ۇلتتىق سپورت • 07 قازان، 2022

اسىق اتۋدان الەم چەمپيونى

79 رەت كورسەتىلدى

اعا بۋىننان اسىق اتۋ ويىنى تۋرالى سۇراساڭىز، كوبىنە مۇعالىمدەردەن جاسىرىنىپ ويناعاندارىن ايتادى. «اسىق ويناعان – ازار، دوپ ويناعان – توزار. بارىنەن دە قوي باعىپ، قۇيرىق جەگەن وزار»، دەگەن ءسوزدى ۇستانىم ەتكەندەرىن دە جاسىرمايدى. ال بۇگىندە اسىققا دەگەن كوزقاراس مۇلدە وزگەرگەن. ۇلتتىق ويىندى ناسيحاتتاپ، بۇگىنگى بۋىنعا ۇيرەتىپ جۇرگەندەردىڭ قاتارىندا مۇعالىمدەر كوپ.

جۋىردا تۇركىستان وبلىسىنىڭ تۇلكىباس اۋدانىنداعى مەكتەپ مۇعالىمى الماس قاراباەۆ رۋمىنيادا اسىق اتۋدان وتكەن جارىستا الەم چەمپيونى اتاندى. سەگىز جىلدان بەرى اسىق اتۋ سپورتىمەن كاسىبي تۇرعىدا شۇعىلدانىپ كەلە جاتقان الماس سپورتتىڭ بۇل تۇرىنەن ۇلتتىق قۇرامانىڭ كاپيتانى. الماسپەن بىرگە قازاقستان قۇراماسى اتىنان ونەر كورسەتكەن تاعى ەكى سپورتشىمىز رۋمىنيا ەلىندە وتكەن دودادا جەڭىسكە جەتكەن. قىرعىزستان، تۇركيا، پاكىستان، مولدوۆا، بولگاريا سىندى الەمنىڭ 8 ەلىنەن كەلگەن ساڭلاقتار باق سىناعان دودادا وتانداستارىمىز جەڭىمپاز اتاندى. شەشۋشى سىندا مولدوۆا قۇراماسىمەن كوماندالىق كەزدەسۋدە ءۇش جىگىت تە قارسىلاستارىن ۇتتى. الماس قاراباەۆ – تۇلكىباس اۋدانىنداعى ا.س.پۋشكين اتىنداعى مەكتەپ-ليتسەيىندە دەنە شىنىقتىرۋ ءپانىنىڭ مۇعالىمى. بۇعان دەيىن باسكەتبول، كۇرەس سىندى سپورت تۇرلەرىمەن اينالىسقان ول 2015 جىلى اسىق اتۋ جارىسىندا باعىن سىناپ، كوزگە تۇسكەن. ياعني سول جىلى قازاقستان چەمپيونى اتانىپ، ۇلتتىق قۇراماعا قابىلداندى. بۇگىندە قازاقستان كۋبوگى مەن چەمپيوناتىنىڭ بىرنەشە دۇركىن جەڭىمپازى ءارى جۇلدەگەرى. بيىكتەن كورى­نىپ جۇرگەن شاكىرتتەرى دە از ەمەس. بيىل 9 شاكىرتى قازاقستان چەمپيونى اتاندى.

الماس وقۋشىلاردىڭ اسىق اتۋعا قىزىعۋشىلىعى ارتىپ كەلە جاتقانىن، ۇنەمى بىلمەگەنىن سۇراپ وتىراتىنىن ايتادى. ودان بولەك، قوسىمشا ۇيىرمە اشقان. شاكىرتتەرى «اسىق» جانە «بەس اسىق اتۋ» سپورت تۇرلەرىنەن قازاقستان چەمپيوناتىنىڭ جانە ۇلتتىق ويىندار چەمپيوندارى اتانىپ، سەنىمدى اقتاپ كەلەدى.

«قازىر باياعىداي ەمەس، اسىق اتۋ سپورتى دامىپ جاتىر. مەملەكەت تاراپىنان دا قولداۋ بار. تەك كەيبىر ادامدار اسىق اتۋدى بالانىڭ ويىنى دەپ قابىلدايتىنى قىنجىلتادى. نەگە دەسەڭىز، بۇل – ناعىز سپورت. اسىق اتۋ مەرگەندىكتى، شاپشاڭدىقتى قاجەت ەتەدى. ماسەلەن، ويىنعا ەكى بالا شىقتى دەلىك. ولار ءبىر ويناعاندا 15 مينۋت توقتاۋسىز باق سىناسادى. ءۇش تايم بولادى. سوندا ولار 45 مينۋت جۇگىرىپ، قوزعالىستا جۇرەدى»، دەيدى الماس.

ءيا، بۇگىندە اسىققا قورعاسىن قۇيىپ، ادەمى ساقا ەتكىسى كەلەتىن بالا كوبەيگەن. سول سالماقتى ساقامەن ورتاعا تىگىلگەن اسىقتى شيىرا اتقاندا بۇكىل بالانىڭ دەلەبەسى قوزادى. ۇستازدىڭ ايتۋىنشا، بالالاردى ءوزارا تارتىستىرعان اسىق ۇتىسى وتە تارتىمدى ويىنعا اينالعان. بالانى مەرگەندىككە، جىلدامدىققا، ەپتىلىككە، توزىمدىلىككە، ۇقىپتىلىققا داعدىلاندىراتىن ەرەكشەلىگىمەن دە ماڭىزدى. اسىق ويىنى كەزىندە ادامنىڭ اياق-قولدارى، بەلى، موينى، ءتىپتى ساۋساقتىڭ، باشپايدىڭ ۇشتارىنا دەيىن قيمىل-قوزعالىسقا ءتۇسىپ، دەنە سۇيەكتەرىنىڭ سىمباتتى بولىپ وسۋىنە وڭ ىقپال ەتەدى. ياعني اسىق ويناعان بالا ازبايدى، شىنىعىپ، شىڭدالادى، وي-ءورىسى داميدى.

 

تۇركىستان وبلىسى

سوڭعى جاڭالىقتار

بۇگىنگى ۆاليۋتا باعامى

قارجى • بۇگىن، 09:55

ۇقساس جاڭالىقتار