الماتى وبلىسىنىڭ تۇرعىنى ارزىمايتىن اقشاعا 4 قۇل ساتىپ العان

استانا. 21 مامىر. الماتىدا ءوز تانىسىنان 4 ادامدى 60 مىڭ تەڭگەگە ساتىپ العان ازامات ۇستالدى. بۇل تۋرالى Today.kz حابارلادى. الماتى وبلىستىق ىشكى ىستەر دەپارتامەنتىنىڭ ءباسپاسوز قىزمەتى حابارلاعانداي, قاراساي اۋدانىنداعى ءبىر شارۋا قوجالىقتان ءتۇرلى جۇمىسقا جەگىلگەن وزبەك ازاماتى قاشىپ شىعادى. سودان كەيىن ول قۇقىق قورعاۋ ورگاندارىنا جاعدايىن ءتۇسىندىرىپ ارىز جازعان. وسى ارىز نەگىزىندە دەپارتامەنت قىزمەتكەرلەرى ىسكە كىرىسىپ, الگى شارۋاشىلىقتىڭ اۋماعىنان تاعى ءۇش وزبەكستان ازاماتىن كەزىكتىرەدى. قازىر پوليتسەيلەر باستى كۇدىكتى رەتىندە شارۋا قوجالىعىنىڭ باسشىسىن ۇستاپ وتىر. ال ول ءوز تۇسىنىكتەمەسىندە بۇل 4 جۇمىسشىنى ءوزىنىڭ تانىسىنان 60 مىڭ تەڭگەگە ساتىپ العانىن ايتادى. ىلە ادام ساتقان كۇدىكتى دە قولعا ءتۇسىپ, ول دا تۇسىنىكتەمە بەرۋدە. وسىعان بايلانىستى ادامدى بوستاندىعىنان زاڭسىز ايىرۋ, ەڭبەگىن پايدالانۋ جانە ساتۋ فاكتىسى بويىنشا قىلمىستىق كودەكستىڭ 126-بابى 3-ءبولىمى جانە 128-بابى 2-ءبولىمى بويىنشا كۇدىكتىلەرگە قاتىستى قىلمىستىق ءىس قوزعالدى. جولدىباي بازار. دەرەككوز: Today.kz. فوتو: aktobegazeti.kz.