پوليتسيانىڭ پايىمداۋىنشا, قىس مەزگىلىندە مۇنداي كولىك قۇرالدارىمەن ءجۇرۋ پايدالانۋشىلار ءۇشىن دە, جول قوزعالىسىنىڭ باسقا قاتىسۋشىلارى ءۇشىن دە قاۋىپتى.
«الماتى قالاسىنىڭ پوليتسەيلەرى اتالعان كولىكتى قىس مەزگىلىندە پايدالانباۋعا كەڭەس بەرەدى. ويتكەنى ول جاڭبىر مەن قاردا پايدالانۋعا جارامايدى. سونىمەن قاتار بۇل قۇرىلعىلار جول قوزعالىسى كەزىندە اينالاسىنداعىلارعا قاۋىپ توندىرەدى», دەيدى پوليتسەيلەر.
بىراق قازىرگى ۋاقىتتا زاڭنامادا مۇنداي قۇرىلعىلاردى قىستى كۇنى جولداردا پايدالانۋعا رەسمي تۇردە شەكتەۋ جوق.
الماتى قالاسى اكىمدىگىنىڭ قالالىق موبيلدىلىك باسقارماسى جانىنداعى ۆەلوينفراقۇرىلىمدى دامىتۋ جونىندەگى قوعامدىق كەڭەستىڭ مۇشەسى الەكساندر گابچەنكو الماتىدا ميكروموبيلدى كولىك تۇرلەرىن پايدالانۋشىلار سانى كۇننەن-كۇنگە ارتىپ كەلە جاتقانىن ايتتى. بىراق ول قالانىڭ ينفراقۇرىلىمى ميكروموبيلدى كولىك تۇرلەرى ءۇشىن تولىق بەيىمدەلمەگەن دەپ ەسەپتەيدى.
«قازىر قالا بويىنشا ميكروموبيلدى قۇرالدارمەن جۇرەتىندەر سانى كوبەيىپ كەلەدى. جىلدىڭ قاي مەزگىلى بولسىن مۇنداي قوزعالىس اعىنى توقتاعان ەمەس. الماتىدا ۆەلوسيپەدتەر ءۇشىن ينفراقۇرىلىم قانشالىقتى ناشار بولسا دا, ادامدار ونى پايدالانادى. ءبىز مۇنى كۇن سايىن ءوز كوزىمىزبەن كورىپ ءجۇرمىز. ءبىزدىڭ قالامىزداعى باستى ماسەلە - ۆەلوسيپەد ينفراقۇرىلىمىنىڭ ساپاسىزدىعى. بۇل, اسىرەسە, اۋا رايى سۋىق مەزگىلدە قاتتى بايقالادى», دەيدى الەكساندر گابچەنكو.
سوندىقتان ول ميكروكولىك پايدالانۋشىلارىنا لايىقتى ينفراقۇرىلىم جاسالۋى كەرەك دەپ ەسەپتەيدى. تىم بولماعاندا ۆەلوسيپەد جولاقتارىن قۇم مەن تاس جانە ارنايى سەبىلەتىن تۇزدان ۋاقىتىندا تازالاپ وتىرسا دا ماسەلە شەشىمىن تابۋى مۇمكىن دەگەن بولجامىن ايتتى.
«ال سكۋتەرمەن جۇرەتىندەرگە جاياۋ جۇرگىنشىلەر جولىنا تۇسۋگە بولمايدى. بىراق مەملەكەت پەن قالا باسشىلىعى ولارعا قاۋىپسىز ءجۇرۋ ءۇشىن ەشقانداي بالاما جاساپ بەرە الماي وتىر», دەيدى ا. گابچەنكو.
بۇعان دەيىن الماتىدا ۆەلوجولداردى جاياۋ جۇرگىنشىلەر ايماعىنان ءبولىپ تۇرعان باللاردتار الىنىپ تاستالدى. كەيىن الماتى اكىمدىگى بۇل جاعدايدى ءتۇسىندىرىپ بەرگەن. ولاردىڭ ايتۋىنشا, مۇنداي قادام جولداردى قاردان تولىق تازارتۋ ءۇشىن جاسالعان. سول سەبەپتى, كوممۋنالدىق كولىكتەرگە ىڭعايلى بولۋ ءۇشىن جىل سايىن قاراشادان اقپانعا دەيىن بوللاردتار الىنىپ تاستالادى.
