سپورتتىڭ بۇل تۇرىندە قازاقستاننىڭ جەڭىسپەن ورىلگەن باي ءداستۇرى بارىن جانكۇيەرلەر جاقسى بىلەدى. اسىرەسە ءبىزدىڭ جىگىتتەر سارى قۇرلىقتا وتەتىن جارىستاردا الدارىنا جان سالماي ءجۇر. اتاپ ايتساق, وسى كۇنگە دەيىن جەتى مارتە الاۋى تۇتانعان جازعى ازيا ويىندارىنىڭ التاۋىندا وتانداستارىمىز التىن تۇعىرعا كوتەرىلدى. تەك 2006 جىلى دوحادا ۇيىمداستىرىلعان ازيادادا قىتاي مەن جاپونيانى العا جىبەرىپ, ءۇشىنشى ورىندا قالىپ قويدى. 1995-2016 جىلدار ارالىعىندا جالاۋى جەلبىرەگەن ازيا چەمپيوناتتارىندا 4 التىن, 2 كۇمىس جانە 1 قولانى ولجالادى. ودان بولەك, وليمپيا ويىندارىندا ءتورت رەت باق سىنادى. ەڭ ۇزدىك كورسەتكىشى – 2000 جىلى سيدنەي وليمپياداسىندا توعىزىنشى ورىندى يەلەنۋى. توعىز رەت الەم چەمپيوناتىندا بوي كورسەتتى. الايدا ەۋروپا مەن امەريكانىڭ مىقتى كوماندالارىنىڭ قارقىنىنا توتەپ بەرۋ مۇمكىن بولمادى.
ەلىمىزدىڭ ايەلدەر قۇراماسىنىڭ دا جەتىستىگى از ەمەس. ولار 2010, 2014 جانە 2018 جىلدارى وتكەن ازيا ويىندارىندا كۇمىس مەدال يەلەندى. بىرنەشە رەت سارى قۇرلىق بىرىنشىلىگىندە جۇلدەگەرلەر ساناتىنا قوسىلىپ, وليمپيادا مەن الەم چەمپيوناتتارىندا ونەر كورسەتتى. عاسىرلار توعىسىندا سيدنەيدە الاۋى تۇتانعان ءتورت جىلدىقتىڭ باستى دوداسىنا التىنشى ورىندى ەنشىلەدى. ازىرگە بۇرىمدىلارىمىزدىڭ ەڭ ۇزدىك ناتيجەسى وسى. بيىل سامۋتپراكاندا تايلاند, وزبەكستان, قىتاي, سينگاپۋر, جاپونيا, وڭتۇستىك كورەيا جانە قازاقستان ۆاتەرپولشىلارى سايىسقا تۇسەدى.
ەرلەر مەن ايەلدەر اراسىندا وتەتىن قوس جارىستا 2023 جىلدىڭ 14-30 شىلدەسى ارالىعىندا وتەتىن الەم چەمپيوناتىنىڭ جولدامالارى ساراپقا سالىنادى.
