نۇرلان ءابدىروۆتىڭ توراعالىعىمەن وتكەن ورتالىق سايلاۋ كوميسسياسىنىڭ كەزەكتى وتىرىسىندا قازاقستان پرەزيدەنتتىگىنە كانديدات قاسىم-جومارت توقاەۆتىڭ سايكەستىگىن انىقتاۋ ماسەلەسى قارالدى.
كۇن تارتىبىندەگى ماسەلە بويىنشا ورتالىق سايلاۋ كوميسسياسىنىڭ حاتشىسى مۇحتار ەرمان بايانداما جاسادى. ول قازاقستان رەسپۋبليكاسىنىڭ پرەزيدەنتتىگىنە كانديدات قاسىم-جومارت توقاەۆقا قاتىستى سايلاۋ تۋرالى كونستيتۋتسيالىق زاڭنىڭ 59-بابىنىڭ تالاپتارىنا سايكەس ورتالىق سايلاۋ كوميسسياسى ۋاكىلەتتى مەملەكەتتىك ورگاندارعا ءتيىستى سۇراۋ جىبەرگەنىن حابارلادى. قۇزىرەتتى مەملەكەتتىك ورگانداردان كەلگەن مالىمەتتەرگە ساي ازامات قاسىم-جومارت كەمەل ۇلى توقاەۆقا قاتىستى قازاقستان رەسپۋبليكاسى پرەزيدەنتتىگىنە كانديدات رەتىندە تىركەلۋگە كەدەرگى جوق ەكەنى انىقتالدى. ماسەلەن, باس پروكۋراتۋرانىڭ قۇقىقتىق ستاتيستيكا جانە ارنايى ەسەپكە الۋ جونىندەگى كوميتەتىنىڭ مالىمەتى بويىنشا قاسىم-جومارت توقاەۆ قازاقستان رەسپۋبليكاسىنىڭ پرەزيدەنتتىگىنە كانديداتتارعا قويىلاتىن كونستيتۋتسيا مەن «قازاقستان رەسپۋبليكاسىنداعى سايلاۋ تۋرالى» كونستيتۋتسيالىق زاڭىنىڭ تالاپتارىنا سايكەس كەلەدى. ىشكى ىستەر مينيسترلىگىنىڭ مالىمەتىنە ساي قاسىم-جومارت توقاەۆ تۋمىسىنان قازاقستان رەسپۋبليكاسىنىڭ ازاماتى, قازاقستاندا سوڭعى 69 جىل بويى تۇرادى.
«قازاقستان رەسپۋبليكاسىنداعى سايلاۋ تۋرالى» كونستيتۋتسيالىق زاڭنىڭ 54-بابىنىڭ 2-تارماعىنا سايكەس مەملەكەتتىك ءتىلدى ەركىن مەڭگەرگەنىن انىقتاۋ ءراسىمى كانديداتۋراسى وكىلەتتىكتەردىڭ كەلەسى مەرزىمىنە قايتا ۇسىنىلعان, جۇمىس ىستەپ جۇرگەن رەسپۋبليكا پرەزيدەنتىنە قولدانىلمايدى.
ۇسىنىلعان ديپلومنىڭ كوشىرمەسىنە ساي جوعارى ءبىلىمى بار (ديپلومنىڭ تۇپنۇسقاسىمەن سالىستىرىپ تەكسەرۋ جۇرگىزىلدى). قازاقستان مەملەكەتتىك قىزمەت ىستەرى اگەنتتىگىنەن ۇسىنىلعان مالىمەتتەرگە ساي مەملەكەتتىك قىزمەتتەگى جانە سايلانبالى مەملەكەتتىك لاۋازىمدارداعى جۇمىس تاجىريبەسى – 43 جىل 1 اي.
ادىلەت مينيسترلىگى ۇسىنعان مالىمەتتەر بويىنشا پرەزيدەنتتىككە كانديدات ۇسىنعان رەسپۋبليكالىق قوعامدىق بىرلەستىكتەردىڭ ادىلەت مينيسترلىگىندە تىركەلگەنى تۋرالى قۇجاتتارى بار.
