VII استانا ەكونوميكالىق فورۋمى ءوز جۇمىسىن باستادى

استانا. 21 مامىر. بۇگىن استانادا  VII استانا ەكونوميكالىق فورۋم اشىلدى. بۇل تۋرالى egemen.kz ءتىلشىسى حابارلادى. اتالعان جيىن 2-ءشى دۇنيەجۇزىلىك داعدارىسقا قارسى كونفەرەنتسيامەن باستالدى. كونفەرەنتسيانىڭ كۇن تارتىبىنە «برەتتون-ۆۋدس كەلىسىمدەرىنىڭ 70 جىلدىعى: جاھاندىق قارجىلىق جۇيەنى قالپىنا كەلتىرۋ, سوڭعى ەكى ون جىلداعى قارجىلىق داعدارىستاردىڭ سالدارىن جويۋ» تاقىرىبى قويىلدى. 3 كۇنگە سوزىلاتىن فورۋم شەڭبەرىندە كونفەرەنتسيالار, سامميتتەر, سەسسيالار مەن ديالوگتار وتەدى. بۇلاردا تالقىلاۋعا تۇسەتىن ماسەلەلەر وزەكتىلىگىمەن ەرەكشە. دالىرەك ايتقاندا, الەمدىك ەكونوميكالىق ءوسىم, باسەكەگە قابىلەتتىلىكتى كوتەرۋ, ساۋدانى دامىتۋ مەن ەكونوميكالىق-الەۋمەتتىك اسپەكتىلەر سىندى جاعداياتتار اڭگىمە ارقاۋىنا اينالادى. ەستەرىڭىزگە سالا كەتەيىك, دۇنيەجۇزىندەگى ەڭ ءىرى حالىقارالىق فورۋمداردىڭ ساناتىنا جاتقىزىلاتىن, ءوزارا بايلانىستار ورناتۋدىڭ, ىسكەرلىك كەزدەسۋلەر وتكىزۋدىڭ مول مۇمكىندىگىن بەرەتىن استانا ەكونوميكالىق فورۋمى 2008 جىلدان بەرى تۇراقتى تۇردە وتكىزىلىپ كەلەدى. بيىلعى فورۋمعا الەمنىڭ 150 ەلىنەن 10 مىڭنان استام ادام قاتىسادى. VII استانا ەكونوميكالىق فورۋمى اياسىندا بۇعان دەيىن بىرقاتار ماڭىزدى كەزدەسۋلەر ۇيىمداستىرىلدى. بۇل شارالاردا بۇگىنگى باستى ەكونوميكالىق جانە الەۋمەتتىك كەدەرگىلەرمەن كۇرەسۋ تاسىلدەرى ىزدەستىرىلدى. جولدىباي بازار. دەرەككوز: egemen.kz. فوتو: akorda.kz.