پونتەۆەدرادا بۇيىرعان ءتورت جۇلدە

بوزكىلەمگە شىققان قازاقستاننىڭ 10 گرەك-ريم كۇرەسى شەبەرىنىڭ تەك بىرەۋى عانا جۇلدە الدى. 60 كيلو سالماق دارە­جەسىندە كۇش سىناسقان ولجاس سۇلتان تۇساۋكەسەر كەزدەسۋىندە ازەربايجاندىق ني­­حات مامماداليدەن (0:5) ۇتىلدى. قاپ تاۋىنىڭ قىرانى فينالعا شىعىپ, سو­نىڭ ارقاسىندا قانداسىمىز جۇبانىش بەل­دەسۋلەرىنە قاتىستى. ءوز مۇمكىندىگىن ولجاس قالت جىبەرگەن جوق. ۇندىستاندىق سۋميت سۋميت (8:0), ۋكراينالىق ۆلاديسلاۆ كۋجكو (6:5) جانە قىرعىزستاندىق نۋر­مۋحاممبەت ابدۋللاەۆتى (8:0) جەڭ­گەن ول قولا مەدالدى موينىنا ءىلدى. وكى­نىشكە قاراي, وزگە «كلاسسيكتەرىمىز» سەنىم ۇدەسىنەن شىعا المادى. باسقا توعىز با­لۋاننىڭ اراسىنان جەڭىس تۇعىرىنا ماقسات سايلاۋ عانا جاقىنداي الدى. 87 كيلو سالماقتا سىنعا تۇسكەن ول باستاپقى بەلدەسۋلەرىندە ۇندىستاندىق كۋمار سۋنيل (4:0) مەن يراندىق ابولفازي ءالي ءشوۋبانيدى (9:4) ۇتقانىمەن, جارتىلاي فينالدا ارمەنيالىق گەۆورگ تادەۆوسياننان (4:6) ايلاسىن اسىرا المادى. ال قولا مەدال ءۇشىن تارتىستا نيدەرلاندتىق مارسەل ستەركەنبۋرگتەن (1:9) جەڭىلگەن ماقسات بەسىنشى ورىندا قالىپ قويدى.

وزگە بالۋاندارىمىز جايىندا ايتار بولساق, شيرەك فينالدا ۇندىستاندىق پويا سوۋلات داد مارزعا ەسە جىبەرگەن نۇرسات قابدىراحىموۆ (50 كيلو) جۇبانىش بەلدەسۋىندە تۇركيالىق احمەد ەكرەم تاس­قىنوعلىنىڭ وسال تۇسىن تابا المادى. سول سەكىلدى راسۋل ءجۇنىس تە (76 كيلو) ءدال سول مەجەدە ءسۇرىندى. ونىڭ دا ءۇندى ەلىنىڭ وكىلى ساجان ساجانعا ءالى جەتپەدى. ال ەر­جان جارىلقاسىن (63 كيلو), الماتبەك امانبەك (67 كيلو), تەمىرحان بايعانين (82 كيلو), يسلام ۋماەۆ (97 كيلو) جانە دامير زۋپاروۆ (130 كيلو) تۇساۋكەسەر كەزدە­سۋلەرىندە جەڭىلىستىڭ كەرمەك ءدامىن تاتسا, ەراسىل نۇربوسىنوۆ (72 كيلو) ەكىنشى اينالىمنان اسا المادى.

پيرەنەي تۇبەگىندە يراننىڭ گرەك-ريم كۇرەسى شەبەرلەرى وتە جاقسى ناتيجە كورسەتتى. پارسى ەلى پەحلەۆاندارى اراسىندا يمان حوسسەين موحاممادي (63 كيلو) مەن سايەد دانيال سوحرابيگە (67 كيلو) تەڭ كەلەر ەشكىم تابىلمادى. ەكەۋى دە فينالدا ءوز قارسىلاستارىن ايقىن باسىمدىقپەن ۇتتى. ناتيجەسىندە, 2 التىن مەن 3 قولا مەدالدى قورجىنعا سالعان يراندىقتار جال­پى­كوماندالىق ەسەپتە كوش باستادى. ماجارستاننان كەلگەن جىگىتتەردىڭ دە قارقىنى كۇشتى بولدى. ولار 2 التىن مەن 1 كۇمىس ەنشىلەپ, ەكىنشى ساتىعا جايعاستى. ۇزدىك ۇشتىكتى ازەربايجان قۇراماسى تۇيىن­دەدى. ولار 1 التىن مەن 2 كۇمىس ەنشىلەدى.

گرەك-ريم كۇرەسىنەن الەم چەمپيو­نا­تىنىڭ جەڭىمپازدارى مەن جۇلدە­گەرلەرى

55 كيلو: 1. پويا سوۋلات داد مارز ء(ۇندىس­تان), 2. نيحاد گۋلۋزادە (ازەرباي­جان), 3. احمەد ەكرەم تاسقىنوعلى (تۇر­كيا) مەن گەورگي توكحادزە (گرۋزيا). 60 كيلو: 1. كەرەم كامال (تۇركيا), 2. نيحاد زاحيد مامادلي (ازەربايجان), 3. ولجاس سۇل­تان (قازاقستان) مەن مەلكامۋ فەتەنە (يزرايل). 63 كيلو: 1. يمان حوسسەين موحام­مادي (يران), 2. گەورگي شوتادزە (گرۋزيا), 3. ريۋتا يكەدا (جاپونيا) مەن گراچيا پوگوسيان (ارمەنيا). 67 كيلو: 1. سايەد دانيال سوحرابي (يران), 2. گا­گيك ميحاي سنجويان (فرانتسيا), 3. ديەگو چحيۆادزە (گرۋزيا) مەن كيوتارو سوگابە (جاپونيا). 72 كيلو: 1. گۋربان گۋربانوۆ (ازەربايجان), 2. پاۆەل پۋكلاۆەتس (حورۆاتيا), 3. ۆيكاس ۆيكاس ء(ۇندىستان) پەن امير ءالي ابدي (يران). 77 كيلو: 1. مالحاس امويان (ارمەنيا), 2. الەكساندر گۋتۋ (مولدوۆا), 3. ساجان ساجان ء(ۇندىستان) مەن ناو كۋساكا (جاپونيا). 82 كيلو: 1. ەكساۋز مۋكۋبۋ (نورۆەگيا), 2. كارل كودريچ (حورۆاتيا), 3. ماتس ولا لۋكاس احلگرەن (شۆەتسيا) مەن بەكا گۋرۋلي (گرۋزيا). 87 كيلو: 1. يشتۆان تاكاش (ماجارستان), 2. گەۆورگ تادەۆوسيان (ارمەنيا), 3. شيمون شيمونوۆيچ (پولشا) مەن مارسەل ستەركەنبۋرگ (نيدەرلاند) 97 كيلو: 1. الەكس شوكە (ماجارستان), 2. ماركۋس راگگينگەر (اۋستريا), 3. ءالي ابەديدارزي (يران) مەن نيتەش نيتەش ء(ۇندىستان). 130 كيلو: 1. فاتيز بوزكۋرت (تۇركيا), 2. ميحايل ۆيشنەۆەتسكي (ۋكراينا), 3. داريۋش اتتيلا ۆيتەك (ماجارستان) مەن الياكبار حوسسەين يۋسۋفيحامادشالي (يران).

ايەلدەر كۇرەسىنەن وتكەن جارىستا جا­پونيا قۇراماسى وتە كەرەمەت كور­سەت­كىشكە قول جەتكىزدى. ولار ساراپقا سا­لىن­عان 10 التىننىڭ جەتەۋىن جەڭىپ الدى. ودان بولەك, 1 كۇمىس پەن 2 قولانى يەلەندى. وسىلايشا, يسپانياعا ساپار شەككەن كۇنشىعىس ەلى بۇرىمدىلارىنىڭ بارلىعى دا جەڭىس تۇ­عىرىنا كوتەرىلدى. ەڭ عاجابى, التىن تۇ­عىرعا كوتەرىلگەن بالۋان­دار اراسىنان توكيو وليمپياداسىنىڭ جەڭىمپازى, الەمنىڭ ءۇش دۇركىن چەمپيونى يۋي سۋساكي (50 كيلو), جاستار اراسىنداعى الەم بىرىنشىلىگىنىڭ جەڭىمپازى موە كيوكا (55 كيلو) جانە الەم چەمپيونى نونوكا وزاكي (62 كيلو) بارلىق قارسىلاسىن ايقىن باسىمدىقپەن ۇتتى. تالاي ءىرى دۇرمەكتە ىسىلعان ساە نانجو (57 كيلو) قارسىلاستارىنا سوقىر ۇپاي دا ۇستاتپادى. ەكى دۇركىن الەم چەمپيونى حارۋنو وكۋنو (53 كيلو) مەن الەم چەمپيونى ميۆا موري­كاۆانىڭ (65 كيلو) دا ۇستەمدىگى ەش كۇمان تۋعىزعان جوق. تەك 59 كيلو سالماق دارەجەسىندە كۇرەسكەن حيمەكا توكۋ­حاراعا كوزدەگەن ماقساتىنا قول جەتكىزۋ ءۇشىن ءبىراز تەر توگۋىنە تۋرا كەلدى. تۇساۋكەسەر كەز­دەسۋىن ول تازا ۇتقانىمەن, ودان كەيىنگى بەل­دەسۋلەرىندە 6:1, 4:2 جانە 3:2 ەسەپتەرى تىركەلدى.

جاپونداردان كەيىنگى ورىنداردى اقش (1 التىن+1 كۇمىس+2 قولا), تۇركيا (1+0+2) جانە كولۋمبيا (1+0+0) يەلەندى. وسى ورايدا امەريكالىقتارعا جالعىز التىندى سىيلاعان اميت ەلورعا جەكە توقتالا كەتسەك, ەش ايىبى جوق دەپ ويلايمىز. سوڭعى ەكى جىل ىشىندە ول وراسان تابىسقا قول جەتكىزدى. تارقاتىپ ايتساق, بۋداپەشت, ءوفو جانە سوفيادا ۇيىمداستىرىلعان جاسوسپىرىمدەر مەن جاستار اراسىنداعى الەم بىرىنشىلىكتەرىندە قارسىلاس شاق كەلتىر­مەدى. بيىل بەل­گرادتاعى ەرەسەكتەردىڭ دۇنيەجۇزىلىك دوداسىندا دارا شىقتى. سول جارىستىڭ فينالىندا ەرول ءبىزدىڭ ءجاميلا باق­بەرگەنوۆانى ايقىن باسىمدىقپەن ۇتقان ەدى. يسپانياداعى جارىستا دا 18 جاستاعى اقش-تىڭ ارۋىنا ەشكىم جارىتىپ قارسىلىق كورسەتە العان جوق. اميت بارلىق باسەكەدە تازا جەڭىسكە جەتتى. سونداي-اق پولشا مەن ۋكراينانىڭ بۇرىمدىلارى دا پونتەۆەدرادا تابىستى ونەر كورسەتتى. ولارعا باس جۇلدە بۇيىرماعانىمەن, پولياكتار 3 كۇمىس السا, ۋكراينالىقتار 1 كۇمىس پەن 5 قولانى قورجىنعا سالدى.

اتالعان جارىستا قازاق قىزدارىنا جۇلدە بۇيىرمادى. تەك ەكى بالۋاننىڭ جەڭىس تۇعىرىنا كوتەرىلۋىنە مۇمكىندىگى بولدى. جارىستى بىردەن شيرەك فينال­دان باستاعان 57 كيلو سالماقتاعى لاۋرا الماعان­بە­توۆا العاشىندا بولگا­ريا­­لىق سەزەن بەل­بەروۆادان (9:2) باسىم تۇسكەنىمەن, ىلە-شالا پولشالىق پاتريتسيا گيلگە (1:5) جول بەردى. ال قولا مەدال ءۇشىن تارتىستا امەريكالىق الەك­­ساندرا حەدريكتەن (2:13) ويسىراي ۇتىلدى. 65 كيلو سالماقتاعى داريعا ابەن باستاپقى باسەكەدە نيگار ميرزازادادان (0:3) جەڭىلدى. ودان كەيىن يسپانيالىق نەرەا بالانكودان (6:4) باسىم ءتۇستى. ءۇشىنشى ورىن ءۇشىن باسەكەدە ول يتاليالىق ەلەنا ەسپوزيتومەن كۇش سىناستى. بۇل ايقاس 5:5 ەسەبىمەن اياقتالدى. الايدا قوسىمشا كورسەتكىشتەر بويىنشا اپە­ننين تۇبەگىنەن كەلگەن سپورتشىنىڭ باعى جاندى. ءسويتىپ, لاۋرا مەن داريعا بەسىنشى ورىندى قاناعات تۇتتى.

ايەلدەر كۇرەسىنەن الەم چەمپيو­نا­تىنىڭ جەڭىمپازدارى مەن جۇلدە­گەرلەرى

50 كيلو: 1. يۋي سۋساكي (جاپونيا), 2. انكۋش انكۋش ء(ۇندىستان), 3. نادا مەداني موحامەد (مىسىر) پەن سارا حامدي (تۋنيس). 53 كيلو: 1. حارۋنو وكۋنو (جاپونيا), 2. ليۋسيا ياەپەز گۋزمان (ەكۆادور), 3. اناس­تاسيا بلايۆاز (گەرمانيا) بەن زەيپەپ يەتگيۋل (تۇركيا). 55 كيلو: 1. موە كيۋوكا (جا­پونيا), 2. ميحاەلا سامويل (مولدوۆا), 3. اليشا سۋە حوۆك (اقش) پەن ەلۆيرا كامالوعلى (تۇركيا). 57 كيلو: 1. ساە ناندزە (جاپونيا), 2. پاتريتسيا گيل (پول­شا), 3. الەكساندرا حەدريك (اقش) پەن الينا اكوبيا (ۋكراينا). 59 كيلو: 1. حيمەكا توكۋحارا (جاپونيا), 2. ماگدالەنا گلودەك (پولشا), 3. سولوميا ۆىننىك (ۋكراينا) پەن مانسي مانسي ء(ۇندىستان). 62 كيلو: 1. نونوكا ودزاكي (جاپونيا), 2. يرينا بوندار (ۋكراينا), 3. استريت مانتەرو شيرينوس (ۆەنەسۋەلا) پەن انا گودينەز گونزالەس (كانادا). 65 كيلو: 1. ميۆا موريكاۆا (جاپونيا), 2. نيگار ميرزازادا (ازەربايجان), 3. كاتەرينا زەلەنيۋك (ۋكراينا) پەن ەلەنا ەسپوزيتو (يتاليا). 68 كيلو: 1. نەسين باس (تۇركيا), 2. نارۋنا ماتسۋيۋكي (جاپونيا), 3. يرينا رىنگاچ (مولدوۆا) پەن مانولا سكوبەلسكا (ۋكراينا). 72 كيلو: 1. اميت ەلور (اقش), 2. ۆيكتوريا شولۋج (پولشا), 3. سۋميرە نيكۋرا (جاپونيا) مەن كەندرا اۋگۋستينا داشەر (فرانتسيا). 76 كيلو: 1. تاتيانا رەنتەريا (كولۋمبيا), 2. ديموند گۋيلفورد (اقش), 3. اناستاسيا الپيەۆا (ۋكراينا) مەن يۋسۋحا ماتسۋيۋكي (جاپونيا).

ەركىن كۇرەستەن قازاقستاننىڭ ۇلتتىق قۇراما كومانداسى ساپىندا جۇرگەن بىر­نەشە بەدەلدى بالۋان بۇل جولى جاستار ارا­سىنداعى الەم بىرىنشىلىگىندە ەل نامىسىن قورعادى. سولاردىڭ اراسىنان ءبىز ادلان اسقاروۆ (65 كيلو), تالعات سىرباز (70 كيلو) جانە الىشەر ەرعاليعا (125 كيلو) ايرىقشا ءۇمىت ارتتىق. ۇشەۋىنىڭ دە حالىقارالىق ارەنادا جيعان مول تاجىريبەسى بار. ولار – جاس بولسا دا ءوز سالماق دارەجەلەرى بويىنشا ەلىمىزدىڭ ءبىرىنشى ءنومىرلى بالۋان­دارى. دەسەك تە جەر-جاھاننىڭ ءار قيىرىنان جينالعان جاس جولبارىستاردىڭ جارىسىندا ءبارىنىڭ بىردەي باعى جانبادى. باس­تاپقىدا يراندىق اميرموحامماد باباك يازدانيشەراتيگە (5:15) ەسە جىبەرگەن تالعات سىرباز جۇبانىش بەلدەسۋىندە جاپو­نيالىق كوتا تاكاحاسيگە (1:3) جول بەردى. مولدوۆالىق كونستانتين شيريلوۆ (11:0), فيليپيندىك دجو فەر كاللادو (10:0) جانە امەريكالىق كولە رەەد ماتتەۋستى (6:4) ۇتقان ادلان اسقاروۆ جارتىلاي فينالدا ارمەنيالىق ۆازگەن تەۆانيانعا (6:7) ءبىر عانا ۇپاي ايىرماشىلىعىمەن ەسە جىبەردى. ال ءۇشىنشى ورىن ءۇشىن باسەكە 7:7 ەسەبىمەن تەڭ اياقتالدى. دەسەك تە جەڭىس سوڭعى ءادىستى جاساعان جاپونيالىق ريوما انراكۋدىڭ ەنشىسىنە جازىلدى.

الىشەر ەرعاليدىڭ دا ءجۇرىپ وتكەن جولى وڭاي بولمادى. ول تۇرىكمەن زيامۋ­حاممەت ساپاروۆ (10:0) پەن ازەر­بايجان ۆاحيت گالاەۆتى (5:4) سان سوقتىر­عانىمەن, جارتىلاي فينالدا يران­دىق اميررەزا ماسوۋمي ءۆالاديدى (3:6) جىعا المادى. ودان كەيىن ميلان اندراس كورچسوگتى (6:1) قاپى قال­دىرعان الىشەر قولا مەدالدى موينىن­دا جار­قىراتتى. 61 كيلو سالماقتاعى اسىل ايتاقىن دا ءدال سول مەجەدەن كورىندى. العاشقى اينالىمدا جاستار اراسىنداعى الەم بىرىنشىلىگىنىڭ كۇمىس جۇلدەگەرى, ازيا چەمپيونى يراندىق ارمين مەحدي حابيبزادەحسەرۋولايدتان (9:1) ايلاسىن اسىرسا, كەلەسى كەزەڭدە ارمەنيالىق ارسەن حارۋتۋنياننان (3:9) جەڭىلدى. ودان كەيىن پۋەرتوريكالىق دجوزەف ادرەاس سيلۆا (6:1) مەن گرۋزيالىق راماز تۋرمانيدزەنىڭ (12:4) تاس-تالقانىن شىعارىپ, جەڭىس تۇعىرىنا كوتەرىلدى.

پيرەنەي تۇبەگىندە داۋلەت ەرگەش ەرلەدى. 79 كيلو سالماقتا كۇش سىناسقان قانداسىمىز پۋەرتوريكولىق توني فرەنسيس نەگرون (10:0), ۋكراينالىق ۆالەنتين بابي (8:1) جانە امەريكالىق كارتەر ءستاروسسيدى (8:7) سان سوقتىرىپ, فينالدا ەۋروپا چەمپيوناتىنىڭ قولا جۇلدەگەرى, گرۋزيالىق ۆلاديمير گامكرەليدزەمەن ايقاستى. وتە شيەلەنىستى وتكەن باسەكەدە 3:5 ەسەبىمەن ەسە جىبەرگەن داۋلەت كۇمىس مەدال يەلەندى.

ماقسات ساتىبالدى (86 كيلو) مەن ريزابەك ايتمۇحاننىڭ (92 كيلو) دا جۇل­دەگەرلەر قاتارىنان كورىنۋلەرىنە مۇمكىن­دىكتەرى بولدى. بىراق ءۇشىنشى ورىن ءۇشىن تارتىستا ولار ءوز قارسىلاستارىنا جول بەردى. ماقسات مولدوۆالىق يۆان يچيزليدەن (3:4), ريزابەك تۇركيالىق فايزوللا اقتۇرىكتەن (3:14) ۇتىلدى. ال داۋلەت تەمىرجانوۆ (57 كيلو), ەرحان بەكسۇلتانوۆ (74 كيلو) جانە يۋنۋس گا­فۋروۆ (97 كيلو) ءۇشىن بۇل ساپار ءساتسىز اياقتالدى.

اتالعان جارىستا سان مىڭ كورەرمەن امان اماننىڭ اسقان شەبەرلىگىنە قۇل­شىنا قول سوقتى. اسا جەڭىل سالماقتا بەلدەسكەن ءۇندى سپورتشىسى بيىل جازدا الما­تىدا وتكەن بولات تۇرلىحانوۆتىڭ كۋبوگى جولىنداعى رەيتينگتىك جارىستا بارلىق قارسىلاسىن ويسىراتا ۇتىپ, جەڭىس تۇعىرىنىڭ ەڭ بيىك ساتىسىنا كوتەرىلگەن ەدى. سول كەزدە بالۋان شولاق اتىنداعى سپورت سارايىنا جينالعان ءدۇيىم جۇرت نەبارى 16 جاستاعى جاس ورەننىڭ ايشىقتى ونەرىنە تامسانعان-تىن. بۇل جولى دا امان قارسىلاستارىن الىپ تا, شالىپ تا جىعىپ, سان ميلليون كورەرمەننىڭ قوشەمەتىنە بولەندى. وزگە بەلدەسۋلەرىن ايتپاعاندا, فينالدا وزىنەن جەتى جاس ۇلكەن تۇركيانىڭ تارلانى احمەت دۋماننىڭ ءوزىن 12:4 ەسەبىمەن ويسىراتا ۇتتى. مىنە, «شىن مىقتىعا تۇساۋ جوق» دەگەن وسى شىعار.

70 كيلو سالماق دارەجەسىندەگى امير­موحامماد باباك يازدانيشەراتيگە دە جۇرتتىڭ ىقىلاسى ەرەكشە بولدى. ەستە­رىڭىزدە بولار, قىركۇيەك ايىندا بەلگرادتا وتكەن ەرەسەكتەردىڭ الەم چەمپيوناتىنىڭ تۇساۋكەسەر كەز­دەسۋىندە بۇل بالۋان دجوشۋا ستيۋارت فەنەسيلۆەرمەن بەلدەسۋگە ءتيىس ەدى. الايدا يران بيلىگى ءوز ورەندەرىنە ءيزرايلدىڭ وكىلدەرىمەن كۇش سىناسۋعا تىيىم سالعان. ەگەر ول تالاپ ورىندالماسا, تەك سپورتشى عانا ەمەس, باپكەرلەرى مەن بۇكىل دەلەگاتسيا مۇشەلەرى دە قاتاڭ جازالانادى. سونى قاپەرگە العان يازدانيشەراتي بوزكىلەمگە شىعۋدان باس تارتقان ەدى. وسىلايشا, بىلتىر وسلودا كۇمىس العان بالۋان سوقىر ساياساتتىڭ سالدارىنان بەلگرادتا جۇلدەلى ورىندار ءۇشىن تالاسۋ مۇمكىندىگىنەن ايىرىلدى. پونتەۆەدرادا اميرموحامماد كەڭىنەن كوسىلدى. ول ءبىز­دىڭ تالعان سىرباز, جاپونيالىق كوتا تاكا­حاشي جانە امەريكالىق ياحيا توماشتى تىزە بۇكتىرىپ, اقتىق سىنعا دەيىن القىنباي جەتتى. بىراق فينالدا پارسى ەلى پەحلەۆانى گەورگي ەلباكيدزەگە ءالى جەتپەدى.

ەركىن كۇرەستەن وتكەن جارىستىڭ جالپى ەسەبىندە دە يران قۇراماسى كوش باس­تادى. پارسى ەلىنىڭ وكىلدەرى 4 التىن مەن 1 كۇمىستى قورجىنعا سالدى. ەكىنشى جانە ءۇشىنشى ورىنداردى گرۋزيا (2+0+2) مەن ارمەنيا (2+0+1) قۇرامالارى ءوزارا ءبولىس­تى. ءتورتىنشى ساتىعا جاپونيا (1+0+2) جاي­عاس­سا, بەسىنشى ورىن ۇندىستانعا (1+0+0) بۇيى­دى.

ەركىن كۇرەستەن الەم چەمپيونا­تىنىڭ جەڭىمپازدارى مەن جۇلدەگەرلەرى

57 كيلو: 1. امان امان ء(ۇندىستان), 2. احمەت دۋمان (تۇركيا), 3. بەكزات الماز ۇلى (قىرعىزستان) مەن كاميل كەريموۆ (ۋكراينا). 61 كيلو: 1. ارسەن حارۋتۋنيان (ارمەنيا), 2. تايىربەك جۇماشبەك ۇلى (قىرعىزستان), 3. ەمراح ورمانوعلى (تۇركيا) مەن اسىل ايتاقىن (قازاقستان). 65 كيلو: 1. ۆازگەن تەۆانيان (ارمەنيا), 2. حامزا الاسا (تۇركيا), 3. ريوما انراكۋ (جاپونيا) مەن ەريك ارۋشانيان (ۋكراينا). 70 كيلو: 1. گەورگي ەلباكيدزە (گرۋزيا), 2. اميرموحامماد باباك يازدانيشەراتي (يران), 3. كوتا تاكاحاسي (جاپونيا) مەن كانان حەيباتوۆ (ازەربايجان). 74 كيلو: 1. موحاممادسادەح بيگلار فيروۋزپاۋرباندپەي (يران), 2. حادجيمۋراد گادجيەۆ (ازەربايجان), 3. ۆاسيلي دياكون (مولدوۆا) مەن ۆاديم كيريلەنكو (ۋكراينا). 79 كيلو: 1. ۆلاديمير گامكرەليدزە (گرۋزيا), 2. داۋلەت ەرگەش (قازاقستان), 3. كارتەر ستاروسسي (اقش) پەن ارمان اگاۆيان (ارمەنيا). 86 كيلو: 1. تاتتسۋيا شيراي (جاپونيا), 2. ترەنت حيدلاي (اقش), 3. ەمرە چيفتچي (تۇركيا) مەن يۆان يچيزلي (مولدوۆا). 92 كيلو: 1. اميرحوسسەين بيگلار فيروۋزپاۋرباندپەي (يران), 2. ياكوب توماس كاردەناس (اقش), 3. ميراني مايسۋرازدە (گرۋزيا) مەن فايزوللا اقتۇرىك (تۇركيا). 97 كيلو: 1. امرالي حاميد ازارپيرا (يران), 2. تاننەر سلوان (اقش), 3. ۆاسيلي سوۆا (ۋكراينا) مەن يسلام يلياسوۆ (ازەربايجان). 125 كيلو: 1. اميرەزا فاردين ماسوۋمي ۆالادي (يران), 2. سولومون ماناشۆيلي (گرۋزيا), 3. ەنتوني كاسسيوپي (اقش) پەن الىشەر ەرعالي (قازاقستان).