ايگىلى سپورتشى 1962 جىلى اقمولا وبلىسىنىڭ اتباسار اۋدانىندا دۇنيەگە كەلدى. ول بالا كەزىندە كوپ قيىندىق كوردى. رەت-رەتىمەن بايانداساق, توليك ءتورت جاسقا تولعاندا اناسى سال اۋرۋىنا دۋشار بولدى. ال اكەسى شيتتەي بالالارىن تاستاپ, باسقا جاققا كوشىپ كەتتى. سول كەزدە ءۇي شارۋاسىنىڭ بار اۋىرتپالىعى اناتولي مەن اعاسى اندرەيدىڭ يىعىنا ءتۇستى. تاعدىر تاۋقىمەتىن مولىنان تارتقان بالالار ەرتە ەسەيدى. حراپاتىيلار وتباسى اۋدان ورتالىعىنا قونىس اۋدارعاننان كەيىن تالاپشىل جەتكىنشەكتىڭ سپورتتىڭ سوقپاعىنا تۇسۋىنە مۇمكىندىك تۋدى. 14 جاستان اسقان شاعىندا اتباسار قالاسىنداعى اۋىر اتلەتيكا ۇيىرمەسىنىڭ تابالدىرىعىن اتتاعان توليك سپورتتىق كارەراسىن اياقتاعانعا دەيىن بىلىكتى باپكەر الەكساندر سيدوروۆتىڭ قول استىندا جاتتىقتى.
سپورتتاعى العاشقى قادامدارى جايىندا كەزىندە كەيىپكەرىمىزدىڭ ءوزى بىلاي دەپ اڭگىمەلەگەن ەدى: «سول كەزدەرى كانادانىڭ مونرەال قالاسىندا جازعى وليمپيا ويىندارى ءوتىپ جاتتى. بۇل 1976 جىل ەدى. ءدال سول ۋاقىتتا مەن سپورتقا قۇمارتا باستادىم. بىردە ۇيگە كەلىپ, تەلەديداردى قوسسام, اۋىر اتلەتتەردىڭ باسەكەسىن كورسەتىپ جاتىر ەكەن. ماعان داۆيد ريگەرتتىڭ ونەرى قاتتى ۇنادى. تۇلعاسى كەلىسكەن جىگىت ءوزى تاپسىرىس بەرگەن باتپان تەمىردى ىرقىنا وڭاي كوندىرىپ, وليمپيادا چەمپيونى اتاندى. ۋاقىت وزا بۇل جىگىتتىڭ ءبىزدىڭ جەرلەسىمىز, ىرگەدەگى كوكشەتاۋ ءوڭىرىنىڭ تۋماسى ەكەنىن ءبىلدىم. ەسەيە كەلە ريگەرت كۋبانعا, ودان كەيىن روستوۆ وبلىسىنا قونىس اۋدارىپتى. مەن سول ساڭلاققا ەلىكتەپ ءوستىم».
اسقان دارىن يەسى اراعا جىلدار سالىپ, جەر-جاھانداعى ەڭ ۇزدىك زىلتەمىرشىلەردىڭ بىرىنە اينالدى. سەكسەنىنشى جىلدارى وعان كۇللى كسرو-دا تەڭ كەلەر ەشكىم تابىلمادى. حراپاتىي 1985-1990 جىلدارى قاتارىنان بەس رەت الەم جانە بەس رەت ەۋروپا چەمپيونى اتاندى. سول جارىستاردا سان مارتە دۇنيەجۇزىلىك رەكوردتاردى جاڭارتىپ, ميلليونداعان جانكۇيەردىڭ ىستىق ىقىلاسىنا بولەندى. 1988 جىلى سەۋلدە الاۋى تۇتانعان وليمپيا ويىندارىندا 90 كيلودا سىنعا تۇسكەن قازاقستاندىق سپورتشى الدىنا جان سالماي, باس جۇلدەنى ولجالادى. قوسسايىستىڭ قورىتىندىسى بويىنشا ول 412,5 (187,5+225) كيلولىق زىلتەمىردى ەڭسەردى. سونداعى ءاناتوليدىڭ مىقتىلىعىن ايتساڭىزشى, سەۋلدەگى باستى باسەكەلەسى ءارى كوماندالىق ارىپتەسى نايل مۋحامەدياروۆتىڭ وزىنە باس كوتەرتپەدى. اتالعان جارىستا جەرلەسىمىز وزبەكستاننىڭ تۋماسىنان باقانداي 12,5 كيلو ارتىق كوتەردى. ءدال سول مەجەگە كەلىپ توقتاعان پولشالىق سلاۆومير زاۆادا قولا مەدالدى قاناعات تۇتتى.
1992 جىلى اناتولي حراپاتىي تمد قۇراماسى ساپىندا بارسەلونا وليمپياداسىندا كۇش سىناسۋعا ءتيىس ەدى. الايدا باپكەرلەردىڭ تاڭداۋى 23 جاستاعى كاحي كاحياشۆيليگە ءتۇستى. گرۋزيانىڭ الىبى پيرەنەي تۇبەگى ساپارىنان التىن مەدالمەن ورالدى. بىراق, شىنتۋايتىنا كەلسەك, سول دودادا حراپاتىي ونەر كورسەتكەندە, ونىڭ الدىنا ەشكىم تۇسە المايتىنى انىق ەدى. ونى باپكەرلەر دە, باسقالار دا مويىندايدى. بىراق وتانداسىمىزعا ونداي مۇمكىندىك بەرىلمەدى. ال بارسەلوناعا بارا الماعاندىعىنىڭ سەبەبىن اناتولي ءوزى «توقسانىنشى جىلداردىڭ باسىندا كسرو, ودان كەيىن تمد قۇراماسىنىڭ تىزگىنىن ۇستاعان ۆاسيلي الەكسەەۆپەن قارىم-قاتىناسىمىز اسا جاقسى بولمادى. كەزىندە ول وليمپيا ويىندارىن ەكى مارتە جانە الەم مەن ەۋروپا چەمپيوناتتارىن سەگىز رەتتەن ۇتقان. ايگىلى سپورتشى جاتتىقتىرۋشىلىق قىزمەتكە كەلگەننەن كەيىن اتاق-داڭقى جاعىنان كەلەشەكتە وزىنەن اسىپ تۇسەدى-اۋ دەگەن اۋىر اتلەتتەرگە قىرىن قاراي باستادى. ماعان جانە مەن سەكىلدى داڭقى دۇركىرەپ تۇرعان ساڭلاقتارعا ءجيى شۇيلىگىپ, بارلىعىمىزدى بىرقاتار ماڭىزدى جارىستان شەتتەتتى. سول الەكسەەۆتىڭ كەسىرىنەن مەن بارسەلونا وليمپياداسىنا قاتىسا المادىم», دەپ ءتۇسىندىردى.
كەڭەس وداعى ىدىراعاننان كەيىن حراپاتىي تاۋەلسىز قازاقستاننىڭ تۋى استىندا ونەر كورسەتىپ, ەلەۋلى تابىستارعا جول جەتكىزدى. اتاپ ايتساق, 1993 پەن 1995 جىلدارى مەلبۋرن مەن گۋانچجوۋدا وتكەن الەم چەمپيوناتتارىندا قولا مەدال يەلەندى. 1994 پەن 1998 جىلدارى حيروسيما مەن بانگكوكتا الاۋى تۇتانعان ازيا ويىندارىندا كۇمىسپەن كۇپتەلدى. ال 1996 جىلى اتلانتا وليمپياداسىندا ول كۇمىس مەدال جەڭىپ الدى. عاسىرلار توعىسىندا ۇلكەن سپورتتان قول ۇزگەننەن كەيىن دە اناتولي اۋىر اتلەتيكادان الىستاعان جوق. بىرەر جىل قازاقستان ۇلتتىق قۇراماسىنىڭ باس باپكەرى بولسا, كەيىننەن ارمياشىلاردىڭ ورتالىق سپورت كلۋبىندا جاتتىقتىرۋشىلىق قىزمەت اتقاردى.
2008 جىلدىڭ 11 تامىزىندا استانانىڭ ىرگەسىندەگى ارشالى اۋىلىنىڭ ماڭىندا اناتولي حراپاتىي تىزگىندەگەن موتوتسيكل قارسى باعىتقا شىعىپ كەتكەن «تويوتا» كولىگىمەن سوقتىعىسىپ, داڭقتى سپورتشى سول جەردە ءجانتاسىلىم ەتتى.
