ەكونوميكا • 02 قاراشا، 2022

جاڭا تسەحتىڭ مۇمكىندىگى

وڭىردەگى عانا ەمەس، ەلىمىزدەگى حيميا ونەركاسىبىنىڭ لوكوموتيۆى سانالاتىن «قازفوسفات» جشس بۇگىندە 7 مىڭنان استام ازاماتتى جۇمىسپەن قامتىپ وتىرعان الپاۋىت كومپانيا سانالادى. سەرىكتەستىك ونىمدەرى بۇگىنگى تاڭدا ەلىمىزگە عانا ەمەس، الەمنىڭ بىرقاتار ەلىنە ەكسپورتتالىپ جاتىر. جىل وتكەن سايىن جاڭارۋ مەن جاڭعىرۋدىڭ جولىنا تۇسكەن كومپانيا باسشىلىعى تاعى ءبىر تسەحتى ىسكە قوستى.

تابيعات مۇسىلمانقۇل

تاراز قالاسىندا ورنالاسقان «قازفوسفات» جشس-عا قاراستى مينەرالدى تىڭايتقىشتار وندىرەتىن «امموفوس-2» تسەحىنىڭ الەۋەتى قانداي؟ دەرەكتەرگە سۇيەنسەك، جاڭادان اشىلعان تسەح تاعى دا 500 ادامدى جۇمىسپەن قامتۋعا قاۋقارلى.

«وڭىردە اشىلعان جاڭا تسەح جامبىل وبلىسى ءۇشىن عانا ەمەس، جالپى ەلىمىز ءۇشىن دە ۇلكەن ءوندىرىس الاڭىنا اينالادى. جالپى، جامبىل وڭىرىندە قولعا الىنعان اۋقىمدى جۇمىس وڭ ناتيجەسىن بەرىپ وتىر. سونىڭ ناتيجەسىندە سوڭعى بىرنەشە جىلدا اگروحيميا سالاسىنداعى وندىرىلەتىن ءونىم كولەمى ەسەلەپ ءوستى. وزگە مەملەكەتتەرگە جونەلتىلىپ جاتقان ءونىم كولەمى 1،8 ەسەگە ارتقانىن دا ايتا كەتكەن ءلازىم.

بۇل رەتتە جامبىلدىق ەڭبەككەرلەردىڭ ەسەلى ەڭبەگىنىڭ زور ەكەنىن ايرىقشا اتاپ وتكەن دۇرىس. جاڭا ءوندىرىس تسەحى ءونىم كولەمىن بۇرىنعىدان دا ەسەلەي تۇسەتىنى تالاس تۋدىرماسا كەرەك. ەلىمىز بويىنشا اتقارىلىپ جاتقان ءىرى جوبالاردىڭ ءبىر بولشەگى قاسيەت دارىپ، قۇت قونعان اۋليەتا وڭىرىمەن تىعىز بايلانىستى بولىپ تۇرعانى قۋانتادى. جالپى، سەرىكتەستىكتىڭ ەل ەكونوميكاسىن وركەندەتۋدە وزىندىك ورنى بار ەكەنىن ءبارىمىز بىلەمىز»، دەيدى يندۋستريا جانە ينفراقۇرىلىمدىق دامۋ ءمينيسترى قايىربەك وسكەنباەۆ.

ءوڭىر باسشىسى نۇرجان نۇرجىگىتوۆتىڭ ايتۋىنشا، «قازفوسفات» جشس قىزمەتكەرلەرىنىڭ قولعا العان جۇمىس اۋقىمى وتە زور. بۇل ءوز كەزەگىندە ءوڭىر ەكونوميكاسىنىڭ وركەندەي تۇسۋىنە ايتارلىقتاي ۇلەس قوسپاق. ال وندىرىلەتىن ءونىم كولەمى جىل وتكەن سايىن ارتا تۇسپەك. سول باعىتتاعى جۇمىستار بۇگىننەن باستاپ ناقتى قولعا الىنعان.

«ناقتىراق ايتار بولساق، 7 مىڭنان استام تۇرعىندى تۇراقتى جۇمىسپەن قامتىپ وتىرعان «قازفوسفات» جشس وڭىردەگى حيميا سالاسىن وركەندەتۋدە ۇلكەن جۇمىستار اتقارىپ جاتىر. جىلدار بويى جەمىستى ەڭبەك ەتىپ كەلە جاتقان سەرىكتەستىكپەن قالاي ماقتانساق تا جاراسادى. ءوڭىرىمىز بويىنشا ءوندىرىلىپ جاتقان ءونىمنىڭ 30 پايىزىنىڭ ءدال وسى سەرىكتەستىككە تيەسىلى بولۋى – سوزىمىزگە بۇلتارتپاس دالەل.

دامۋدىڭ داڭعىل جولىنان اداسپاعان سەرىكتەستىك الداعى جىلداردا ەلىمىزدىڭ بارلىق قيىرىن مينەرالدى تىڭايتقىشتارمەن قامتاماسىز ەتەتىن بولادى. بۇگىندە وبلىسىمىزدا تىنباي جۇمىس ىستەپ جاتقان مىڭداعان شارۋا قوجالىعىنىڭ باسشىلارى دا سەرىكتەستىك ءونىمىنىڭ شاراپاتىن كورىپ وتىرعانىن ايتا كەتكەن ءجون. ءتۇيىپ ايتار بولساق، «امموفوس-2» تسەحى ءوڭىر ەكونوميكاسىن وركەندەتۋدە ايرىقشا ءرول اتقاراتىن بولادى»، دەيدى ءوڭىر باسشىسى.

جاڭادان اشىلعان تسەحتا جىلىنا 500 مىڭ توننا اممافوس وندىرىلمەك. ال جالپى كاسىپورىنداعى مينەرالدى تىڭايتقىشتار ءوندىرىسىنىڭ جىلدىق قۋاتى 1 ملن تونناعا دەيىن ۇلعايىپ وتىر. وسىلايشا، جالپى قۇنى 72 ملرد تەڭگەنى قۇرايتىن تسەح الداعى ۋاقىتتا ىشكى جانە سىرتقى نارىقتى مينەرالدى تىڭايتقىشپەن قامتىماق.

تاراز