ەلىمىز بويىنشا 20 مىڭعا جۋىق كىتاپحاناشىنىڭ اراسىنان جىلىنا تەك بىرەۋىنە عانا بەرىلەتىن مارتەبەنى «قازاقستاندىق كىتاپحانالىق وداق» زتب توراعاسى باقىتجامال وسپانوۆا تاپسىردى. «جىل سايىن وداقتىڭ كەزەكتى وتىرىسى ۇيىمداستىرىلىپ, ءتۇرلى ماسەلەلەر تالقىلانادى. بيىلعى جيىندا «مادەنيەت تۋرالى» زاڭنىڭ 24-بابى – كىتاپحانا ءىسى بويىنشا وزگەرىس ەنگىزۋ تۋرالى قاراستىرىلىپ, كىتاپحاناشىلار ءوز ۇسىنىستارىن ءبىلدىردى. ءارى قاراي زاڭ جوباسى پارلامەنتكە ۇسىنىلاتىن بولادى. ال اتالعان نوميناتسياعا لايىقتى بولۋ ۇلكەن جاۋاپكەرشىلىك, سەنىم ارتىلعانىن دا بىلدىرەدى. بۇل – تۇركىستان وبلىسىنداعى 395 كىتاپحانانىڭ بىرلەسە اتقارعان ەڭبەگىنىڭ ناتيجەسى», دەيدى جانات سادىبەكقىزى. سونداي-اق اقتوبە وبلىسىنىڭ مادەنيەت, ارحيۆتەر جانە قۇجاتتاما باسقارماسى مەن اقتوبە وبلىستىق زاعيپتار جانە ناشار كورەتىن ازاماتتاردىڭ ارناۋلى كىتاپحاناسىنىڭ ۇيىمداستىرۋىمەن وتكەن «ەرەكشە كىتاپتار الەمى» جوباسى اياسىنداعى «كەڭىستىكتە باعدارلاۋ» رەسپۋبليكالىق بايقاۋىنىڭ قورىتىندىسى بويىنشا تۇركىستان وبلىستىق «فاراب» امبەباپ عىلىمي كىتاپحاناسى III ورىنعا يە بولىپ, ارنايى ديپلوممەن ماراپاتتالدى. ەكى اي كولەمىندە زاعيپ, كوزى ناشار كورەتىن بالالارعا ارنالعان تاكتيلدى كىتاپتاردى كىتاپحانا قىزمەتكەرلەرى اليا جۇمابەك پەن دانا بايداۋلەتوۆا, اينۇر سۇلتانبەكوۆا ءوز قولىمەن تىككەن بولاتىن.
وسى ارادا ايتا كەتەلىك, جاقىندا كىتاپحانا قىزمەتكەرلەرى وسى كۇنگە دەيىن ەڭ كوپ كىتاپ وقىعان ءۇش وقىرماندى انىقتادى. كىتاپحانا قىزمەتكەرلەرى بۇل باعىتتاعى جۇمىستى جالعاستىرىپ جىل سوڭىندا «التىن فورمۋليار» يەسىن ارنايى ماراپاتقا ۇسىنباق. كىتاپحانا ديرەكتورى جانات شارداربەكوۆا فورمۋلياردا وقىرماننىڭ كىتاپحانادان العان كىتاپتارى جازىلاتىنىن, سوندىقتان جىل سوڭىنا دەيىن «التىن فورمۋليار» يەسى اتانىپ, سىي-سياپاتقا يە بولۋعا اركىمنىڭ-اق تالاسى بارىن ايتادى. ال بۇگىنگە دەيىن وڭىردە ەڭ كوپ كىتاپ وقىعان ءۇش ازاماتتىڭ ءبىرى – وتەگەن ىسقاق ۇلى. تۇركىستان قالاسىنىڭ تۇرعىنى وتەگەن قاريا 40 جىل تەمىرجول سالاسىندا جۇمىس ىستەگەن. زايىبى ەكەۋى 3 ۇل, 2 قىز تاربيەلەپ ءوسىرىپ, بۇگىندە سول پەرزەنتتەرىنەن نەمەرە-شوبەرە ءسۇيىپ وتىرعان باقىتتى اتا مەن اجە. كىتاپحانا اشىلعالى بەرى بۇگىنگە دەيىن 38 كىتاپ وقىعان وتەگەن قاريا جاقىندا كىتاپحانادان جازۋشى توكەن الجانتەگىنىڭ «ەلەڭ-الاڭ جالعان-اي» اتتى اڭگىمەلەر مەن حيكاياتتار جيناعىن جانە قانات ابىلقايىردىڭ شىعارمالارىن العان. ال بۇگىنگە دەيىن 23 كىتاپ وقىعان 23 جاستاعى شەرحان سامات ۇلى الماتى قالاسىندا دۇنيەگە كەلگەن. ماماندىعى – اكتەر. استاناداعى قازاق ۇلتتىق ونەر ۋنيۆەرسيتەتىن دراما تەاتر جانە كينو ءارتىسى ماماندىعى بويىنشا تامامداعان جاس مامان وتكەن جىلى تۇركىستاندا جاڭادان اشىلعان سازدى-دراما تەاترىنا قابىلدانعان. زامانداستارىن كىتاپ وقۋعا دەگەن داعدىنى مىقتاپ قالىپتاستىرۋعا شاقىرعان شەرحان جازۋشى شىڭعىس ايتماتوۆ پەن ءىلياس ەسەنبەرليننىڭ شىعارمالارىن ءسۇيىپ وقيدى ەكەن. «فاراب» كىتاپحاناسىنا ءجيى باس سۇعاتىنداردىڭ تاعى ءبىرى جانيزات سادىبەكوۆا تۇركىستانداعى حالىقارالىق تۋريزم جانە مەيماندوستىق ۋنيۆەرسيەتىنىڭ ەكىنشى كۋرس ستۋدەنتى. ساباقتان سوڭ, ياعني تۇستەن كەيىن مىندەتتى تۇردە كىتاپحاناعا باراتىن ول وقيتىن كىتاپتارىنىڭ ءتىزىمىن الدىن الا جاساپ الادى ەكەن. جوعارىدا ايتىپ وتكەنىمىزدەي, الداعى ۋاقىتتا ەڭ كوپ كىتاپ وقيتىندار قاتارى وزگەرىپ, ۇلعايا تۇسەرى انىق.
تۇركىستان وبلىسى
