بۇگىندە وڭىردەگى ەكولوگيالىق جاعداي سالىستىرمالى تۇردە قولايلى. وبلىس لاستاۋشى زاتتار شىعارىندىلارىنىڭ ناقتى كولەمى 10,8 مىڭ توننانى قۇرايدى. بۇل بىلتىرمەن سالىستىرعاندا 6,4 پايىزعا, ياكي 10,1 مىڭ تونناعا تومەن. بۇعان تابيعاتتى قورعاۋ شارالارىن جۇزەگە اسىرۋ ارقىلى قول جەتكىزىلگەن.
بۇرىنعى الماتى وبلىسى بويىنشا جول كارتاسى اياسىندا جۇزەگە اسىرىلعان 8 ءىس-شارانىڭ 6-ۋى جەتىسۋ وبلىسىنا تيەسىلى. ماسەلەن, وتكەن جىلى تالدىقورعان قالاسىنىڭ, كوكسۋ جانە ەسكەلدى اۋداندارىنىڭ 6 قازاندىعى گازعا اۋىستىرىلعان. وعان قوسا ەسكەلدى اۋدانىنىڭ كارىز جەلىلەرى مەن تازارتۋ قۇرىلىستارىن قايتا جاڭارتۋ جۇمىستارى جۇرگىزىلۋدە. تالدىقورعان قالاسىنىڭ LED-ەكراندارىندا قازگيدرومەت ۇسىناتىن اتموسفەرالىق اۋانىڭ ساپاسى تۋرالى اقپارات ورنالاستىرىلىپ جاتىر.
ۆەدومستۆو باسشىسى وبلىستاردىڭ ءبولىنۋىن ەسكەرە وتىرىپ, وسى جىلدىڭ قاراشا ايىنىڭ سوڭىنا دەيىن جۇرتشىلىقپەن بىرلەسىپ جەتىسۋ وبلىسىنىڭ ەكوجۇيەسىن جاقسارتۋ بويىنشا جەكە جول كارتاسىن ازىرلەۋ قاجەتتىگىن اتاپ ءوتتى.
«جالپى, جەتىسۋ وبلىسىندا بيىلعى 9 ايدىڭ قورىتىندىسى بويىنشا قايتا وڭدەۋ جانە كادەگە جاراتۋ ۇلەسى 5,6 پايىزدى قۇرادى, بۇل وتە تومەن كورسەتكىش. ورتاشا رەسپۋبليكالىق دەڭگەي 24 پايىزدى قۇرايدى. بيىل وڭىردە كوسمومونيتورينگپەن 142 پوليگون انىقتالدى, ونىڭ 63 پايىزى جويىلدى (90 بىرلىك). سونىمەن قاتار بىرقاتار قالا مەن اۋدان اكىمدەرى پوليگونداردى جويماعانى ءۇشىن اكىمشىلىك جاۋاپكەرشىلىككە تارتىلدى», دەدى مينيستر.
ودان بولەك كەزدەسۋگە قاتىسۋشىلاردىڭ نازارىن قالدىقتاردى باسقارۋدىڭ ناشار دامىعان ينفراقۇرىلىمى پروبلەماسىنا, قتق پوليگوندارىنىڭ نورمالارعا سايكەس كەلمەۋىنە, رۇقسات ەتىلمەگەن پوليگونداردىڭ ەداۋىر سانىنا جانە كارىز-تازارتۋ قۇرىلىستارىنىڭ توزۋىنا اۋداردى.
«قوعامدىق رەزونانس تۋدىراتىن تاعى ءبىر ماسەلە كارىز جانە اعىندى سۋلاردى تازارتۋ قوندىرعىلارىنىڭ جاعدايى بولدى. ماسەلەن, وبلىستا 358 ەلدى مەكەننىڭ 13-ءى نەمەسە 3,6 پايىزى ورتالىقتاندىرىلعان سۋ بۇرۋمەن قامتىلعان. تالدىقورعان قالاسىنىڭ تازارتۋ قۇرىلىستارى قاناعاتتانارلىقسىز جاعدايدا. جوسپاردان تىس تەكسەرۋ بارىسىندا «جەتىسۋ سۋ ارناسىنا» قاتىستى بىرقاتار ەكولوگيالىق بۇزۋشىلىق انىقتالدى. ولاردى جويۋ ءۇشىن جوندەۋ جۇمىستارىن جۇرگىزۋ جانە تازارتۋ قۇرىلىستارىن رەكونسترۋكتسيالاۋ تالاپ ەتىلەدى. بۇل ايتارلىقتاي قاراجاتتى قاجەت ەتەدى. وسىعان بايلانىستى وبلىس اكىمدىگىنە ەكولوگيالىق تولەمدەردەن تۇسەتىن قاراجات ەسەبىنەن قارجىلاندىرۋ ماسەلەسىن قاراستىرۋ ۇسىنىلدى», دەدى س.برەكەشەۆ.
ونىڭ ايتۋىنشا, بالقاش كولىنىڭ وڭتايلى دەڭگەيى بالتىق جۇيەسى بويىنشا 341 م بەلگىگە تەڭ. سوڭعى 10 جىلداعى دەرەكتەر كول دەڭگەيى بۇل بەلگىدەن تومەن تۇسپەگەنىن كورسەتەدى. كولدىڭ تۇراقتى دەڭگەيدە ساقتالۋىنا ىلە وزەنىنىڭ جىل سايىنعى اعىنى, سۋ كولەمى كەمىندە 12 تەكشە شاقىرىم بولۋى كەپىلدىك بەرەدى. «دوبىن» شەكارا ماڭى بەكەتىندەگى گيدرولوگيالىق دەرەكتەردى تالداۋ وزەننىڭ ورتاشا كوپ جىلدىق اعىنى نەمەسە 2001-2021 جىلدار كەزەڭىندە جىلىنا 13,8 تەكشە شاقىرىمدى قۇراعانىن كورسەتكەن. سونداي-اق «جاسىل قازاقستان» ۇلتتىق جوباسى اياسىندا بالقاش كولىنە جىلىنا كەمىندە 12 تەكشە شاقىرىم سۋ اعىزۋ ءۇشىن ونىڭ ءتۇبىن تەرەڭدەتۋ جۇمىستارى جۇرگىزىلىپ, 12 سۋ وبەكتىسىندە تازارتۋ جۇمىستارى اتقارىلعان. بالقاش كولى باسسەينىندەگى 12 كانال جوندەلمەك.
قىتاي تاراپىمەن سۋ ءبولۋ جونىندەگى كەلىسىم جوباسىن ودان ءارى كەلىسۋ كەزىندە بالقاش كولىنىڭ ەكوجۇيەلەرىن دامىتۋ جانە ساقتاۋ مۇددەلەرى ەسكەرىلەتىن ۋاعدالاستىقتارعا قول جەتكىزىلگەن. سونىمەن قاتار پرەزيدەنت تاپسىرماسى بويىنشا مينيسترلىك توپىراق ەروزياسىن ازايتۋ جانە شولەيتتەنۋدى بولدىرماۋ ماقساتىندا بالقاشتىڭ جاعالاۋ سىزىعىن كوگالداندىرۋ ماسەلەسىن پىسىقتاۋدا.
كەزدەسۋ بارىسىندا حالىققا بيىل قىزىلاعاش سۋ قويماسىن قالپىنا كەلتىرۋ تۋرالى حابارلاندى. بۇل 2,5 مىڭ حالقى بار 4 اۋىلدى سۋ باسۋ قاۋپىن بولدىرماۋعا مۇمكىندىك بەرەدى. سونداي-اق 5,2 مىڭ گا جاڭا سۋارمالى جەرلەردى پايدالانۋعا بەرۋ ءۇشىن يرريگاتسيالىق ينفراقۇرىلىم سالىنۋدا.
بالىق شارۋاشىلىعىن دامىتۋ بويىنشا 2030 جىلعا دەيىنگى سالانى دامىتۋدىڭ باعدارلاماسى بەكىتىلگەنى تۋرالى دا ايتىلدى. وسى جىلدىڭ 6 ايىندا وبلىستا 200 توننا تاۋارلىق بالىق وسىرىلگەن. 2023 جىلدىڭ سوڭىنا دەيىن قۋاتتىلىعى 400 توننا بولاتىن 10 كول-تاۋارلىق بالىق ءوسىرۋ شارۋاشىلىعىن قۇرۋ جوسپارلانۋدا.
كەزدەسۋ سوڭىندا سەرىكقالي برەكەشەۆ جەتىسۋ وبلىسى تۇرعىندارىنىڭ سۇراقتارىنا جاۋاپ بەردى. ءىس-شارا اياقتالعاننان كەيىن مينيستر ازاماتتاردى جەكە قابىلدادى.
جەتىسۋ وبلىسى
