«وتكەن اپتادا استانادا بىرقاتار ءىرى حالىقارالىق ءىس-شارا ءوتتى. قازاقستان تاعى دا جاھاندىق ديالوگتىڭ ورتالىعىنا اينالدى. بۇل تىكەلەي ءبىزدىڭ دايەكتى جانە تەڭگەرىمدى سىرتقى ساياساتىمىزدىڭ ناتيجەسى.
ءبىزدىڭ ەلىمىز بەيبىتشىلىك, ىنتىماقتاستىق جانە ءوزارا سەنىم قۇندىلىقتارىن دايەكتى جانە ءتيىمدى ىلگەرىلەتۋدە. سوندىقتان قازاقستان ءوزىن وزىق ءارى جاۋاپتى مەملەكەت رەتىندە كورسەتە وتىرىپ, جوعارى حالىقارالىق بەدەلگە يە بولدى. ستراتەگيالىق باعىتتى ۇستانا وتىرىپ, ءبىز الداعى ۋاقىتتا دا ەلىمىز بەن حالقىمىزدىڭ ۇزاق مەرزىمدى مۇددەلەرىن پراگماتيكالىق تۇرعىدان باسشىلىققا الۋىمىز كەرەك», دەدى پرەزيدەنت.
سونداي-اق قاسىم-جومارت توقاەۆ قازاقستاننىڭ تاۋەلسىز مەملەكەت رەتىندەگى ۇستانىمى الەمگە بەلگىلى بولۋ كەرەك ەكەنىن اتاپ ءوتتى.
«قازىرگى جاھاندىق الەمدە بەلسەندى سىرتقى ساياساتسىز تابىستى دامۋ مۇمكىن ەمەس. قازاقستاننىڭ تاۋەلسىز مەملەكەت رەتىندەگى ۇستانىمى الەمگە بەلگىلى بولۋى كەرەك, ءبىزدىڭ داۋىسىمىز بۇكىل حالىقارالىق قاۋىمداستىققا تانىلۋى ءتيىس», دەدى مەملەكەت باسشىسى.
