ۇمىتكەر ەڭ اۋەلى احمەت بايتۇرسىن ۇلى اتىنداعى قوستاناي وڭىرلىك ۋنيۆەرسيتەتىنە باردى. ستۋدەنتتەر جانە وقىتۋشىلارمەن كەزدەسۋ بارىسىندا جاس مامانداردى جۇمىسقا ورنالاستىرۋ, جالاقى جانە ونى يندەكستەۋ ماسەلەلەرى كوتەرىلدى.
«ارينە, ءبىز ارقاشان جاستاردىڭ جۇمىسى مەن جاقسى جالاقىسى بولعانىن قالايمىز. الايدا مۇنداي ماسەلە تەك ءبىر جىل ىشىندە تەز شەشىلە قويمايدى. سەبەبى, بۇگىنگى تاڭدا جىلدار بويى قوردالانىپ قالعان, وزەكتى ماسەلەلەردىڭ بىرىنە اينالعان. بارلىعى ەڭ تومەنگى جالاقى مولشەرىنەن باستالادى, ياعني بۇل اتالعان پروبلەمانىڭ نەگىزى بولىپ وتىر. بيىلعى جىلى بۇل كورسەتكىش 60 مىڭ تەڭگەنى قۇرادى. 2023 جىلدىڭ 1 قاڭتارىنان باستاپ ول 70 مىڭ تەڭگەنى قۇراماق. ءبىزدىڭ ويىمىزشا, ول 70 مىڭ ەمەس, 150 مىڭ تەڭگەدەن استام بولۋى كەرەك. دامىعان ەلدەردە جالاقىنىڭ ەڭ تومەنگى مولشەرى 717 مىڭ تەڭگەنى قۇراپ وتىر, ياعني كورگەندەرىڭىزدەي ايىرماشىلىق 10 ەسە», دەدى كانديدات. ۇمىتكەر لايىقتى ءومىر لايىقتى جالاقىدان باستالاتىنىن اتاپ ءوتتى.
بۇدان كەيىن مەيرام قاجىكەن قوستانايداعى سايلاۋالدى شتاب جۇمىسىمەن تانىستى. ۇگىت-ناسيحات جۇمىستارى قازاننىڭ 21-ىنەن باستالعان. شتاب مۇشەلەرىنە سايلاۋالدى ۇگىت-ناسيحات جۇمىستارىن جۇرگىزۋگە 15 ەرىكتى كومەكتەسۋدە. م.قاجىكەن اتقارىلعان جۇمىس ناتيجەلەرىنە وڭ باعا بەردى.
