توقسان اۋىز ءسوزدىڭ توبىقتاي ءتۇيىنى – بۇل كۇندەرى تانىمال قىلقالام شەبەرلەرى الپىسباي قازىعۇلوۆ, قىرعىز سۋرەتشىسى جانىبەك بەردىكەەۆ پەن وزبەك سۋرەتشىسى نودير بوبومۇرادوۆتىڭ تۋىندىلارى الماتىداعى «Almaty Resort» شيپاجايىندا اشىلعان كوركەمسۋرەت گالەرەياسىنان ورىن الدى. تۇركى الەمىنىڭ ءۇش زاماناۋي وكىلى, بەينەلەۋ ونەرى مايتالماندارىنىڭ تۋىندىلارى قازاقستان, قىرعىزستان, وزبەكستاندا عانا ەمەس, اقش, جاپونيا, ۇلىبريتانيا, تۇركيا, قىتاي مەن بەلگيا مۇراجايلارىندا دا مەنمۇندالاپ تۇر.
قاراپ وتىرساق, ەۋروپاداعى شيپاجايلاردا مۇنداي كورمەلەر ءوتىپ تۇرادى. بۇل ەم الۋعا, دەمالۋعا كەلگەن جاندار ءۇشىن تاپتىرمايتىن ءارى ۋاقىت ۇنەمدەيتىن تاماشا مۇمكىندىك. ال الماتىداعى شيپاجايدىڭ جوعارى قاباتىن تۇگەل الىپ جاتقان العاشقى كورمەنى ۇيىمداستىرۋعا الەمدىك بەينەلەۋ ونەرىنە قوسقان ۇلەسى ءۇشىن ەۋروپا ونەر وداعىنىڭ سىيلىعىن العان, قازاقستان سۋرەتشىلەر وداعىنىڭ مۇشەسى الپىسباي قازىعۇلوۆ ۇيىتقى بولدى.
– مەنىڭ تۋىندىلارىمدى ءتۇسىنۋ ءۇشىن كورەرمەنگە ۋاقىت كەرەك. شيپاجايدا دەمالۋشىلاردا بۇل مۇمكىندىك بار. ال وزبەكستان, قىرعىزستان سۋرەتشىلەرىنىڭ كارتيناسىندا يدەيا ايقىن, تۇسىنىكتى جانە جان جادىراتادى. سوندىقتان گالەرەياداعى تۋىندىلار ءوزارا ۇيلەسىم تاۋىپ تۇر. سالۆادور دالي ايتقانداي, سۋرەتشى رەتىندە جەتىلە بەرۋدەن قورىقپاۋ كەرەك, ءبارىبىر ونەردىڭ تۇبىنە جەتپەيسىڭ. ال سۋرەتشىگە قاراپايىم شىنشىلدىق جانە ءوز يدەيالارىڭا ساتقىندىق جاساماۋ كەرەك دەپ ەسەپتەيمىن. مەن ءوزىمدى 45 جىل بويى ىزدەدىم, بەينەلەۋ ونەرىندەگى ءوز قولتاڭبامدى قاشاپ شىعارۋ ءۇشىن وسىنشا جىل ىزدەندىم, باستاپقىدا ناتۋرا سالاتىنمىن, قازىر ءبارى جۇرەگىمنەن شىعادى.
– سۋرەتشىگە ءوز ەركىندىگى مەن ازاتتىعىن ساقتاپ, سۇرانىسقا دا يە بولۋى ءۇشىن نە قاجەت؟
– بىردە تاپسىرىسپەن 20 كۇن تاپجىلماي ناتيۋرمورت سالعانىم بار, الايدا ول تاپسىرىس يەسىنە ۇناماعاننان كەيىن, وزىمە قالدىردىم, بىراق وزىمە ۇنادى. بۇلاي جۇمىس ىستەگەن وتە قيىن, تاپسىرىس بەرۋشىلەردىڭ ايتەۋىر بىردەڭەگە كوڭىلى تولمايدى, ەركىندىگىڭدى شەكتەيدى, بوياۋىن قالىڭداتقىسى كەلەدى. پورترەت سالعىزسا, كوزىمدى ۇلكەيت, كويلەگىمدى وزگەرت دەگەن سياقتى تالاپتار قويا باستايدى. مەن بۇلاي جۇمىس ىستەي المايمىن, ونەردەن تابىس تابۋ ءۇشىن جادىگەر جيناۋمەن اينالىسامىن. ءوز يدەيالارىڭا ادال بولىپ قالۋ ءۇشىن كەز كەلگەن تىعىرىقتان شىعۋعا بولادى, – دەيدى تانىمال يمپرەسسيونيست الپىسباي قازىعۇلوۆ.
بيىل 55 جىلدىعىن اتاپ وتەتىن Almaty resort شيپاجايىندا سالتانات قۇرىپ تۇرعان كورمەگە وسى باستاماعا ۇيىتقى بولعان مەتردىڭ تاڭداۋىمەن, بەينەلەۋ ونەرىنىڭ بەلدى وكىلدەرىنەن بولەك, جاس سۋرەتشىلەردىڭ دە جۇمىستارىنا دا ورىن بەرىلدى.
الماتى
