يسپانيا قۇراماسىنىڭ اتاعى الىسقا تاراعان. كەزىندە ولار بيللي دجين كينگ كۋبوگىن بەس مارتە ولجالاپ, تاعى التى رەت فينالدا وينادى. اتالعان جارىستا قول جەتكىزگەن تابىسى جاعىنان پيرەنەي تۇبەگى تەننيسشىلەرىنىڭ الدىن وراپ تۇرعان ءۇش مەملەكەت قانا بار. ولار – اقش (18 جەڭىس), چەحيا (11 جەڭىس) جانە اۋستراليا (7 جەڭىس). دەسەك تە كەيىنگى كەزدەرى يسپانيالىقتاردىڭ شابىسى ءبىراز باسەڭدەپ قالعانى بايقالادى. ولاي دەۋگە نەگىز, سوڭعى رەت ولار باس جۇلدەنى سوناۋ 1998 جىلى ولجالاسا, فينالعا شىقپاعاندارىنا باقانداي 14 جىلدىڭ ءجۇزى بولدى جانە دە الەمنىڭ بۇرىنعى ءبىرىنشى راكەتكاسى گاربينە مۋگۋرۋسا بلانكونىڭ شوتلاندياداعى تۋرنيرگە كەلمەيتىنىن ەستىگەندە, كادىمگىدەي قۋاندىق. سەبەبى ول – تىم ازۋلى قارسىلاس. مۋگۋرۋسا 2016 جىلى رولان گارروس پەن 2017 جىلى ۋيمبلدوندا الدىنا جان سالماي, 2021 جىلى WTA-نىڭ قورىتىندى تۋرنيرىندە جەڭىسكە جەتكەنىن جانكۇيەرلەر جاقسى بىلەدى.
سول كەشتە العاشقى بولىپ كورتقا يۋليا پۋتينتسەۆا مەن نۋريا پارريزاس-دياس شىقتى. يسپانيا وكىلى بۇرىن-سوڭدى حالىقارالىق ارەنادا ەلەۋلى تابىستارعا قول جەتكىزگەن ەمەس. بيىل نۋريا مەلبۋرندە وتكەن اۋستراليانىڭ اشىق بىرىنشىلىگىنىڭ ءۇشىنشى كەزەڭىنە دەيىن جەتتى. ەڭ ۇزدىك ناتيجەسى وسى. وعان قاراعاندا يۋليانىڭ باعىندىرعان بەلەستەرى الدەقايدا زور. الەمدىك رەيتينگتە دە جەرلەسىمىز قارسىلاسىنان 21 ساتى جوعارى تۇر. سول سەبەپتى دە 31 جاستاعى ارداگەر ويىنشىدان ايتارلىقتاي قاۋىپ كەلەدى دەپ ەش ويلاماعان ەدىك. ال پارريزاس-دياس بولسا, ەل نامىسى سىنعا تۇسكەن ساتتە شيرىعىپ شىعا كەلدى. العاشقى ەكى سەتتە تارازى باسى تەڭسەلىپ تۇردى. بىرىنشىسىندە پارريزاس-دياس باسىم ءتۇستى – 6:4. ەكىنشىسىندە پۋتينتسەۆانىڭ مىسى باسىم بولدى – 6:2. شەشۋشى كەزەڭدە ەكەۋى دە ايانباي ايقاستى. ويىن تاي-برەيككە ۇلاستى. بۇل رەتتە يسپانيالىقتىڭ باعى جاندى – 7:6.
ەندىگى بار ءۇمىتىمىز ەلەنا رىباكينادا ەدى. بىردەن ايتا كەتەيىك, ول وتە ازۋلى قارسىلاسقا تاپ بولدى. تۋرا ءتورت تاۋلىكتەن كەيىن 25 جاسقا تولعالى وتىرعان پاۋلا بادوسا 2021 جىلى رولان گارروستىڭ شيرەك فينالىنا شىقسا, 2022 جىلى اۋستراليانىڭ اشىق بىرىنشىلىگىنىڭ ءتورتىنشى كەزەڭىنە دەيىن جەتتى. WTA تۋرنيرلەرىندە ءۇش مارتە توپ جاردى. سونىڭ ارقاسىندا ول بيىل كوكتەمدە الەمدىك رەيتينگتە ەكىنشى ورىنعا دەيىن كوتەرىلدى. قازىرگى كەزدە پاۋلا 13-ورىندى يەلەنۋدە. جالپى, بادوسا مەن رىباكينا ءوزارا ءتورت مارتە شەبەرلىك بايقاسىپ, سونىڭ ۇشەۋىندە العاشقىسىنىڭ اسىعى الشىسىنان ءتۇستى. بۇل جولى دا يسپانيالىق تەننيسشىنىڭ مەرەيى ۇستەم بولدى. 2 ساعات 05 مينۋتقا سوزىلعان سايىس 6:2, 3:6, 6:4 ەسەبىمەن اياقتالدى.
جۇپتىق سايىستا يۋليا پۋتينتسەۆا مەن اننا دانيلينا پاۋلا بادوسا مەن الەنا بولشوۆادان 4:6, 2:6 ەسەبىمەن جەڭىلدى. وسى ساتسىزدىكتەن كەيىن قازاقستان قۇراماسى جارىس جولىنان شىعىپ قالدى. ەندى جارتىلاي فينال جولداماسى ءۇشىن ۇلىبريتانيا مەن يسپانيا قۇرامالارى تالاسادى. ال بيللي دجين كينگ كۋبوگىنىڭ يەگەرى 13 قاراشادا انىقتالادى.
