قىزىل جالىن قاۋساتىپ كەتكەن ورمانعا كوشەت وتىرعىزۋ جۇمىستارى 3 قازاندا باستالدى. وسى ايدىڭ ورتاسىنا دەيىن كوپتىڭ كۇشىمەن 1 400 كوشەت وتىرعىزىلدى. وعان وڭىردەگى مەملەكەتتىك مەكەمە قىزمەتكەرلەرى, ءماسليحات دەپۋتاتتارى, قوعامدىق ۇيىمدار مەن ەرىكتى جاستار, جەرگىلىكتى ورمان شارۋاشىلىقتارى مەن وزگە دە ەڭبەك ۇجىمدارى اتسالىسىپ جاتىر. جوسپار بويىنشا وسى كۇزدە 31,5 گەكتار جەردىڭ كۇيگەن اعاشى وتالىپ, ورنىنا 25 مىڭ جاس وسكىن وتىرعىزىلادى. ونىڭ 19 مىڭنان استامى – قاراعاي,
5 مىڭنان استامى – قايىڭ كوشەتتەرى.
ورتەنگەن القاپتىڭ 75 پايىزىنا قاراعاي, قالعان جەرگە قايىڭ وتىرعىزىلادى. اۋەلى ورتەنگەن اعاشتار وتالىپ, ورمان القابى تازارتىلادى. امانقاراعايعا وتىرعىزىلاتىن قايىڭ كوشەتتەرى وڭىردەگى ورمان شارۋاشىلىقتارىنان دا تابىلادى. ال قاراعاي كوشەتتەرى كورشىلەس اقمولا وبلىسىنان اكەلىنىپ جاتىر.
– كەلەسى جىلى مۇندا 1 ملن-نان استام ەكى جىلدىق قايىڭ كوشەتتەرىن ەگەمىز. شامامەن الداعى بەس جىل بويى ورماندى قالپىنا كەلتىرۋ جۇمىستارى جۇرگىزىلەتىن بولادى. مەملەكەت باسشىسى قاسىم-جومارت توقاەۆ ەلىمىز بويىنشا 2 ملرد ءتۇپ اعاش وتىرعىزۋدى تاپسىرعانىن بىلەسىزدەر. سونىڭ 170 ملن ءتۇبى ءبىزدىڭ وڭىرگە ەگىلەدى. نەگىزگى جۇمىس قازىر وسى ەكى ورمان شارۋاشىلىعىنىڭ اۋماعىندا ۇيىمداستىرىلادى, – دەدى وبلىس باسشىسى ارحيمەد مۇحامبەتوۆ.
وسى ورايدا جەرگىلىكتى بيۋدجەت ەسەبىنەن ورمانشىلاردىڭ جالاقىسى 40 پايىزعا وسكەنىن دە ايتا كەتۋ كەرەك. سونداي-اق وڭىردەگى بارلىق ورمان شارۋاشىلىعىنىڭ ماتەريالدىق-تەحنيكالىق قۋاتىن ارتتىرۋ ماسەلەسى قولعا الىنا باستادى. ماسەلەن, ورتەنگەن ورماندى قالپىنا كەلتىرۋ جۇمىستارىمەن اينالىسىپ جاتقان نەگىزگى مەكەمەلەر – اۋليەكول جانە باسامان ورمان شارۋاشىلىقتارى تاياۋدا عانا قوستانايدا قۇراستىرىلعان سۋ جاڭا 14 «بەلورۋس» جانە «Lovol» تراكتورلارىن الدى.
– اۋليەكول اۋدانىندا قار تۇسكەنگە دەيىن 60 گەكتاردان استام القاپتا 10 مىڭ تەكشە مەترگە جۋىق كۇيگەن اعاش وتالىپ, تازارتۋ جۇمىستارى جالعاسادى. كەسىلگەن اعاش سۇرىپتالىپ, ساۋداعا شىعارىلادى. ودان تۇسكەن قارجى ورماندى قالپىنا كەلتىرۋگە جۇمسالادى. ورتەنگەن ورماننىڭ اۋماعىن انىقتاۋعا 100 ادام جۇمىلدىرىلدى. ال اعاشتى قۇلاتۋ, بۇتاعىن تازالاپ, كۇيگەن قابىعىن ارشۋ سياقتى شارۋانى 63 ادام اتقارىپ جاتىر. وسى كۇزدە جوسپارلانعان 25 مىڭ ءتۇپ كوشەتتىڭ كوبى وتىرعىزىلدى. كۇن سايىن ءار ءتۇرلى مەكەمەلەردىڭ جۇمىسشىلارى, ۆولونتەر جاستار كەلىپ كومەكتەسىپ جاتىر. ءورت شالعان وراسان اۋماقتى بەلگىلەنگەن مەرزىمدە قالپىنا كەلتىرەمىز دەپ ويلايمىن. بۇل ماقساتتاعى جۇمىس ءبىر كۇن دە باسەڭدەمەيدى. ويتكەنى ورمان – ورتاق بايلىعىمىز. ونى كۇتىپ-باپتاپ, ماپەلەپ-ساقتاپ وتىرۋ جالپىعا ورتاق پارىزىمىز, – دەيدى وبلىستىق تابيعي رەسۋرستار جانە تابيعات پايدالانۋدى رەتتەۋ باسقارماسى باسشىسىنىڭ ورىنباسارى ديماش قوجابەكوۆ.
كوپ بولىپ جۇمىلا كىرىسكەن شاراپاتتى ىسكە وبلىستىق سىبايلاس جەمقورلىققا قارسى ءىس-قيمىل دەپارتامەنتىنىڭ قىزمەتكەرلەرى دە ۇلەس قوسىپ, 50-گە جۋىق قىلقان جاپىراقتى اعاش كوشەتتەرىن وتىرعىزىپ قايتتى.
– امانقاراعاي ءورتى ەشكىمدى بەي-جاي قالدىرعان جوق. بۇكىل ەل بولىپ كومەكتەسكەنىن كوردىك. بۇگىن دە قانشاما ادام ءجۇر. ارينە, تابيعي اپات ايتىپ كەلمەيدى. مۇنداي قيىن جاعدايعا تاپ بولعان ورمانعا اعاش وتىرعىزۋ ءاربىر ازاماتتىڭ قاسيەتتى بورىشى. سوندىقتان ونسىز دا قاۋىرت جۇمىسىمىزدى جارتى كۇنگە بولسا دا كەيىن ىسىرىپ قويىپ, ءوز ۇلەسىمىزدى قوسۋعا كەلدىك, – دەيدى انتيكور قىزمەتىنىڭ ءباسپاسوز حاتشىسى ەۆگەني بەدىچ.
بۇگىندە اقمولا وبلىسىنداعى تالىمباقتاردان 30 مىڭ ءتۇپ قاراعاي كوشەتى ساتىپ الىنعان.
– مۇنىڭ ءبارى «قايىرىمدىلىق KZ» قورىنا جينالعان قاراجاتقا ساتىپ الىندى. حالىق ءبىر كىسىدەي جۇمىلىپ, قولدان كەلگەنشە كومەكتەسىپ جاتىر. بۇگىندە ءۇيسىز قالعان حالىقتىڭ جاعدايىن جاساپ بولدىق. ەندى قالعان قارجىنى اعاش ەگۋ جۇمىستارىنا جۇمسايمىز. بۇل – وتە ساۋاپتى ءىس. ەلدىڭ ەلدىگى وسىندايدا كورىنەدى. ارينە, ءبىر كۇندە قالپىنا كەلەتىن دۇنيە ەمەس, قانشاما جىل كەرەك. سونىڭ العاشقى قادامىن جاساعانىمىزعا قۋانىشتىمىن. الداعى بولاشاق ۇرپاق ءۇشىن جۇمىس ىستەپ جاتىرمىز دەپ ويلايمىن, – دەيدى وبلىستىق ارداگەرلەر كەڭەسىنىڭ توراعاسى باتىربەك احمەتوۆ.
مامانداردىڭ ايتۋىنشا, ورتەنگەن ورماننىڭ ورنىن تولىق تازالاپ, تاقىرعا تال ەگىپ, كوشەت وتىرعىزىپ شىعۋ ءۇشىن ون جىلداي ۋاقىت قاجەت.
قوستاناي وبلىسى
