24 مامىر. ليسسابون. «ەشتاديۋ دا لۋج» ستاديونى. 60976 كورەرمەن.
تورەشى: بورن كەيپەرس (گوللانديا).
«رەال» (مادريد) – «اتلەتيكو» (مادريد) 4:1 (0:1).
«رەال»: يكەر كاسيلياس, دانيەل كارۆاحال, سەرحيو راموس, رافاەل ۆاران, فابيۋ كوەنتراۋ (مارسەلو, 59), لۋكا مودريچ, سامي حەديرا (يسكو, 59), انحەل دي ماريا, گارەت بەيل, كاريم بەنزەما (الۆارو موراتا, 79), كريشتيانۋ رونالدۋ.
«اتلەتيكو»: تيبو كۋرتۋا, حۋانفران, جواو ميراندا, ديەگو گودين, فەليپە (توبي الدەرۆەيرەنلد, 83), راۋل گارسيا (حوسە ەرنەستو سوسا, 66), تياگۋ مەندەش, گابي, كوكە, داۆيد ۆيليا, ديەگو كوستا (ادريان, 9).
گولدار: ديەگو گودين (36), سەرحيو راموس (90+3), گارەت بەيل (110), مارسەلو (118), كريشتيانۋ رونالدۋ (120-پەنالتي).
ەسكەرتۋ: راموس سەرحيو (27), سامي حەديرا (45+1), مارسەلو (118), رافاەل ۆاران (120+3), كريشتيانۋ رونالدۋ (120+1) – رۋال گارسيا (27), جواو ميراندا (53), داۆيد ۆيليا (72), حۋانفران (74), كوكە (86), گابي (100), ديەگو گودين (120).
كەشە, مامىردىڭ 24-ءى كۇنى تۇندە پورتۋگاليا استاناسى – ليسسابون قالاسىندا يسپان ەلىنىڭ باس قالاسى – ءمادريدتىڭ «رەال» جانە «اتلەتيكو» كوماندالارى چەمپيوندار ليگاسى فينالىندا كەزدەسىپ, ويىن 4:1 ەسەبىمەن بۇلاردىڭ الدىڭعىسىنىڭ پايداسىنا شەشىلدى. بۇل تۋرالى ras.kz حابارلادى.
فينالدىق ويىنعا عانا لايىقتى ناعىز فانتاستيكالىق ماتچ بولدى بۇل! بالكي, ول فۋتبول ويىنى ساپاسى تۇرعىسىنان قاراعاندا, اسا كورنەكتى بولىپ شىقپاعان دا شىعار. بىراق جۇرت ونى قىزىقتاي وتىرىپ, بۋىرقانىپ اتىلعان سەزىمدەردى, كوڭىل-كۇيدىڭ ەرەكشە بۇلقىنىسىن, شيەلەنىسكەن سيۋجەتتەردى كوردى. فۋتبول, مىنە, وسىنىسىمەن دە قىمبات, وسىنىسىمەن دە قىزىقتى!
سەرىك ءپىرنازار.
ويىنعا كىرىسپە
چەمپيوندار ليگاسى , البەتتە, ەۋروپانىڭ كلۋبتىق دەڭگەيدەگى فۋتبولىنىڭ شىڭى بولىپ تابىلادى. كارى قۇرلىقتا, ءسىرا, ونىڭ شىڭىنا شىعۋدى ارماندامايتىن بىردە-ءبىر كوماندا دا, جالعىز-جارىم فۋتبولشى دا جوق. ال بيىل ەكىنشى جىل قاتارىنان سول اسۋدى الۋعا ءبىر ەلدىڭ ەكى بىردەي ۇجىمى تالاسا-تارماسا ۇمتىلدى. بىلتىر عانا لوندونداعى اتاقتى «ۋەمبلي» ستاديونىنىڭ تورىندە نەمىستىڭ ەكى جاماعاتى – ميۋنحەننىڭ «باۆارياسى» مەن دورتمۋندتىڭ «بورۋسسياسى» شايقاسقان بولاتىن. ەندى سول كەپتى يسپانيانىڭ ءبىر قالاسىنىڭ – ءمادريدتىڭ ەكى كلۋبى – «رەال» مەن «اتلەتيكو» كيدى. بۇل – اتالمىش تۋرنير تاريحىندا ءبىر قالانىڭ ەكى كومانداسى باس بايگەنى ساراپقا سالعان فينالدا ءبىرىنشى رەت توقايلاسۋى!
ارينە, «رەالدىڭ» قۇرلىق تۋرنيرىندەگى تاجىريبەسى دە, اتاعى دا قارسىلاسىنا قاراعاندا, اناعۇرلىم ارتىق. سوڭعى كەزەڭدەرى ول 2000 جىلى فينالدا يسپاننىڭ تاعى ءبىر كومانداسى – «ۆالەنسيانى» 3:0 ەتىپ ۇتتى. ارادا ەكى جىل وتكەندە «سارىمايلار» نەمىستىڭ لەۆەركۋزەنىنىڭ «بايەرىن» جەڭىپ شىقتى. الايدا, سودان بەرگى «بلانكوس» فينالدا ۇتۋ مارتەبەسىنە قايتادان جەتە الماي قويدى. ءبىر تەكتى, ياعني ءوز وتانداسىمەن وتكەن فينالدا ويناۋ تاجىريبەسى بۇعان دەيىن «اتلەتيكونىڭ» دا باسىنان ءوتتى. راس, ول ەۋروپا ليگاسىندا ورىن الدى. 2012 جىلى اتالمىش كوماندا بيلباونىڭ «اتلەتيگىمەن» ۇشىراسىپ, 3:0 دەگەن ەسەپپەن جەڭىسكە جەتكەن ەدى.
شىنى كەرەك, قۇرلىقتىق جارىستارداعى تابىستارى بويىنشا ءمادريدتىڭ بۇل ەكى جاساعىن ءبىر-بىرلەرىمەن سالىستىرۋ ءتىپتى دە مۇمكىن ەمەس. بۇعان دەيىن «اتلەتيكو» ەۋروپا ليگاسىندا ەكى رەت باس بايگەنى الىپ, سوناۋ 1962 جىلى كۋبوك يەلەرى كۋبوگىنا قول جەتكىزگەن-ءدى. ال ەۋروپا چەمپيوندار ليگاسىنىڭ فينالىنا ول ءبىرىنشى رەت شىعىپ وتىر. كوماندا ەۋروپا چەمپيوندارى كۋبوگى ءۇشىن شايقاستىڭ اقتىق سىنىنا 1974 جىلى ءبىر رەت جەتىپ, وندا نەمىستىڭ «باۆارياسىنا» جول بەرىپ قويعان ەدى. ءوز كەزەگىندە «رەال» التى رەت ەۋروپا چەمپيوندارى كۋبوگىن ۇتىپ, كەيىنگى چەمپيوندار ليگاسىندا ءۇش رەت باس بايگە الىپ ۇلگەردى. ونىڭ ويىنشىلارى تاعى ەكى مارتە ۋەفا كۋبوگىن توبەلەرىنە كوتەردى.
ويىن بارىسى
كەزدەسۋدىڭ باسىنان «رەال» دوپتى تىزگىندەپ ۇستادى. قورعاۋشى كارۆاحالدان ۇدايى قولداۋ الىپ تۇرعان بەيل وڭ قاپتالدان بىرنەشە رەت شۇيلىكتى. ءبىر جولى ول بەنزەماعا ادەمى دوپ اسىردى. ونى العان فرانتسۋز فۋتبولشىسى وكشەسىمەن دوپتى بۇعان قايتاردى. بىراق قاقپاشى كۋرتۋا ونى جارتى جولدان قاعىپ كەتتى. العاشىندا «اتلەتيكو» ءوز الاڭى ماڭىنا كوپ كۇش شوعىرلانداردىرىپ, قورعانىسقا كوشۋگە ءماجبۇر بولدى. قارسىلاستارىنىڭ جويقىن شابۋىلىن بارىنشا باسۋعا تىرىسقان ولار سونىمەن بىرگە تاسقامال قورعانىستىڭ اياسىندا قالىپ قويۋعا دا ونشالىقتى قۇشتار بولا قويمادى. سول سەبەپتى دە ديەگو سيمەونەنىڭ شاكىرتتەرى وزدەرىنىڭ قارسى شابۋىلدارىن ۇيىمداستىرۋدىڭ جولدارىن ۇدايى ىزدەستىرۋمەن بولدى. اينالىپ كەلگەندە, «ماتراسشىلاردىڭ» قارسى الاڭ جاققا ەڭ ءبىرىنشى جورىعى ايىپ دوپ سوعۋعا الىپ باردى. راس, ونى شارتتى تۇردە قوناقتار سانالعان اتلەتيكولىقتار مۇنى وزدەرى ءۇشىن ءتيىمدى پايدالانا المادى. ال العاشقى ونىنشى مينۋتتىڭ اقىرىندا ديەگو سيمەونە ويىنشىلار الماستىرۋعا ءماجبۇر بولدى. ول ءوزىنىڭ تولىق كۇشىندە ويناي الماعان ديەگو كوستانىڭ ورنىنا ادرياندى شىعاردى. ارگەنتينالىق باپكەر جاراقاتى بار شابۋىلشىنى ستارتتىق قۇرامدا الاڭعا شىعارۋدىڭ ۇلكەن قاتەلىك بولعانىن وسى تۇستا عانا اڭعارسا كەرەك. ءبىر اپتانىڭ ىشىندە تىزە جاراقاتى قالپىنا كەلە قويمايتىنىنا ونىڭ كوزى ەندى عانا جەتكەن شىعار.
دەگەنمەن, «رەالدىڭ» ويىن باسىنداعى قاتتى قىسىمى ۋاقىت ۇزاعان سايىن بىرتىندەپ بوساڭ تارتا بەردى. اقىرىندا ەكى جاق ويىنىنداعى تارازى باسى تەڭەسكەندەي قالىپ تانىتتى. وسى تۇستا ەكى جاق تا كوپتەگەن قاتەلىكتەرگە ۇرىندى. ال گول سوعاتىن ساتتەرگە ەكى جاق تا قول جەتكىزە الماي جاتتى. ماتچتاعى ءبىرىنشى تۋرا سوققى 14-مينۋتتا جاسالدى. ونى راۋل گارسيا الىستان ۇرىپ ورىندادى. بىراق دوپ قاقپا باعانىنىڭ ورتاسىنا تۋرالاپ بارعان جوق. وسىدان كەيىن ماتچتاعى قارقىن ءبىرشاما باسىلىپ قالدى. كوماندالار قايتادان الاڭ ۇستىندە ۇستەمدىك قۇرۋ جولىنداعى كۇرەستەرىن جالعاستىرا بەردى. وسى كەزدە ويىنشىلاردىڭ بارىنشا ساقتىق جاساپ جۇرگەندەرى دە كورىنىپ تۇردى.
ەگەر كەزدەسۋدىڭ باسىندا «رەالدىڭ» وڭ قاپتالى مەيلىنشە بەلسەندىرەك قيمىلداعان بولسا, ءبىرىنشى تايمنىڭ ەكۆاتورى شاماسىندا ويىننىڭ نەگىزگى ايقاسى قارسى قاناتقا اۋىسىپ كەتتى. سول جاقپەن كوەنتراۋ بىرنەشە رەت رەيد جاساپ تا كوردى. ءبىر جولى ءتىپتى ول قاۋىپتى بولۋى ىقتيمال ايىپ دوبىنىڭ سوعىلۋىنا دا سەبەپ بولدى. ستاندارتتى سوققىنى مودريچ جاسادى. بىراق ونىڭ شىرەنە ۇرعان دوبى زۋىلداپ ۇشىپ بارىپ, تۋرا كۋرتۋانىڭ قولىنان ءبىر-اق تابىلدى. كوپ ۇزاماي «اتلەتيكو» قارسى شابۋىلعا قاۋىرت كوتەرىلىپ, كاسيلياستىڭ داربازاسى ماڭىن تورۋىلداپ الدى. ونىڭ ويىنشىلارى ءتىپتى ءبىر رەت بۇرىشتاما دوبىن دا سوقتى. ال ودان ناتيجە شىعارا قويماعاسىن, ارتىنشا ءوز ايىپ الاڭدارى اۋماعىنا قايتا توپتاسۋعا ءماجبۇر بولدى. «بلانكوستىڭ» جىلدام ۇيىمداستىرعان قارسى شابۋىلىن ولار تەك ءتارتىپ بۇزۋ ارقىلى عانا توقتاتا الدى. بۇل جولى وسىعان بايلانىستى بەلگىلەنگەن ايىپ دوبىن سوعۋعا رونالدۋ ىنتا تانىتتى. ونىڭ زىڭىلداي ۇشقان ۇشقىر دوبى قاقپا شەڭبەرىن تۋرالاپ جەتتى. بىراق كۋرتۋا قاتەلەسە قويعان جوق.
وسىدان باستاپ الاڭ ۇستىندەگى ويلى ويىن ءوزىنىڭ ورنەگىن جوعالتا باستادى. ونىڭ ورنىنا تىرنەكتى تىرەس پەن كەسكەكتى كۇرەس ءبىرىنشى پلانعا شىقتى. الايدا, بۇعان قاراداي قاپا بولۋدىڭ دا رەتى جوق ەدى. سەبەبى, مۇنداي ءىرى اۋقىمداعى ءتۋرنيردىڭ باستان-اياق فۋتبول ويىنىنىڭ ساباعىنا كىرەتىن ۇزدىك ۇلگى قالپىندا ءوتۋى مۇمكىن دە ەمەس بولاتىن. تۇپكى ناتيجەسى جەڭىس بولىپ تابىلاتىن كەزدەسۋلەردە كوپ جاعديدا سول ماقساتقا جەتۋدىڭ باسقا دا تاسىلدەرى قولدانىلىپ جاتادى. بۇل جولى دا سولاي بولدى. سونداي تەكەتىرەستىڭ بارىسىندا ىقتيمال مەيماندار كاسيلياس قاقپاسىنا قاراي كەزەكتى مارتە شابۋىلعا شىقتى. ونىڭ «بلانكوس» ءۇشىن بىردەن وكىنىشتى بولىپ اياقتالۋى دا مۇمكىن ەدى. وسى مەزەتتە ءبىر-بىرلەرىمەن ۇيلەسىمدى ويناي الماعان رەالدىقتار ءوز قاقپالارىنا دوپ تا جىبەرىپ قويا جازدادى. الايدا, ادرياننىڭ ايىپ الاڭى سىرتىنان ۇرعان دوبى ورتاداعى ويىنشىلار شوعىرىنا ءتيىپ, كەرى قايتتى. ال كورول كلۋبىنىڭ بۇعان جاۋاپ رەتىندە جاساعان قارسى جورىعى بۇدان دا قاۋىپتى كورىندى. الدىمەن تياگۋدىڭ سالعىرت بەرىلگەن پاسىن بەيل جارى جولدا قاعىپ اكەتتى. سودان سوڭ قارسىلاستار تاراپىنان بىردە-ءبىر توسقاۋىل كورمەگەن گارەت ايىپ الاڭى ىشىنە ەمىن-ەركىن قويدى دا كەتتى. بىراق ۆالليلىك جىگىت قاقپاعا قاراي تەز سوققى جاساۋدىڭ ورنىنا رەتسىز كىدىرىپ قالدى. وسىلاي قولايلى ءساتتى جىبەرىپ الدى. ارادا ەكى مينۋت وتكەندە, فۋتبولدا ايتىلا بەرەتىن «سەن سوعا الماساڭ, ساعان سوعادى» دەگەن قاعيدانىڭ ورىندالا كەتەتىن مەزەتى جە تۋا قالدى. «ماتراسشىلار» كەزەكتى مارتە بۇرىشتامادان دوپ جەتكىزۋ قۇقىعىنا يە بولدى. ولار اۋەلەتىپ اكەلگەن دوپتى «رەال» ويىنشىلارى داساۋىلگىدە كەرى قايتارىپ, قاۋىپتىڭ بەتىن الاستاتقانداي بولىپ ەدى, الايدا, «اتلەتيكو» جىگىتتەرى ونى قايتادان ايىپ الاڭىنا اسىرىپ, ديەگو گوديننىڭ باسپەن قاقپاعا قاراي ۇرۋىنا جول اشىپ بەردى. وسى كەزدە العا قاراي ءبىراز العا شىعىپ كەتكەن كاسيلياس ورنىندا تۇرىپ قالماعانىنىڭ زاردابىن تارتتى. اۋەلەپ ۇشقان دوپ يكەردىڭ قولى جەتپەيتىن تراەكتوريا بويىنشا ۇشىپ ءوتىپ, ونىڭ تۋ سىرتىنان قاقپا تورىنا بارىپ گۇمپ ەتتى! گول! 1:0! ەسەپ وسىلاي اشىلدى.
قاقپاشىنىڭ قاتەلىگىنەن سوعىلعان بۇل گول كارلو انچەلوتتيدىڭ ساربازدارىن, البەتتە, قاتتى اشىندىرىپ جىبەردى. ۇزىلىسكە دەيىن دە ءالى ءبىراز ۋاقىت بار ەدى. سوندىقتان «رەال» ويىنشىلارى وسى ارالىقتا ەسەپتى تەڭەستىرىپ ۇلگەرۋگە بارىن سالدى. ولار كۋرتۋانىڭ يەلىگىندەگى الاڭعا بىرنەشە رەت قاۋىرت شابۋىلدار ۇيىمداستىردى. بىراق بۇلاردىڭ بىردە-ءبىرى ناتيجە اپەرگەن جوق. ال «اتلەتيكو» ءوز كەزەگىندە «ەكىنشى نومىرمەن» ويناۋعا وڭاي كەلىسە سالعان جوق, ول دا شابۋىلدى توقتاتپاۋعا تىرىستى. سونىڭ ساتىندە سيمەونە جىگىتتەرى بۇرىشتاما سوعۋعا دا قۇقىق الدى. ونىڭ ىرعاعىندا ادريان باسپەن ۇرىپ, دوپتى قاقپاعا ءدال باعىتتاي المادى. ءسال كەيىن «ماتراسشىلار» ايىپ دوبىن دا ۇردى. بىراق گابيدىڭ سوققىسى قاقپاعا تۋرا بارمادى. وسىمەن ءبىرىنشى تايم اياقتالدى.
ەكىنشى تايمنىڭ باسىنان كارلو انچەلوتتيدىڭ شاكىرتتەرى ويىن تىزگىنىن ءوز قولدارىنا الۋعا ۇمتىلدى. الايدا, «اتلەتيكو» جىگىتتەرى دوپسىز دا وتە جاقسى ويىن كورسەتىپ, جەرلەستەرىنىڭ جويقىن شابۋىلدارىنا بەلسەندى ۇجىمدىق ويىندى ساۋاتتى تۇردە قارسى قويا ءبىلدى. سوعان قاراماستان, 53-مينۋتتا دي ماريا كەرەمەت دريبلينگتىڭ ارقاسىندا «ماتراسشىلاردىڭ» قورعانىس قامالىن بۇزىپ ءوتىپ, ايىپ الاڭىنىڭ جيەگىنە جەتىپ كەلدى. سول كەزدە ميرانداعا ونى شالىپ قۇلاتقاننان باسقا جول قالمادى. وسىعان وراي بەلگىلەنگەن ايىپ دوبىن رونالدۋ جاپ-جاقسى ورىندادى. بىراق ءوزىنىڭ پوزيتسياسىن دۇرىس تاڭداعان كۋرتۋا قاتتى سوققىنى بۇرىشتاماعا قاراي اۋدارىپ ۇلگەردى. مۇنىڭ ارتىنشا بەرىلگەن كورنەردى «سارىمايلار» وڭدى پايدالانا المادى. دالىرەگى, الگىندەگى رونالدۋ قاقپاعا ۇرعاندا قيىس كەتتى. كورول كلۋبىنىڭ ويىنشىلارى بۇدان كەيىن دە «اتلەتيكو» قاقپاسىنا وسىعان ۇقساس قىسىم جاساپ كوردى. ايتكەنمەن, ديەگو سيمەونە جاۋىنگەرلەرى ونىڭ قاۋپىن ءوز قاقپالارى ماڭىنان الىستاتىپ جىبەرۋگە قول جەتكىزدى. كوپ ۇزاماي ولاردىڭ ساپىنداعى ادريان قارسى قاقپانىڭ ايىپ الاڭىنا كىرىپ بارۋدىڭ ورايىن كەلتىردى. بۇل شابۋىل كارۆاحالدىڭ شابۋىلشى اياعىنىڭ استىنان دوپتى قاعىپ جىبەرىپ, قاپتالدان اسىرا سالۋىمەن اياقتالدى. مۇنىڭ سوڭىنان «ماتراسشىلار» ەكى رەت بۇرىشتامادان دوپ تاستادى. بىراق ولاردىڭ ەكەۋى دە ناتيجەسىز ءبىتتى. ەندى ويىن الما-كەزەك شابۋىلعا كوشتى. ەكى جاق تا وتە جىلدام دا جىگەرلى ويناي باستادى. كەزدەسۋدىڭ ءجۇرىپ جاتقانىنان ءبىر ساعات تولۋعا قاراعان شامادا كارلو انچەلوتتيدىڭ ەكى ويىنشىنى الماستىردى. ول فابيۋ فابيۋ كوەنتراۋ مەن سامي حەديرانىڭ ورىندارىنا مارسەلو مەن يسكونىڭ شىعۋى ارقىلى كورىنىس تاپتى. بۇل مادريد دەربيىنىڭ كۇشەيە تۇسۋىنە كادىمگىدەي ۇلەس قوستى. سونىڭ ايعاعىنداي ارادا از ۋاقىت وتكەندە, كۋرتۋا داربازاسى الدىندا تاعى دا قاۋىپتى ءسات تۋىندادى. تىڭ ەكەنى قيمىلىنان تانىلعان يسكو سول قاپتالدان كەلىپ, قارسى ايىپ الاڭىنا قاراي دوپتى كەرەمەت ەتىپ اۋەلەتىپ جونەلتتى. ونى ءىلىپ اكەتۋگە روانلدۋ مەن بەنزەما ءسال عانا جەتپەي قالدى. بىراق بۇعان قاراپ, «اتلەتيكو» قاقپاسىنا گول تۇسەتىن ءسات ءپىسىپ-جەتىلدى دەپ تە ايتۋعا بولمايدى. دەگەنمەن, بۇل تۇستا «رەالدىڭ» شابۋىلى ۇزىلىسكە دەيىنگى ماۋرىتتەگىدەن اناعۇرلىم قاۋىپتى بولىپ جاتتى. سوندىقتان «ماتراسشىلارعا» تازا قورعانىسقا كوشىپ, شابۋىلدى قايتارىپ قانا تۇرۋعا استە بولمايتىن ەدى. مۇنى ديەگو سيمەونە ويىنشىلارى دا جاقسى ءتۇسىندى. وسىنىڭ ناتيجەسىندە ولار بۇل جاعدايدان ءتيىمدى شىعۋدىڭ بىردەن-ءبىر وڭدى جولى قارسى شابۋىلدا جاتىر دەپ سانادى. مۇنىڭ سوڭىندا كاسيلياس قاقپاسىنا قايتا-قايتا كورنەر بەلگىلەنگەن ۋاقىتتار دا كەلىپ جەتتى. ال تايم ەكۆاتورى اۋىسار شاقتى ولاردان راۋل گارسيانىڭ ورنىنا الاڭعا حوسە ەرنەستو سوسا شىقتى.
تايمنىڭ ورتاسىندا «رەال» قايتا-قايتا قىسىم جاساي ءجۇرىپ, اقىرى ويىن تىزگىنىن ءبىرجولا ءوز قولىنا الىپ الدى. كورول كلۋبى وسىدان باستاپ پوزيتسيالىق تۇرعىدا كوپ شابۋىلداپ, دوپتى قاقپاعا قاراي تۇراقتى تۇردە ۇرىپ تۇرۋدى ادەتكە اينالدىردى. ولاردىڭ وكىنىشتەرىنە وراي, بۇل سوققىلار ىلعي قاقپا باعانى جانىنان زۋىلداپ ءوتىپ كەتۋمەن بولدى. ال «ماتراسشىلاردىڭ» ورىنداۋىنداعى قارسى شابۋىلدار بارعان سايىن ازايىپ, قۋاتى دا كەمي بەردى. سوندىقتان ولاردىڭ تاراپىنان قارسىلاستار جورىعىن ءتارتىپ بۇزۋشىلىق جولىمەن توقتاتۋ جيىلەي ءتۇستى. ويىننىڭ 72-مينۋتىندا دي مارياعا قارسى كەزەكتى جاسالعان فول «اتلەتيكونىڭ» تاعى ءبىر فۋتبولشىسىنا «سارى قاعاز» كورسەتىلۋىنە سەبەپ بولدى. بۇل جولى ونى حۋانفران وزىنە جۇكتەدى. سول مەزەتتە قايتا ءورىسىن تاپقان شابۋىل ورايىندا رونالدۋ شالقالاي بەرىپ, قاقپاعا قاراي دوپ اتتى. الايدا, ونىسى ءۇش باعاننىڭ ورتاسىنا تۋرالاپ بارمادى. ال كەزدەسۋدىڭ 75-مينۋتى شاماسىندا «رەال» ەسەپتى تەڭەستىرۋدىڭ تاعى ءبىر تاماشا مۇمكىندىگىن جىبەرىپ الدى. قارسىلاستار الاڭىنا دوپپەن جۇگىرىپ كىرگەن بەيل قولايلى ساتتە قولايسىز سوققى جاسادى. دوپ قاقپانىڭ جانىنان وتە شىقتى. ءسال كەيىن كارۆاحال قاپتالدان جەتكىزگەن دوپ ايىپ الاڭى ىشىندە يسكوعا تاپ ەتە ءتۇستى. ونى العان ويىنشى اينالا بەرىپ, قاقپاعا ۇرماقشى بولا بەرگەن. سول كەز قارسى الدىنان گودين شىعا كەلدى دە, دوپتى ونىڭ اياعى استىنان زىتىرىپ جىبەردى.
ەكىنشى تايمنىڭ سوڭىنا قاراي ەكى جاتتىقتىرۋشى دا ءوز كوماندالارى ساپىنداعى سوڭعى ويىنشى الماسۋشىلىقتى جاساۋعا شەشىم قابىلدادى. كارلو انچەلوتتي وسى تۇستا كاريم بەنزەمانىڭ ورنىنا الاڭعا الۆارو موراتانىڭ شىعارسا, ديەگو سيمەونە شارشاعانى ءبىلىنىپ جۇرگەن توبي الدەرۆەيرەلدتى فيليپە لۋيسپەن اۋىستىدى. وسى كەزدە ەكى جاساق الدىندا تۇرعان ماقسات پەن مىندەت تە بولەك ەدى. ول «اتلەتيكو» ءۇشىن قالايدا وسى جەڭىستى ەسەپتى ۇستاپ قالۋمەن ايگىلەنسە, «رەالدى» سول ەسەپتى الدىمەن تەڭەستىرىپ الۋعا جەتەلەدى. سوندىقتان «بلانكوس» سوڭعى مينۋتتاردا, البەتتە, جويقىن جورىققا شىقتى. ونىڭ كۋرتۋا قاقپاسى الاڭىنا قاراي جاساعان ۇزدىكسىز رەيدتەرى بارعان سايىن قاۋىپتى بولا باستادى. سول قىزۋ تارتىس مايدانىندا «اتلەتيكو» ويىنشىلارى قارسىلاستارىنىڭ ەسەپسىز شابۋىلدارىن قايتارۋ جولىندا جوسىقتى-جوسىقسىز ارەكەت ەتۋمەن بولدى. ولار كەزدەسۋدىڭ العاشقى 90 مينۋتىندا سول ماقساتتارىنا جا جەتتى. الايدا, الاڭداعى اربيتر نەگىزگى مەزگىلگە تاعى 5 مينۋت قوستى. فينالدىق ماتچتىڭ ناعىز شيەلەنىسى مەن ءدراماتيزمى وسى قوسىمشا ۋاقىتتا كورىندى. «رەال» بۇل كەزدە بۇرىنعىسىنشا ۇزدىكسىز العا ۇمتىلا بەردى. سول ولەرمەندىك پەن وجەتتىك اقىرى ناتيجەگە دە جەتكىزدى. الدىمەن مودريچ بۇرىشتامادان ايىپ الاڭىنا قاراي دوپ اۋەلەتتى. ول ورتادا تۇرعان راموستىڭ باسىنا ءدوپ كەلدى. جۇرتتىڭ بارىنەن بيىك تە بۇرىن سەكىرگەن ويىنشى دوپتى كۋرتۋا تۇرعان قاقپانىڭ تورىنان ءبىر-اق شىعاردى – 1:1!
ويىننىڭ قوسىمشا ۋاقىتى جۇرتشىلىق كۇتكەندەگىدەي ستسەناريمەن ءوربىدى. ەندى ەسەپتىڭ تەڭەسۋىنەن كەرەمەت ەكپىن العان كارلو انچەلوتتيدىڭ جىگىتتەرى ەرەكشە كوڭىل-كۇيمەن العا ۇمتىلدى. ال قارسىلاستارىنان ايقىن باسىمدىلىقتارىن كورسەتۋ ءۇشىن كورول كلۋبىنا بار-جوعى 10 مينۋت ۋاقىت جەتىپ جاتتى. بۇل كەزدە «اتلەتيكو» ويىنشىلارىنا قاراعاندا, كۇشتەرى كوبىرەك ساقتالىپ قالعانى انىق بايقالعان «رەال» جىگىتتەرى ارىپتەستەرى الاڭىنان شىقپاي قويدى. شابۋىلدىڭ شارقى بۇدان بىلاي مارسەلو بەلسەندىلىك تانىتقان سول قاناتقا اۋىستى. سونىڭ ءبىر اۋانىندا ول قارسىلاستار ايىپ الاڭىنا جەلدەي ەسىپ كىرىپ, دوپتى جەرلەتىپ تەپتى. سول مەزەت ميراندا دوپتىڭ جولىنان تابىلىپ, قاۋىپتىڭ بەتىن قايتارىپ ۇلگەردى. بۇدان كەيىن مارسەلونىڭ كەزەكتى شابۋىلى قاۋىپتى ايىپ دوبىنىڭ بەلگىلەنۋىنە سەبەپ بولدى. ايىپ دوبىن تاعى دا رونالدۋ ۇردى. سوققى «قابىرعاعا» سوعىلىپ, كەرى سەرپىلدى. وسى ۋاقىتتارى «رەال» الاڭدا ءبىر ءوزى جۇرگەندەي اسەر قالدىردى. تەك قوسىمشا ۋاقىتتىڭ ءبىرىنشى تايمى سوڭىندا عانا «اتلەتيكو» ويىنشىلارى قارسى الاڭعا جورىق جاساي الدى. بىراق وندا دا كوپ تۇراقتاي قويعان جوق. راس, ولاردىڭ سول شاپقىنشىلىقتارى تاعى ءبىر بۇرىشتاما بەرىلۋىنە جەتكىزدى. سونىمەن ءبىتتى. ال «رەال» قارسى شابۋىلعا شىعىپ, ءدال سونداي ءبىر كورنەرگە اياق ارتتى. مۇندا دا بۇرىشتاما ناتيجە بەرمەدى.
ەكىنشى قوسىمشا تايمنىڭ الدىڭعىدان وزگەشىلىگى بولمادى. «رەال» بۇرىنعىسىنشا ويىننىڭ تىزگىنىن قولعا ۇستاپ, شابۋىلداۋىن جالعاستىرىپ جاتتى. ال «اتلەتيكو» شاندا ءبىر ورايى كەلە قالاتىن قارسى شابۋىلعا سۇيەندى. الاڭ يەلىگى ءوز قولدارىنا كوشكەن كارلو انچەلوتتي جىگىتتەرى قارسى جاققا شابۋىلدى بارىنشا كەڭ قاناتپەن ورىستەتۋگە تىرىستى. سونداي كوپ شابۋىلداردىڭ بىرىندە مودريچ جيىرما مەتر جەردەن سوققى جاسادى – كۋرتۋا ورنىنان تابىلدى. ال ارادا بار-جوعى ەكى مينۋت وتكەندە «بلانكوس» «ماتراسشىلاردى» اقىرى «الىپ تىندى». كەزدەسۋدىڭ 110-مينۋتىندا انحەل دي ماريا «اتلەتيكونىڭ» الاڭىنا قۇيىنداي ۇشىپ كىردى دە, جاقىن جەردەن تۋرا كۋرتۋاعا قاراي دوپ ۇردى. ال دوپ الىس باعانعا قاراي زىمىراپ بارا جاتقاندا, وعان بەيل بارىنەن بۇرىن جەتىپ, باسىن توسا قويدى – 2:1. البەتتە, وسىدان كەيىن «ماتراسشىلار» ەسەپتى قايتا تەڭەستىرمەك بولىپ, شۇعىل العا تارتتى. ولار كۇشتەرى ابدەن سارقىلعاندارى كورىنىپ تۇرعانىمەن, بىرنەشە رەت جورىق ۇيىمداستىرا الدى. سولاردىڭ بىرىندە ديەگو سيمەونە ساربازدارى بۇرىشتاما دا بەرىپ كوردى. ال ونى بەرۋ كەزىندە «رەالدىڭ» قاقپا الاڭىندا ناعىز دۇرلىگىس ورىن الدى. ونىڭ ويىنشىلارى گوديننىڭ ۇرعان دوبىن ارەڭ قايتاردى. وسى تۇستا «اتلەتيكو», ءسوز جوق, ەسەپتى تەڭەستىرۋگە وتە جاقىن قالدى. الايدا, 117-مينۋتتا ول ءوزىنىڭ قاقپاسىنا ءۇشىنشى دوپتى جىبەرىپ الىپ, بارلىق ۇمىتتەرىنەن ايرىلىپ قالعانداي كۇي كەشتى. رونالدۋ قارسىلاستار الاڭىنا كىرگەن كەزىندە دوپتى وزىنەن كەيىنگى مارسەلوعا سىرعىتا سالدى. ال الدىندا ەشقانداي قارسىلىق كورمەگەن فۋتبولشى ونى الىس بۇرىشقا ءدال ءتۇسىردى – 3:1. مۇنىڭ ءوزى دە ويىننىڭ اقىرى ەمەس ەدى. اقىرى قوسىمشا تايمنىڭ سوڭىندا وسى كەزدەسۋدىڭ ءبىرىنشى گولىن سالعان ديەگو گوديننىڭ ءوز ايىپ الاڭى ىشىندە رونالدۋدى شالىپ قۇلاتۋىمەن اياقتالدى. وسىعان بايلانىستى بەلگىلەنگەن پەنالتيدى كريشتانۋدىڭ ءوزى ۇردى – 4:1! وسىمەن تارتىسقا تولى ماتچ تا ءوزىنىڭ مارەسىنە جەتتى.
كەزدەسۋ داڭقتى كلۋبتىڭ باعىن تاعى جاندىرۋمەن بىرگە, مۇنداي اسا جاۋاپتى ويىنداردا كەزدەيسوقتىق دەگەننىڭ كوپ اسا بولا قويمايتىنىن, ونىڭ قالاي دەگەندە دە شىن مىقتىنىڭ ايبىنى اسىپ, ايدىنى وزىپ شىعا كەلۋىنە الىپ باراتىنىن كورسەتىپ بەردى.
دەرەككوز: ras.kz.
فوتو: www.dw.de.
