«قوناقجاي قازاقستان جەرىنە قوش كەلدىڭىزدەر. ەڭ الدىمەن, قازاقستاننىڭ تمد-عا توراعالىعى اياسىنداعى باستامالارىن قولداپ, وسى كۇندەرى استانادا ءوتىپ جاتقان حالىقارالىق ءىس-شارالارعا بەلسەندى قاتىسقاندارىڭىز ءۇشىن شىن جۇرەكتەن العىس ايتامىن. بۇگىن كەڭەس مۇشەسى رەتىندە تۇرىكمەنستان پرەزيدەنتى, قۇرمەتتى سەردار گۋربانگۋلى ۇلى بەردىمۇحامەدوۆ وتىرىسقا العاش رەت قاتىسىپ وتىر. وسى جەردەگى ارىپتەستەردىڭ جانە ءوزىمنىڭ اتىمنان سىزگە قوش كەلدىڭىز دەي وتىرىپ, جاۋاپتى مەملەكەتتىك قىزمەتىڭىزگە تابىس تىلەيمىن. تاۋەلسىز مەملەكەتتەر دوستاستىعىنا قاتىسۋشى مەملەكەتتەر باسشىلارى كەڭەسىنىڭ كەزەكتى وتىرىسىن اشىق دەپ جاريالايمىن», دەدى مەملەكەت باسشىسى.
سونداي-اق پرەزيدەنت بۇگىنگى جيىندا قارالاتىن ماسەلەلەردى اتادى.
«گۋمانيتارلىق سەرىكتەستىككە, قاۋىپسىزدىككە جانە ىنتىماقتاستىعىمىزدىڭ باسقا دا اسپەكتىلەرىنە قاتىستى ماڭىزدى ماسەلەلەر مەملەكەتتەر باسشىلارى كەڭەسىنىڭ قاراۋىنا ۇسىنىلىپ وتىر», دەدى ول.
