ناۋقاس اۋرۋحاناعا 9 قازان كۇنى وتە اۋىر حالدە تۇسكەن-تۇعىن. جەدەل تەكسەرۋدەن ءوتۋ بارىسىندا ونىڭ سول جاق ميىنىڭ ورتاڭعى ارتەرياسىندا ترومبوز بەلگىلەرىنىڭ بارى انىقتالدى. دارىگەرلەر كوپ ويلانباستان وعان ينسۋلت دياگنوزىن قويادى. ناقتىراق ايتقاندا, يشەميالىق ينسۋلت – قان تامىرلارىنىڭ ترومبتارمەن بىتەلۋى. بۇعان قوسا ناۋقاستىڭ وڭ جاق اياعى مەن قولى تولىعىمەن سالدانىپ, سويلەۋ جانە ەستۋ قابىلەتىنەن ايىرىلادى.
دەرتكە شالدىققان ازاماتتىڭ اۋرۋحاناعا جەتكەن ساتتە ينسۋلت العانىنا ءۇش ساعاتتان استام ۋاقىت بولىپتى. دارىگەرلەر سول ارادا وعان شۇعىل تۇردە وپەراتسيا جاساۋعا شەشىم قابىلداپ, ول انگيوگرافيا اپپاراتى ارقىلى, ياعني پىشاق تىلىگىنسىز وتەدى.
قاۋىپسىز وتا اۋرۋحانانىڭ باس دارىگەرى ءارى قالانىڭ شتاتتان تىس باس رەنتگەنحيرۋرگى, جوعارعى ساناتتى دارىگەر ا.راحماتاليەۆ پەن اۋرۋحانانىڭ رەنتگەنحيرۋرگى ن.قاراباەۆتىڭ قولىمەن مايدان قىل سۋىرعانداي اسا نازىك ءارى جوعارى دالدىكپەن جۇرگىزىلدى. باس-اياعى ەكى ساعاتقا سوزىلعان وپەراتسيا ءساتتى اياقتالىپ, دارىگەرلەردىڭ كومەگىمەن ناۋقاس جانى اجالدان امان قالدى.
«انگيوگرافيالىق اپپارات ارقىلى ترومبوەكتوميا جاسادىق. بۇل نەگىزىنەن كۇردەلى وپەراتسيا سانالادى. بىراق زاماناۋي مەديتسينالىق قۇرىلعىنىڭ كومەگىمەن بۇگىندە مۇنداي وتانى جاساۋدىڭ قيىندىعى ازايىپ, اۋرۋدىڭ تەز اياققا تۇرىپ كەتۋ مۇمكىندىگى ارتتى. قازىرگى تاڭدا ناۋقاس ءوزىن وتە جاقسى سەزىنەدى. ءوزى تۇرىپ-ءجۇرىپ, سۇراقتارعا تولىق جاۋاپ بەرە الادى. وسى رەتتە ايتا كەتكەن ءجون, №2 قالالىق اۋرۋحانانىڭ ينسۋلت ورتالىعى 3-دەڭگەيدە جۇمىس ىستەيدى. ەگەر ادام ينسۋلت الىپ قالىپ, دەرتى مەڭدەمەي تۇرىپ 4-6 ساعات ارالىعىندا شۇعىل اۋرۋحاناعا كەلىپ تۇسەتىن بولسا, جوعارى ساپالى مامانداندىرىلعان تەحنولوگيالىق مەديتسينالىق كومەك بەرىپ ۇلگەرەمىز. مۇندايدا كوپتەگەن ادامدى امان الىپ قالۋعا مۇمكىندىگىمىز جوعارى بولادى», – دەيدى ورتالىق مەڭگەرۋشىسى ر.يسابەك ۇلى.
ال 52 جاستاعى ناۋقاس وپەراتسيادان سوڭ ءبىر ساعات ىشىندە تولىق ەسىن جيناپ, وڭ جاق اياق-قولىنىڭ قىزمەتى قالپىنا كەلىپ, بۇرىنعى قالپىنا تولىعىمەن ورالدى. سويلەۋ, ەستۋ قابىلەتى دە قايتا قالپىنا كەلدى. وتادان سوڭ ءبىر كۇن بويى قارقىندى تەراپيا بلوگىندە باقىلاۋدا بولىپ, كەلەسى كۇنى پالاتاعا اۋىستىرىلدى. قازىرگى تاڭدا دارىگەرلەر جاعدايىن جاقسى دەپ باعالاپ وتىر.
ءوز كەزەگىندە اق جەلەڭدى ابزال جانداردىڭ كومەگىمەن دۇنيە ەسىگىن قايتا اشقان ناۋقاس وسى قالتقىسىز قىزمەتتەرى ءۇشىن دارىگەرلەرگە شەكسىز العىسىن جاۋدىردى.
جالپى, انگيوگرافيالىق اپپارات شىمكەنتتە №2 قالالىق اۋرۋحانادا, قالالىق كلينيكالىق بالالار اۋرۋحاناسىندا جانە ونكولوگيالىق ورتالىق پەن №1 قالالىق كلينيكالىق اۋرۋحاناسىندا بار.
