ, قازاقستاننىڭ جانە يسپا­نيا­نىڭ تەحنيكالىق جوعارى وقۋ ورىندارىمەن بايلانىس ورناتىلىپ, بىلىكتى ماماندار ازىرلەنبەك. ايتۋلارىنشا, ءتۇرلى كولىك قۇرال­دارى قوزعالتقىشتارىن تابيعي سۇيىتىلعان گازبەن جۇمىس جا­ساۋ­عا بەيىمدەۋ ءۇردىسى جۇزەگە اسپاق جانە زاۋىت تابيعي گازدى زا­لال­سىزداندىرۋعا ارنالعان قۇرال-جابدىقتار شىعاراتىن تسەحتاردان تۇرماق. اقتاۋدا سۇيىتىلعان كومىر­سۋتەكتى گازداردى شىعاراتىن ءارى تاسىمالدايتىن, ساقتايتىن قۇرىل­عىلاردى وندىرەتىن بۇل ءىرى وندىرىستىك كەشەن سالىنسا, 3 مىڭ­نىڭ ۇستىندە ادام جۇمىسپەن قامتى­لاتىن بولادى. اقتاۋداعى ارنايى ەكونوميكالىق ايماقتىڭ 100 گەكتارعا جۋىق اۋماعىن الاتىن زاۋىت كەلەشەكتە ءوز ونىمدەرىمەن قازاقستاننىڭ عانا ەمەس, تمد ەلدە­رىنىڭ سۇرانىسىن وتەيدى دەلىنەدى. تياناقتى, تىڭعىلىقتى ءىس اتقارۋعا وسى سالادا 60 جىل تاجىريبەسى بار كومپانيا سەندىرىپ وتىر. قول قويۋ راسىمىنە قاتىسقان ماڭعىستاۋ وبلىسىنىڭ اكىمى ا.ايدارباەۆ جوبانىڭ ءوڭىر ءۇشىن ەكونوميكالىق تۇرعىدا ماڭىز­دىلىعىن, جوبا اياسىندا بىردەن ءبىر عىلىمي-زەرتتەۋ ورتالىعى سالىنىپ, ينجەنەر-تەحنيك قىزمەتكەرلەرى دايىندالاتىندىعىن ايتۋمەن قاتار, ءىرى جوبانىڭ قازاقستاندا ىسكە اسىرىلۋىن ەلباسىنىڭ ورتاق كەدەن ورتالىعىن قۇرۋ باستاماسىنىڭ جەمىسى دەپ ۇعىناتىندىعىن جەتكىزدى. جاڭا جوبانىڭ تۇساۋى كەسىلدى, ەندى تۇرعىندار زاۋىتتىڭ, ودان كەيىن العاشقى ونىمدەردىڭ تۇساۋى كەسىلەتىن كۇندەردى تاعاتسىزدانا كۇتەتىن بولادى. گۇلايىم شىنتەمىرقىزى, «ەگەمەن قازاقستان». اقتاۋ.