شتاب مۇشەلەرى, زاڭگەرلەر ەركىن وڭعارباەۆ, ەرمەك ءابدىراسۇلوۆ, ينديرا اۋباكىروۆا, مارات ءباشىموۆ, ابدىكارىم اقجانوۆ قوعامدىق الاڭدا قولجەتىمدى دەرەككوزدەردى پايدالانا وتىرىپ, سايلاۋ ۇدەرىسىنىڭ بارىسى تۋرالى اعىمداعى جاعدايعا تۇسىنىكتەمە بەردى.
ە.وڭعارباەۆ شتابتىڭ جۇمىسى تۋرالى قىسقاشا بايانداپ, شتاب مۇشەلەرىنىڭ كونستيتۋتسيالىق رەفورما ەرەجەلەرىن قۇقىقتىق سۇيەمەلدەۋ, سايلاۋ زاڭناماسىنىڭ نەگىزگى ەرەجەلەرىن ءتۇسىندىرۋ, وڭىرلەردەگى سايلاۋ ۇدەرىسىنە قاتىسۋشىلارعا قۇقىقتىق كومەك كورسەتۋ جونىندەگى بەلسەندىلىگىن اتاپ ءوتتى.
ءوز كەزەگىندە پروفەسسور ە.ءابدىراسۇلوۆ ورتالىق سايلاۋ كوميسسياسى قابىلداعان شەشىمدەردىڭ اشىقتىعىن اتاپ ءوتتى. «ورتالىق سايلاۋ كوميسسياسىنىڭ رەسمي سايتى – نەگىزگى دەرەككوزى, ول جەردەن كەز كەلگەن ازامات قازاقستان رەسپۋبليكاسىنىڭ پرەزيدەنتتىگىنە كانديداتتارعا قاتىستى قابىلدانعان شەشىمدەرمەن تانىسا الادى», دەدى ول. سونداي-اق سپيكەر كانديداتتاردىڭ زاڭ تالاپتارىنا سايكەستىگىن باعالاۋ جونىندەگى ورتالىق سايلاۋ كوميسسياسى شەشىمدەرىنە, جەكەلەگەن كانديداتتاردى تىركەۋدەن باس تارتۋ سەبەپتەرىنە ەگجەي-تەگجەي توقتالدى.
ي.اۋباكىروۆا ورتالىق سايلاۋ كوميسسياسى اۋماقتىق سايلاۋ كوميسسيالارىنىڭ پرەزيدەنتتىككە كانديداتتى قولداۋعا قول قويۋدىڭ دۇرىستىعىن تەكسەرۋ مەرزىمىن ون كۇننەن بەس كۇنگە دەيىن قىسقارتقانىن اتاپ ءوتتى.
پروفەسسور م.ءباشىموۆ بۇكىل سايلاۋ ۇدەرىسى بۇقارالىق اقپارات قۇرالدارى, وڭىرلەردەگى ەڭبەك ۇجىمدارىمەن كەزدەسۋلەر ارقىلى سايلاۋشىلاردىڭ نازارىنا وفلاين جانە ونلاين فورماتتا جەتكىزىلەتىنىن ايتتى. سونىمەن قاتار سايلاۋ زاڭناماسىن بۇزعانى ءۇشىن جاۋاپكەرشىلىك قاراستىرىلعانىن ەسكە سالدى.
