كونتسەرتتىك باعدارلامادا قازاق مۋزىكاسىنىڭ داستۇرلەرىن كورسەتەتىن شىعارمالار – ىقىلاستىڭ «جەز كيىك», داۋلەتكەرەيدىڭ «كوروعلى», دينانىڭ «ناۋىسقى», نۇرعيسا تىلەنديەۆتىڭ «اققۋ», ەرمۇرات ەسەنوۆتىڭ «مايرا», شولپان قورعانبەكتىڭ «جۇرەك سىرى», پول دە سەننەۆيلدىڭ «Wedding in the dream», كونستانتين شاحانوۆتىڭ «كەلتسكيە تانتسى» جانە ت.ب. وتاندىق جانە شەتەلدىك كومپوزيتورلاردىڭ شىعارمالارى ورىندالدى.
سازدى كەشتىڭ جەكە ورىنداۋشىسى – حالىقارالىق جانە رەسپۋبليكالىق بايقاۋلاردىڭ لاۋرەاتى, قازاقستاننىڭ گيننەس رەكوردتار كىتابىنا ەنگەن «قورقىت» ەتنو-ءانسامبلىنىڭ ءارتىسى گۇلدانا نۇراباەۆا. ءارتىستىڭ ايتۋىنشا, جەتىگەن – ەرەكشە ءۇندى اسپاپ. «جەتىگەنگە ارنالعان شىعارمالار از: بىرنەشە عانا جيناق بار. سوندىقتان حرەستوماتياعا ەنگەن ايگىلى شىعارمالاردى جەتىگەنگە ىڭعايلاپ جاساۋدى ۇيعاردىم. بۇل اسپاپتا كلاسسيكا دا, حالىق مۋزىكاسى دا كەرەمەت ەستىلەدى», دەدى ول.
ال «قورقىتتىڭ» كوركەمدىك جەتەكشىسى شولپان قورعانبەك جاس تالانت گۇلدانا نۇراباەۆانى جەكە ورىنداۋشى رەتىندە كوپشىلىككە تانىستىرۋدى كوپتەن جوسپارلاپ جۇرگەنىن ايتتى. «كونتسەرتتىڭ باستى يدەياسى – جەكە اسپاپ رەتىندە ءجيى ەستىلمەيتىن قازاقتىڭ شەرتپەلى كونە اسپابى جەتىگەندى ناسيحاتتاۋ», دەدى ش.قورعانبەك.
جالپى, اتالعان انسامبل ءاربىر ءارتىسىنىڭ ءبىر ەمەس, بىرنەشە اسپاپتى مەڭگەرۋىمەن ەرەكشەلەنەدى. وسىنداي امبەباپتىلىق ارقاسىندا ەتنو-انسامبل حالىق مۋزىكاسىن كەز كەلگەن قۇراممەن ورىنداي الادى.
