قازاقستاندا العاش رەت 3D-تەحنولوگيانىڭ كومەگىمەن سىرقاتتىڭ جامباس سۇيەگىن قالپىنا كەلتىردى. ءبىرىنشى وپەراتسيا قازاق ونكولوگيا جانە راديولوگيا عىلىمي-زەرتتەۋ ينستيتۋتىنىڭ سۇيەكتەر, جۇمساق تىندەر مەن مەلانوما ىسىكتەرى ورتالىعىندا جۇرگىزىلدى.
«ناۋقاسقا الدىمەن مۋلتيديستسيپلينارلىق دارىگەرلەر توبى كەڭەس بەردى. بۇرىن مۇنداي دياگنوز قويىلعان كەزدە حيرۋرگتەر جامباس سۇيەكتەرىنىڭ زاقىمدالعان اۋماعىن الىپ تاستاۋعا ءماجبۇر ەدى. بۇل جامباس قۋىسىنىڭ تۇتاستىعىن بۇزىپ, ادامنىڭ ءجۇرىسىنىڭ وزگەرۋىنە, ناۋقاستىڭ ومىرتقاسىنىڭ قيسايۋىنا اكەلەدى. بۇل وپەراتسيانىڭ ارتىقشىلىعى, ەمدەلۋشىنىڭ جاسىن ەسكەرە وتىرىپ, ونكوحيرۋرگتەر ىسىكتى الىپ تاستاپ قانا قويماي, ناۋقاستىڭ ءومىر ساپاسىن دا ساقتاپ قالۋدى دا ماقسات تۇتتى», دەدى «قازوجرعزي» اق سۇيەكتەر, جۇمساق تىندەر مەن مەلانوما ىسىكتەرى ورتالىعىنىڭ باسشىسى, تاجىريبەلى ونكوحيرۋرگ عاني سەرىكباەۆ.
جوبا تۇرىندەگى وپەراتسيانى جاساۋ ءۇشىن قىتايلىق Koln 3D Technology كومپانياسىمەن قوسا گونكونگ ۋنيۆەرسيتەتىمەن بىرلەسىپ ۇزاق مەرزىمدى مەموراندۋم جاسالعان. وسى مامىلەدەن كەيىن ناۋقاستىڭ كت-دەرەكتەرى گونكونگقا جىبەرىلىپ, سول قالادا 3D-باسىپ شىعارۋ ارقىلى كوبالت-حروم قورىتپاسىنان ارنايى پروتەز جاسالعان.
وسىلايشا, ونكولوگياداعى العاشقى 3D وپەراتسيا بيىل قىركۇيەك ايىندا جاسالدى. وپەراتسيا بارىسىندا پاتسيەنتتىڭ قىر-مىقىن سۇيەگىنىڭ قاناتى, سونداي-اق ىسىكتەن ب ۇلىنگەن جۇمساق تىندەر الىنىپ تاستالدى. 3 ساعاتقا جالعاسقان وپەراتسيا كەزىندە كومپيۋتەرلىك جانە 3D-تەحنولوگيالار قولدانىلا وتىرىپ, جەكە مالىمەتتەر بويىنشا ارنايى جاسالعان جەكە ەندوپروتەزبەن جامباس سۇيەكتەرى قايتا قالپىنا كەلتىرىلدى.
«الماتىداعى ونكولوگيا ينستيتۋتىنا ءوز تاڭداۋىممەن كەلدىم. 2018 جىلدان بەرى وسى دەرت مازالاپ كەلەدى. ماماندار گيستولوگياعا تەكسەرگەننەن كەيىن وپەراتسيا جاساتۋعا دايىنداپ, بۇل پروتەز كەز كەلگەن ادامعا قويىلا بەرمەيتىنىن جانە ەلىمىزدە ءبىرىنشى رەت جاسالاتىن كۇردەلى وپەراتسيا ەكەنىن ايتتى. ارينە, ۋايىم دا بولدى, ءوزىم دە مەديتسينا سالاسىندا جۇرگەندىكتەن, ەموتسيالىق تۇرعىدا دايىندالۋ, مۇجىلمەۋ قاجەت ەكەنىن ىشتەي ءتۇيسىندىم. دارىگەرلەرگە ريزامىن, ولار وتانىڭ قانداي ادىسپەن جاسالاتىنى تۋرالى وتە جاقسى ءتۇسىندىردى. اسىرەسە ءبولىم مەڭگەرۋشىسى عاني امانگەلدى ۇلى مەن دارىگەرىم جانات ومىرزاققىزىنا العىس ايتامىن. ەلگە جانى اشيتىن وسىنداي مىقتى ماماندار قاتارى كوبەيە بەرسە ەكەن دەپ تىلەيمىن. ولار وسىنداي ەرەكشە جاعدايدا ماعان مىقتى پسيحولوگيالىق كومەك كەرەك ەكەنىن دە جاقسى ءتۇسىنىپ, ۇلكەن قولداۋ كورسەتتى. ەڭ باستىسى, دەر كەزىندە ەمدەلگەنىمە قۋانامىن», دەدى نۇرداۋلەت.
الماتى
