مەموراندۋم اياسىندا قازاقستاندىق توعىزقۇمالاق فەدەراتسياسىنىڭ ۇلتتىق سپورت تۇرلەرى قاۋىمداستىعىنا قوسىلۋى تۋرالى حابارلاندى. سونداي-اق ەكى ۇيىم اراسىنداعى ارىپتەستىك توعىزقۇمالاقتى دامىتۋدى, سالاۋاتتى ءومىر سالتىن قالىپتاستىرۋ بويىنشا ناقتى ءىس-شارالار جوسپارىن ازىرلەۋدى كوزدەيدى.
سالتاناتتى راسىمگە ۇلتتىق سپورت تۇرلەرى قاۋىمداستىعىنىڭ پرەزيدەنتى يسلامبەك سالجانوۆ پەن دۇنيەجۇزىلىك توعىزقۇمالاق فەدەراتسياسىنىڭ پرەزيدەنتى ءاليحان بايمەنوۆ قاتىستى.
«بۇگىن قول قويىلاتىن قۇجاتتىڭ ءمانىسى – توعىزقۇمالاق فەدەراتسياسى ۇلتتىق سپورت تۇرلەرى قاۋىمداستىعىنا قوسىلادى. ەندى بىرلەسە وتىرىپ, ۇلتقا پايدالى تالاي جوبالاردى جۇزەگە اسىرامىز دەپ ويلايمىن. بۇل كەزدەسۋ – ۇلتتىق سپورت سالاسىنداعى ۇلكەن وزگەرىستىڭ باسى. ءبىلىمدى, اقىلدى, پاراساتتى جاستار – ۇلت بولاشاعى. ال توعىزقۇمالاق ويىنى – جاس ۇرپاققا ۇشقىر ويلاۋدى, ستراتەگيالىق جوسپارلاۋدى جانە تاباندىلىقتى ۇيرەتەدى», دەدى قاۋىمداستىق باسشىسى يسلامبەك سالجانوۆ.
ءوز كەزەگىندە دۇنيەجۇزىلىك توعىزقۇمالاق فەدەراتسياسىنىڭ باسشىسى ءاليحان بايمەنوۆ بۇل باسقوسۋدىڭ توعىزقۇمالاقتى دامىتۋداعى ماڭىزىن اتاپ ءوتتى.
«ۇلتتىق سپورت ءتۇرى رەتىندە توعىزقۇمالاقتى دامىتۋ ەكى ۇيىمنىڭ دا ماقساتىنا كىرەدى. ال وسى ىستە كۇش بىرىكتىرىپ, ءىس-قيمىلىمىزدى, شارالارىمىزدى ۇيلەستىرىپ وتكىزۋدەن, ءبىر-بىرىمىزگە قولداۋ كورسەتۋدەن ۇتاتىن توعىزقۇمالاق», دەدى ول.
تاراپتار قاراشا ايىندا اقتوبەدە وتەتىن توعىزقۇمالاقتان 6-ءشى الەم چەمپيونىن ابىرويمەن وتكىزۋ كەرەكتىگىنە توقتالدى. ۇلتتىق سپورت تۇرلەرى قاۋىمداستىعىنىڭ پرەزيدەنتى يسلامبەك سالجانوۆ دوداعا قازاقستاندىق سپورتشىلاردىن دايىندىعىن جەتىلدىرۋ قاجەتتىلىگىنە توقتالدى.
20-28 قاراشا كۇندەرى وتەتىن الەم بىرىنشىلىگىنە ۇلىبريتانيا, چەحيا, گەرمانيا, لاتۆيا, اقش, كولۋمبيا, انتيگۋا مەن باربۋدا, ءۇندىستان, ەفيوپيا, رۋمىنيا, ۋكراينا, رەسەي, قىتاي, تۇركيا, موڭعوليا, وزبەكىستان, قىرعىزستان, تۇركمەنستان, تادجىكستان, ازەربايجان مەن مولدوۆادان 80-گە جۋىق سپورتىشىلار قاتىسادى دەپ جوسپارلانعان.
