جاڭا مەكتەپتىڭ اشىلۋى ۇلتتىق مەرەكە – رەسپۋبليكا كۇنىنە تۇسپا تۇس كەلدى. اۋىل بالالارىنا ءبىلىم سىيلايتىن عيمارات قۇرىلىسى ءۇشىن مەملەكەتتەن 1 191,07 ملن تەڭگە قاراجات بولىنگەن. قۇرىلىستى وڭىردەگى بەلگىلى كومپانيا - «سكف وتدەلستروي» جشس جۇرگىزدى.
ششاپوۆو – ورال-اتىراۋ كۇرە جولىنىڭ بويىندا جاتقان ءىرى ەلدىمەكەن. اۋىلداعى بۇرىنعى مەكتەپ 120 بالاعا ارنالعان, ءارى 1974 جىلى سالىنعاندىقتان, توزىپ, اپات جاعدايىنا كەلگەن بولاتىن. سوعان قاراماستان مۇندا كۇنى 2022-2023 وقۋ جىلىندا 435 وقۋشى ءبىرىنشى توقساندى ىلاجداپ وقىپ شىقتى. ولاردىڭ ىشىندە كورشىلەس جاڭاتاڭ اۋىلىنان اۆتوبۋسپەن تاسىمالداناتىن 41 وقۋشى دا بار. جاڭا مەكتەپ عيماراتىنىڭ اشىلۋىن ەڭ اسىعىپ كۇتكەن دە وسى وقۋشىلار بولعانى انىق.
ءبىلىم ورداسى 2021 جىلى داڭقتى باتىر باۋىرجان مومىش ۇلىنىڭ ەسىمىن يەلەنگەن بولاتىن. سوڭعى 6 جىلدان بەرى وسى ۇجىمدى باسقارىپ كەلە جاتقان ايمەكەن باقتىعاليەۆانىڭ ءوزى قازاق ءتىلى مەن ادەبيەتىنىڭ مۇعالىمى. ارالاس تىلدە ساباق بەرەتىن مەكتەپتە 293 وقۋشى قازاق تىلىندە, 142 وقۋشى ورىس تىلىندە ءبىلىم الادى. اۋىلدىڭ دەموگرافيالىق احۋالى وتە جاقسى: قازىر ءبىرىنشى سىنىپتا – 40 بالا وقىسا, مەكتەپالدى دايارلىق توبىندا 45 ءسابي تاربيەلەنىپ جاتىر. مەكتەپتە بارلىعى 67 پەداگوگ قىزمەت اتقارادى.
جاڭا عيماراتتىڭ اشىلۋ سالتاناتىنا ارنايى كەلگەن باتىس قازاقستان وبلىسى اكىمىنىڭ ورىنباسارى باقىتجان نارىمبەتوۆ اۋىل تۇرعىندارىن قۋانىشتى وقيعامەن ءارى ۇلتتىق مەرەكە – رەسپۋبليكا كۇنىمەن قۇتتىقتادى. مەملەكەتىمىز ءوز حالقىنىڭ جاقسى تۇرمىسى مەن باياندى بولاشاعى ءۇشىن كەلەشەكتە دە جۇيەلى جۇمىس جۇرگىزەتىنىن ايتتى. وسىنداي زاماناۋي ءبىلىم ورداسىندا ءبىلىم العان ورەندەردىڭ ءوز وتانىن قالتقىسىز سۇيگەن پاتريوت بولاتىنىنا سەنىم ءبىلدىردى.
جاڭا مەكتەپ تولىعىمەن جاڭا تەحنيكالىق قۇرال-جابدىقپەن جاراقتالعان. عيماراتتىڭ 21 وقۋ كابينەتىندە 15 ينتەراكتيۆتى تاقتا ورناتىلعان. سونىمەن قاتار, 1 سمارت كابينەت, 2 شەبەرحانا, 2 ينفورماتيكا كابينەتى, سپورتزال, كىتاپحانا جانە 30 ورىندىق وقۋ زالى, 208 ورىندىق مادەنيەت زالى, 72 ورىندىق اسحاناسى بار. مەكتەپ اۋلاسىندا بىرنەشە سپورت الاڭى ورنالاسقان.
مەكتەپ داڭقتى باتىر باۋىرجان مومىش ۇلىنىڭ ەسىمىن يەلەنگەندىكتەن, مۇندا «باۋىرجانتانۋ» اتتى ساباق تا جۇرەدى. ودان بولەك, مەكتەپ ۇجىمى وقۋ-تاربيە ۇردىسىنە يننوۆاتسيالىق ءادىس-تاسىلدەردى باتىل ەنگىزىپ, «تسيفرلى مۇعالىم», «دومبىرا party», «STEAM», «ەكو مەكتەپ», «وقۋعا قۇشتار مەكتەپ», دەبات «اقيقات» جوبالارىمەن جۇمىستانادى. رەسپۋبليكا بويىنشا باۋىرجان مومىش ۇلى ەسىمىن يەلەنگەن مەكتەپتەرمەن دە جەلىلىك بايلانىس ورناتىپ, تاجىريبە الماسىپ وتىرادى.
باتىس قازاقستان
