بۇل جول باسقا ەمەس, كاسىپكەر اباقتىعا بىرنەشە ۇيالى تەلەفوندى الىپ كىرمەكشى بولعان. ءتارتىپ ساقشىلارىنىڭ قىراعىلىعىنىڭ ناتيجەسىندە كۇدىكتىنىڭ جىمىسقى ارەكەتى جۇزەگە اسقان جوق.
جامبىل وبلىسى بويىنشا قىلمىستىق اتقارۋ جۇيەسى دەپارتامەنتىنە قاراستى №59 تۇزەۋ مەكەمەسىندە كەزەكتى قۇقىق بۇزۋشىلىق اشكەرە بولدى. 11 قازان كۇنى ساعات تۇسكى 13.00 شاماسىندا قىزمەتىن قىراعى اتقارىپ تۇرعان 3 اتقىشتار روتاسىنىڭ كەزەكشىسى ەفرەيتور ورالحان مامبەتالى جانە كينولوگيالىق قىزمەت ماماندارى ۆزۆودىنىڭ اعا مامانى كىشى سەرجانت باقىتجان بايدۋانوۆ مەكەمە قىزمەتكەرلەرىمەن بىرلەسىپ باقىلاۋ-وتكىزۋ پۋنكتىنە قۇرىلىس ماتەريالدارىن الىپ كەلگەن ا. ەسىمدى ازاماتتى ارنايى قۇرالمەن تەكسەرە باستايدى. ونىڭ اكەلگەن اعاش جانە فانەر تاقتالارى ءجاي اعاش بولماي شىقتى. تاقتايلاردىڭ اراسىنا كۇدىكتى زاتتار جاسىرىلعان ەكەن. بۇنى ساقشىلار بىردەن بايقاپ, ءتيىستى ادامدارعا حابار بەردى.
كولىكتەگى كۇدىك تۋدىرعان زاتتاردىڭ اراسىندا ءتۇرلى ماركاداعى 26 ۇيالى تەلەفون, 51 دانا سيم-كارتا جانە 25 دانا فلەش-كارتا تابىلدى.
كۇدىكتى سمارتفونداردى اعاش ماتەريالدارىنىڭ اراسىنا مۇقيات جاسىرىپتى. الايدا, قىراعى كوز قىزمەتكەرلەر مۇنىڭ ءوزىن ءمۇلت جىبەرمەي, دەر كەزىندە انىقتاعان. اتالعان فاكتى بويىنشا ءتيىستى ءىس-شارالار جۇرگىزىلىپ, كولىك جۇرگىزۋشىنى زاڭعا سايكەس جاۋاپكەرشىلىككە تارتۋ قاراستىرىلۋدا.
