مەملەكەت باسشىسى قاسىم-جومارت توقاەۆتىڭ تاپسىرماسىنا وراي حالىقتىڭ تابىسىن ارتتىرۋ باعىتىندا قىرۋار ءىس اتقارىلعانىن ايتساق, ارتىعى بولماس. قازىر ەكى قولعا ءبىر كۇرەك تاۋىپ, وتباسىن قامتاماسىز ەتۋگە مۇمكىندىگى تۋعاندار اق-ادال ەڭبەگىمەن جۇمىس ىستەۋدە.
جىل باسىنان بەرى 16 مىڭ ادام جۇمىسپەن قامتاماسىز ەتىلسە, سونىڭ ىشىندە 10 مىڭعا جۋىق جەرلەسىمىز تۇراقتى جۇمىسقا تۇرعان. بايىپتاپ قاراساڭىز, از ەمەس. تاعى ءبىر ەرەكشەلىگى, حالىقتىڭ تابىسىن ارتتىرۋعا جانە جاپپاي كاسىپكەرلىكتى دامىتۋعا ەرەكشە كوڭىل ءبولىنىپ وتىر. اسىرەسە, كاسىپكەرلىكتى دامىتۋدىڭ ماڭىزى زور. قولىنان ءىس كەلەتىندەر ءوز كاسىبىن دوڭگەلەتسە, ناتيجە بولىپ, ءادىل باسەكەلەستىك تۋىندايتىنى انىق. جەرگىلىكتى ءونىم مول بولعان كەزدە باعا دا تۇراقتانۋى ىقتيمال.
– بۇگىندە حالىقتى جۇمىسپەن قامتۋ, جۇمىسسىزدىق دەڭگەيىن تومەندەتۋ ماقساتىندا جۇمىس جۇرگىزىلىپ جاتىر. جىل سوڭىنا دەيىن قولعا الىنعان ون جوبانىڭ اياسىندا بارلىعى 17 مىڭ جۇمىس ورنىن اشۋ جوسپارلانعان, – دەيدى وبلىستىق جۇمىسپەن قامتۋ جانە الەۋمەتتىك باعدارلامالاردى ۇيلەستىرۋ باسقارماسىنىڭ باسشىسى دينا احمەتجانوۆا, – 4 مىڭ جۇمىس ورنى ۇلتتىق جوبالار اياسىندا اشىلدى. وبلىستىڭ 3,5 مىڭنان استام تۇرعىنىن بەلسەندى جۇمىسپەن قامتۋ شارالارىنىڭ ناتيجەسىندە جۇمىسقا ورنالاستىردىق. تاعى ءبىر ايتا كەتەرلىگى, 8 378 ادام بوس جۇمىس ورىندارىنا جىبەرىلدى.
شىن مانىندە, ۇلتتىق جوبالار اياسىندا جاڭا جۇمىس ورىندارىنىڭ اشىلۋى وڭىردەگى جۇمىسسىزدىق ماسەلەسىن شەشۋگە ءبىرشاما وڭ ىقپالىن تيگىزىپ وتىر. ايتالىق, «ەڭبەك» باعدارلاماسى بويىنشا 33 اقمولالىق ازامات جەكە كاسىبىن اشقان. بۇل – قۇپتارلىق قادام. كاسىپ يەلەرى جۇمىس اۋقىمىنا وراي وزگە ادامدارعا دا شاراپاتىن تيگىزەدى. بۇل تاراپتا تابىسقا قولى جەتكەندەردى ۇلگى-ونەگە ەتىپ, ەل ىشىندەگى جاستاردى جاقسى ىسكە باۋلىپ, جۇمىلدىرۋعا دا بولادى. العا ۇمتىلعان اقمولاداعى وزگە دە جوبالار مىڭداعان تۇرعىندى جۇمىسپەن قامتاماسىز ەتىپ, الەۋمەتتىك-تۇرمىستىق جاعدايىن جاقسارتۋعا سەپ بولىپ وتىر.
– «ساپالى ءبىلىم» جانە ء«بىلىمدى ۇلت» جوبالارى بويىنشا 170 جاڭا جۇمىس ورنى اشىلدى. «مىقتى وڭىرلەر – ەل دامۋىنىڭ درايۆەرى» ۇلتتىق جوباسى اياسىندا 358 ادام جۇمىسپەن قامتاماسىز ەتىلدى. ءدال وسىنداي يگىلىك «جاسىل قازاقستان», «اگروونەركاسىپتىك كەشەن» جوبالارى ارقىلى ۇيلەستىرىلىپ وتىر, – دەيدى باسقارما باسشىسى, – ايتالىق, «يندۋستريالىق-يننوۆاتسيالىق دامۋ» باعىتى بويىنشا وبلىستىڭ 256 تۇرعىنى جۇمىسقا ورنالاستى.
بۇل ارادا جاستارعا قۇلاققاعىس رەتىندە ايتا كەتەتىن ءبىر ماسەلە بار. نەعۇرلىم سۇرانىسقا يە, بولاشاعى بار ماماندىقتاردى يگەرگەن ءجون. ءار جىل سايىن اتا-انالار باۋىر ەتى بالالارىن ايتەۋىر تەگىن وقىتامىز دەپ جۇرەكتەرى قالاماعان ماماندىقتارعا بەرەتىنىن كوز كورىپ ءجۇر. تەگىن وقۋ. كۇنى ەرتەڭ سول جاستار الگى ماماندىق بويىنشا جۇمىس ىستەي مە, جوق پا, ول ءدال سول ساتتە ەشكىمدى قىزىقتىرمايدى. ناتيجەسىندە, جاستىق شاعىنىڭ قانشاما جىلى بوسقا وتەدى. ماسەلەن, پەداگوگيكالىق وقۋ ورنىن بىتىرگەن كەيبىر جاستار مەكتەپكە بارعىسى كەلمەيدى. بىراق وسى ماماندىق بويىنشا وقىپ, ءبىلىم العان. امال جوق, جۇمىسسىزداردىڭ سانىن كوبەيتەدى. مىنە, وسىنداي قاتەلىكتەرگە جول بەرىلمەسە ەكەن دەيمىز. قازىر ەڭبەك نارىعىندا سۇرانىسقا يە ماماندىقتاردى وقىتۋ قولعا الىنعان. جەمىسى دە جوق ەمەس. جىل باسىنان بەرى 500-دەن استام جاس قىسقا مەرزىمدى كۋرستاردا وقىپ شىعىپ, جۇمىسقا ورنالاستى.
ءوڭىردىڭ 3 275 تۇرعىنى سۋبسيديالاناتىن جۇمىس ورىندارىمەن قامتاماسىز ەتىلگەن. جاستاردىڭ ماسەلەسى دە نازاردا. بيىل جوعارى وقۋ ورىندارى مەن كوللەدجدەردىڭ 537 تۇلەگى ەڭبەك جولىن باستاعان. وسىلايشا, ادامداردىڭ تۇرمىس دەڭگەيىن جاقسارتۋ باعىتىندا اۋقىمدى ءىس اتقارىلىپ جاتىر.
اقمولا وبلىسى
