– يوكو حانىم, ەلىمىزگە قوش كەلدىڭىز! «كۇلبيكە» بالەتىنىڭ ستسەنوگرافياسىمەن جۇمىس ىستەۋ كەزىندە ءسىزدى نە شابىتتاندىردى؟
– راحمەت. بۇل مەنىڭ قازاقستانعا, ونىڭ ىشىندە استانا قالاسىنا العاشقى ساپارىم ەمەس. بۇعان دەيىن ءدال وسى تەاتردا قويۋشى حورەوگراف رايموندو رەبەك مىرزامەن بىرگە «بەتحوۆەن – ماڭگىلىك – ماحاببات» بالەتىن قويعان بولاتىنبىز. ەندى مىنە, ءدال سول تاندەمدە «كۇلبيكەگە» ورالىپ وتىرمىز. بۇل قويىلىمدا ماعان شابىت سىيلاعان باستى نارسە قويۋشى حورەوگرافتىڭ كۇلبيكەنىڭ ءوزىن قالاي جارىققا شىعاراتىنى, سانگەر بولۋدى ارماندايتىنى تۋرالى يدەياسى بولدى. ءبىرىنشى اكتىدە ول ءۇيدى جيناپ قانا قويماي, سونىمەن بىرگە ءوزىنىڭ كيىم ۇلگىلەرىمەن دە اينالىسادى. ول كىر جۋىپ جاتقاندا تاۋىپ العان ەسكى-قۇسقىدان كيىم ۇلگىلەرىن جاسايدى, ياعني ول ءوز توپتاماسىنا ماتەريالدى ءوز بەتىنشە تابادى. ال ەكىنشى اكتىدە بال كەشىندە ءسان كورسەتىلىمى بولادى.
– بالەتتى بۇلاي تۇرلەندىرۋدەگى باستى ماقساتتارىڭىز نە؟ ستسەنوگراف مامان رەتىندە قويىلىمدا نەگە باسىمدىق بەردىڭىز؟
– مەن ءسان الەمىندە نەمەسە ءسان تۋرالى ارماندايتىن قىزدار ءۇشىن نەنىڭ ماڭىزدى ەكەنى جايلى كوپ ويلاندىم جانە البەتتە, قىزدار ءۇشىن بيىك وكشەلى تۋفلي ماڭىزدى دەپ ايتار ەدىم. ماعان تاڭعالدىرارلىق بيىك وكشەسى جانە قىزىل تابانى بار تانىمال قايىقشا تۋفليلەر تۋرالى وي كەلدى. كۇلبيكەنىڭ كۇيمەمەن بال كەشىنە باراتىن ساپارى كورسەتىلەتىن ايگىلى ساحنا كوپشىلىكتىڭ ەسىندە. سول سەبەپتى مەن بيىك وكشەلى ۇلكەن تۋفلي تۇرىندەگى ەرەكشە كۇيمە جاساپ شىعاردىم. بۇل دا وزىنشە ءسان نىشانى ىسپەتتى. كۇلبيكەنى دە ءدال وسى ءسان تۋرالى ارمانى ساۋىق كەشىنە ەرتىپ اكەلەدى. بۇل مەنىڭ ديزاينىمنىڭ تۇجىرىمداماسىنىڭ ايرىقشا شابىتتانعان بولىگى دەپ ويلايمىن.
ەكىنشى جاعىنان, بىزدە حانزادا بار, ونىڭ ءومىرى كۇلبيكەنىڭ ومىرىنە كەرەعار. باستى كەيىپكەر كەدەي, ال حانزادا كورولدىك قانى بار اۋقاتتى وتباسىندا دۇنيەگە كەلدى. جانە مۇنداي اتموسفەرا ونى قاتتى جالىقتىرىپ جىبەرەدى, سوندىقتان ول ءوزىن مۋزىكانت رەتىندە تانىتۋ جايلى شەشىمگە كەلەدى. ونىڭ جارقىراعان التىن ماتەريالدان جاسالعان مۋزىكالىق قۇرالدارى, ماسەلەن, دىبىس باعاناسى نەمەسە ماگنيتوفون سەكىلدى قۇرالدارىنىڭ بارلىعى ايرىقشا جارقىندىعىمەن كورەرمەنىنىڭ نازارىن بىردەن وزىنە اۋدارتادى. ال ول كورولدىك ستيلگە قاراعاندا, پوپ ستيل نەمەسە كوشە ءستيلىنىڭ اتموسفەراسىنا كوبىرەك كەلەدى. بىراق سوعان قاراماستان ءبارى پاتشانىكىندەي سالتاناتىن دا ساقتاپ قالدى. حانزادانىڭ اتاقتى جاس رەتىندەگى بەينەسىن قالجىڭ رەتىندە قابىلداۋعا بولادى. ول ونىڭ ءدال وسىنداي جاعدايلار ارقىلى ءوسۋدى كوكسەۋىنە قاتىستى ايتىلعان ءازىل. سپەكتاكلدە ورىن الاتىن تاعى ءبىر قىزىقتى جايت – بۇل كەيىپكەر مەيىرىمدى پەرىشتەنىڭ گيروسكۋتەردى تىزگىندەۋى دەر ەدىم. مۇنىڭ بارلىعى, ءسوزسىز, قويىلىمعا ەرەكشە ءسان بەرگەنى ءسوزسىز.
– سپەكتاكلدىڭ تۇستىك پاليتراسىن تۇزۋدە نەگە سۇيەندىڭىز؟
– مەن جۇمىسىمدا كوبىنەسە قىشا رەڭكتەرىن, كوزگە نەعۇرلىم جاعىمدى, جايلى, ءۇيدىڭ جىلۋلىعىن بەرەتىن تۇستەردى قولدانامىن. ءبىرىنشى اكتىدە بارقىتتى كوپ پايدالانامىن. بىراق بارقىت مەن ءۇشىن كۇلبيكەنىڭ كوڭىل كۇيىنىڭ اتموسفەراسىن تۋدىراتىن اعىندى ماتا سياقتى ماڭىزدى ەمەس. ەكىنشى اكتىدە مەندە جالبىزدى جاسىل رەڭكتەر كوپ, بۇل كورولدىك اتموسفەرانى كورسەتۋ ءۇشىن قاجەت. سوندىقتان قىشادان كەنەت كورولدىك جالبىزدى جاسىلعا اۋىسۋ بولادى.
– قويىلىم ءبىر ساتكە ءفيلمنىڭ اتموسفەراسىن ەسكە تۇسىرگەندەي بولدى. تەاتر ارتىستەرىنىڭ جاندى ورىنداۋىندا سپەكتاكلدى فيلم تۇرىندە كورسەتۋ قانشالىقتى قيىن؟
– تاپ وسى جاعدايدا اڭگىمە كورەرمەندەرگە «كۇلبيكە» بالەتىنىڭ قويىلىمىن ۇسىناتىن قارت جۇبايلار جايلى بولىپ وتىر. ولار ساحناعا ءبىرىنشى شىعىپ, وزدەرىنىڭ وتكەن ومىرلەرىن, قالىپتاسۋ جولدارىن كورۋ ءۇشىن بەينەتاسپاسى بار تەلەديداردى قوسادى. ياعني حيكايادا ءوربيتىن جايتتاردى سول ەكەۋى باقىلايدى. بۇل جولى حورەوگراف رايموندو رەبەككە وسىناۋ قويىلىمدا ءومىردىڭ ماقساتى مەن ارمانىن كورسەتۋ ايرىقشا ماڭىزدى بولدى. ءبىز سيۋجەتتەگى وقيعالارعا فيلم تاماشالاعانداي قاراپ وتىرامىز, سوڭىندا جۇرەكتە ىزگى, جاقسى جانە قۋانىشتى سەزىمدەر پايدا بولادى.
– بۇل حيكايانىڭ باستى كەيىپكەرى – ديزاينەر قىز, قۇددى ءسىز سەكىلدى, بۇل جۇمىسىڭىزعا قانداي دا ءبىر ەرەكشەلىك ۇستەدى مە؟
– وتە دۇرىس اڭعارىپسىز. دەگەنمەن, شىنىمدى ايتسام, تۇجىرىمدامانى ازىرلەگەندە مەن بۇل تۋرالى ەش ويلاماپپىن. دارىندى جاستار وزدەرىن قالاي تانىتۋدى بىلمەي, كەدەرگىلەرگە ءجيى تاپ بولىپ جاتادى. ولاردا ەپتىلىك, قانداي دا ءبىر مامان بولۋعا دەگەن ىشكى ماقسات بار, كۇش-قۋاتتارى تاسىپ تۇر, بىراق ولار سول قابىلەتتەرىن قالاي جۇزەگە اسىرۋدى بىلمەيدى. «كۇلبيكەنىڭ» ءبىرىنشى اكتىسى تۋرا وسىنى بەينەلەيدى, قيىنشىلىقپەن كۇرەستى, ءوز مايدانىندا تابىسقا قول جەتكىزۋگە دەگەن جىگەردى كورسەتەدى. جانە ەكىنشى اكتىدە, اقىر اياعىندا, ونىڭ ءوز شىعارماشىلىعىن كورسەتۋگە مۇمكىندىگى تۋادى. ءدال وسى ساتتە مەن ءۇشىن سونداي مۇمكىندىك «كۇلبيكە» بالەتىنىڭ قويىلىمى بولىپ تابىلادى. ياعني بۇل تۇستا مەنىڭ دە ارمانىم كۇلبيكەمەن ۇندەس. ديزاينەرلەر, بارلىق شىعارماشىلىق ماماندىق وكىلدەرى ءۇشىن كوپشىلىككە ءوز قيالىمىزدىڭ جەمىسىن كورسەتۋگە مۇمكىندىكتىڭ بولۋى وتە ماڭىزدى! وسى تۇرعىدان كەلگەندە, «كۇلبيكەنى» جارىققا شىعارۋعا اتسالىسقان بارشا ارىپتەستەرىمە العىسىم شەكسىز. تەاتر – ۇجىمدىق ونەر دەسەك, سول ۇجىمنىڭ قولداۋىن ايرىقشا سەزىندىم. جانە سۋرەتكەرلىك ويىمدى ءىلىپ اكەتىپ, ساحنادا ءساتتى جۇزەگە اسىرعان بارشا ارتىستەر قاۋىمىنا دا زور ريزاشىلىق سەزىمىمدى جەتكىزگىم كەلەدى.
– اڭگىمەڭىزگە راحمەت.
اڭگىمەلەسكەن
نازەركە جۇماباي,
«Egemen Qazaqstan»
