پارلامەنت • 07 قازان، 2022

ماۋلەن اشىمباەۆ: حالىقتىق كواليتسيانىڭ ۇسىنىسى – ەلىمىزدىڭ ەرتەڭى ءۇشىن ەڭ ۇتىمدى شەشىم

90 رەت كورسەتىلدى

بۇل تۋرالى پارلامەنت سەناتىنىڭ توراعاسى ماۋلەن اشىمباەۆ Facebook-تەگى پاراقشاسىندا جازدى، دەپ حابارلايدى Egemen.kz.

«كەشەلى بەرى ەلىمىزدەگى ءىرى ساياسي كۇشتەر، رەسپۋبليكالىق قوعامدىق بىرلەستىكتەر، ارداگەرلەر مەن جاستار ۇيىمدارى جانە باسقا دا ۇجىمدار الداعى پرەزيدەنت سايلاۋىنا قاسىم-جومارت كەمەل ۇلى توقاەۆتىڭ كانديداتۋراسىن ۇسىنىپ جاتىر. AMANAT پارتياسىنىڭ كەزەكتەن تىس XXIV سەزىندە دە مەملەكەت باسشىسىن قازاقستان پرەزيدەنتتىگىنە ۇمىتكەر رەتىندە ۇسىنۋ تۋرالى شەشىم قابىلدانعانى بەلگىلى.

وسىعان وراي حالىقتىق كواليتسيا قۇرىلىپ، ونىڭ قۇرامىنا ەنگەن بارلىق ساياسي پارتيالار مەن قوعامدىق ۇيىمدار ءبىراۋىزدان قاسىم-جومارت توقاەۆتىڭ كانديداتۋراسىنا قولداۋ ءبىلدىردى. بۇل – مەملەكەتتىلىگىمىز بەن تاۋەلسىزدىگىمىزدى نىعايتۋ جولىندا جاسالعان ماڭىزدى قادام. ويتكەنى قازىرگىدەي كۇردەلى كەزەڭدە بىزگە وسىنداي ورتاق پايىم مەن بەكەم بىرلىك اۋاداي قاجەت»، دەپ جازدى م.اشىمباەۆ.

سونداي-اق ول ەلدىڭ ىنتىماعىن ارتتىرۋعا ارنالعان جەتى قاعيداعا توقتالىپ ءوتتى.

«قولداۋشىلار فورۋمىندا پرەزيدەنتىمىز ەلدىڭ ىنتىماعىنا باسا ءمان بەرىپ، ۇلتتى ۇيىستىراتىن جەتى قاعيداعا نازار اۋداردى. بۇل ورايدا مەملەكەت باسشىسى تاۋەلسىزدىك، جەرىمىزدىڭ تۇتاستىعى، مەملەكەتتىك مۇددە، رۋحاني ۇندەستىك، زاڭدىلىق پەن ءتارتىپ، جاسامپازدىق جانە دوستىق پەيىل مەن مەيىرىمدىلىك ءبىزدىڭ ەلدىك جولىنداعى ەڭ باستى قۇندىلىقتارىمىز ەكەنىن ايرىقشا اتاپ ءوتتى»، دەدى سەنات توراعاسى.

م.اشىمباەۆتىڭ ايتۋىنشا، سوڭعى جىلداردا پرەزيدەنتىمىزدىڭ باستاماسىمەن ەلىمىزدە اۋقىمدى ساياسي، ەكونوميكالىق جانە الەۋمەتتىك رەفورمالار تابىستى ىسكە اسىرىلىپ كەلەدى. سونىڭ ناتيجەسىندە ساياسي جۇيەمىز ايتارلىقتاي جاڭعىرتىلىپ، دەموكراتيا، ادىلەتتىلىك، زاڭ ۇستەمدىگى، بارلىق ازاماتقا تەڭ مۇمكىندىك سياقتى قاعيدالارعا باسىمدىق بەرىلۋدە. حالىقتىڭ ءال-اۋقاتىن جاقسارتۋعا ايرىقشا كوڭىلى ءبولىنىپ، وسى باعىتتا ناقتى جوبالار قولعا الىندى. الداعى ۋاقىتتا دا وسىنداي يگى باستامالاردى تاباندى جانە جۇيەلى تۇردە جالعاستىرۋ اسا ماڭىزدى.

«سونداي-اق قازىرگى تاڭدا بۇكىل الەممەن بىرگە قازاقستان دا ءتۇرلى جاھاندىق سىن-قاتەرلەرمەن بەتپە-بەت كەلىپ وتىر. وسىنداي الماعايىپ شاقتا بىزگە ەلدى بارلىق سىناقتان سۇرىندىرمەي الىپ شىعاتىن ناعىز كوشباسشى قاجەت. وسى تۇرعىدان كەلگەندە، كوپشىلىكتىڭ قاسىم-جومارت توقاەۆتىڭ كانديداتۋراسىن قولداۋى حالىقتىڭ مەملەكەت باسشىسىنا دەگەن سەنىمى ەكەنى ءسوزسىز. سوندىقتان حالىقتىق كواليتسيانىڭ ۇسىنىسى – ەلىمىزدىڭ ەرتەڭى ءۇشىن ەڭ ۇتىمدى شەشىم»، دەپ جازباسىن قورىتىندىلادى م.اشىمباەۆ.

سوڭعى جاڭالىقتار

بۇگىنگى ۆاليۋتا باعامى

قارجى • بۇگىن، 09:55

ۇقساس جاڭالىقتار