سۋرەتتى تۇسىرگەن دميتري ەروفەەۆ
جالپى, بەسقاينار اۋىلىندا 152 ءتۇتىن بار. بۇل – كوكسۋ اۋدانى بويىنشا كوگىلدىر وتىنعا قوسىلىپ جاتقان ءتورتىنشى اۋىل. 18 قازان كۇنى تاعى 3 اۋىل (جامبىل, مامبەت, امانگەلدى) گازبەن قامتىلدى. جىل سوڭىنا دەيىن تاعى 4 اۋىلعا گاز تارتىلسا, 12 اۋىلدىڭ جوبالىق-سمەتالىق قۇجاتتارى دايىن بولادى. كەلەسى جىلى تاعى 12 اۋىلعا گاز تارتىلماق. وسىلايشا, اۋدانداعى بارلىق اۋىلدى گازداندىرۋدى جوسپارلاپ وتىر.
جەتىسۋ وبلىستىق ەنەرگەتيكا جانە تۇرعىن ءۇي-كوممۋنالدىق شارۋاشىلىعى باسقارماسىنىڭ باسشىسى ەرنات ءبازىل: «قاراپايىم حالىققا ەڭ الدىمەن جىلۋ, تازا سۋ كەرەك. وسىعان وراي وڭىرگە گاز تارتىلدى. جەتىسۋ ءوز الدىنا وبلىس بولعاننان كەيىن وبلىس اكىمىنىڭ تاپسىرماسىمەن قانشا اۋىلعا گاز تارتۋ كەرەكتىگىن تەكسەردىك. ناتيجەسىندە, 192 اۋىل گازعا قوسىلۋ كەرەكتىگى انىقتالدى. بيىل بىزدە 22 جوبا باستالدى. ونى كەلەسى جىلى اياقتايمىز دەپ جوسپارلاپ وتىرمىز. 28 جوبانىڭ سمەتالىق-قۇجاتتارى دايىن», دەيدى ە.ءبازىل.
2025 جىلعا دەيىن قاراتال, كوكسۋ, كەربۇلاق, ەسكەلدى اۋداندارى مەن تەكەلى جانە تالدىقورعان قالاسى تولىقتاي كوگىلدىر وتىنمەن قامتىلماق. وسى رەتتە گازدى ۇيىنە مەملەكەت تاراپىنان تەگىن قوسقان كوپبالالى انا بيبىگۇل كوبەگەنوۆا قۋانىشىن جاسىرمادى.
«وسى ۇيدە 1978 جىلدان بەرى تۇرامىز. كۇيەۋىمنىڭ قايتىس بولعانىنا 22 جىل بولدى. 10 جىلدان كەيىن ۇلكەن قىزىم ومىردەن ءوتىپ, ارتىندا ءۇش بالا قالدى. وتباسىمىزدا 2 مۇمكىندىگى شەكتەۋلى ادام بار. جالپى, 11 ادام تۇرامىز. بۇرىن ءبىز كومىر تاسىپ, اعاش كەسەتىنبىز», دەدى ب.كوبەگەنوۆا.
ايتا كەتەيىك, اۋداندا گازعا قوسىلۋ جۇمىستارىنىڭ قۇنى – 170 مىڭ تەڭگە. سونداي-اق «جەتىسۋوبلگاز» جشس-نان ماتەريالدار مەن گاز قازاندىعىن 10 ايعا دەيىن ءبولىپ تولەۋ جانە حالىقتىڭ الەۋمەتتىك وسال توپتارى ءۇشىن «BSP GROUP LTD» جشس-نان 20%-عا دەيىن جەڭىلدىكتەر قاراستىرىلعان. گازعا قوسۋدى «ST LTD», «ST GAZ», «Cك مۋسليم», «اياكس-78» جانە «سۇڭقار-2002» جشس-تارى جۇرگىزەدى.
جەتىسۋ وبلىسى
