سەنات سپيكەرى اقاڭنىڭ اسىل مۇراسى ارداقتالعان «ۇلتىنا عۇمىرىن ارناعان ۇلى تۇلعا» اتتى عىلىمي-تاجىريبەلىك كونفەرەنتسيادا مەملەكەت باسشىسى قاسىم-جومارت توقاەۆتىڭ قۇتتىقتاۋ حاتىن وقىپ بەردى.
«احمەت بايتۇرسىن ۇلى – تاريحىمىزدا ايرىقشا ورنى بار بىرەگەي تۇلعا. الاش جۇرتىنىڭ اسىل پەرزەنتى حالقىمىزدىڭ تاعدىرى سىنعا تۇسكەن كۇردەلى كەزەڭدە ەرەكشە قايراتكەرلىك تانىتتى. ەلىمىز ءبۇتىن, جەرىمىز تۇتاس بولۋ ءۇشىن ولشەۋسىز ەڭبەك ءسىڭىردى. شىن مانىندە, اقاڭنىڭ ءومىر جولى – ۇلتقا قىزمەت ەتۋدىڭ جارقىن ۇلگىسى. ارىستارىمىزدىڭ ەسىمىن ارداقتاپ, ۇلاعاتتى ءىسىن جالعاستىرۋ – حالقىمىزدىڭ قاستەرلى پارىزى», دەلىنگەن مەملەكەت باسشىسىنىڭ قۇتتىقتاۋىندا.
ءوز سوزىندە ماۋلەن اشىمباەۆ ۇلت ۇستازى, اسا كورنەكتى عالىم, اعارتۋشى, تاريحي تۇلعا احمەت بايتۇرسىن ۇلىنىڭ ساياسي جانە رۋحاني مۇراسىنا كەڭىنەن توقتالىپ ءوتتى.
– بۇگىن قاسيەتتى تورعاي توپىراعىنا تابانىمىز ءتيىپ, وزدەرىڭىزبەن جۇزدەسۋدىڭ ءساتى ءتۇسىپ وتىر. تورعاي – الاش الىپتارىنىڭ قاستەرلى مەكەنى جانە ۇلت نامىسىنىڭ جالاۋى. تورعاي – سالتىنا بەرىك, قازاقىلىققا بەكەم قازىنالى جۇرتتىڭ ورداسى. ءبارىمىزدىڭ باسىمىزدىڭ وسى كيەلى قونىستا قوسىلۋىنا سەبەپشى بولعان ۇلت ۇستازى احمەت بايتۇرسىن ۇلىنىڭ 150 جىلدىق مەرەيتويى. ارداقتى ارىسىمىزدىڭ ەسىمىن ۇمىتپاۋ, ۇلت ساناسىندا جاڭعىرتىپ وتىرۋ – بارشامىزعا ورتاق مىندەت. سەبەبى اقاڭنىڭ تۇلعاسى قازاقتىڭ الەۋەتىن, دەڭگەيىن, بولمىسىن كورسەتەدى. سوندىقتان اقاڭنىڭ تويى الاشتىڭ ابىرويى دەپ سانايمىز. وزدەرىڭىزگە بەلگىلى, ءبىز قازىر كۇردەلى كەزەڭدە ءومىر ءسۇرىپ جاتىرمىز. الەمدەگى شيەلەنىستەر ۋشىعىپ كەتتى. قاقتىعىستار الىستا ەمەس, ءدال ىرگەمىزدە بولىپ جاتىر. وسىنداي الماعايىپ كەزەڭدە ءبىز قامسىز وتىرا المايمىز. ەلدىگىمىزدى ساقتاۋ جانە ۇلتتىق مۇددەمىزدى قورعاۋ – ەڭ نەگىزگى مىندەتىمىز. پرەزيدەنتىمىز وسىدان بىرنەشە كۇن بۇرىن تۇركىستان تورىندە سويلەگەن سوزىندە قازىرگى تاڭدا بىزگە بەكەم بىرلىك اۋاداي قاجەت ەكەنىن ايتتى. ءبارىمىز ورتاق ماقسات جولىندا جۇدىرىقتاي جۇمىلۋىمىز قاجەت, – دەدى ماۋلەن اشىمباەۆ.
سونداي-اق سەنات توراعاسى مەملەكەت باسشىسى ەل دامۋىنىڭ جاڭا تاريحي كەزەڭىندە وڭىرلەردى وركەندەتۋ ماسەلەسىنە باسا ءمان بەرىپ وتىرعانىن, وسى باعىتتا ءتيىستى ورگاندارعا ناقتى تاپسىرمالار بەرگەنىن جانە الداعى مىندەتتەردى ناتيجەلى ورىنداۋ ءۇشىن پارلامەنت جۇيەلى جۇمىس جۇرگىزىپ جاتقانىن ايتتى.
– مەملەكەت باسشىسى جاڭا جانە ادىلەتتى قازاقستان قۇرۋ باعدارىن ايقىنداپ بەردى. قازىرگى تاڭدا وسى باعىتتا اۋقىمدى جۇمىس اتقارىلىپ جاتىر. ەلىمىزدە كەشەندى ساياسي, ەكونوميكالىق جانە الەۋمەتتىك وزگەرىستەر ىسكە اسىرىلۋدا. ەڭ باستى مىندەت – تاۋەلسىزدىگىمىزدى نىعايتىپ, حالقىمىزدىڭ ءال-اۋقاتىن جاقسارتۋ. ول ءۇشىن تۇتاس ەلىمىزدى, سونداي-اق ءار ءوڭىردى وركەندەتۋدىڭ ماڭىزى زور. پرەزيدەنتىمىزدىڭ جاڭا باستامالارى قازاق ءۇشىن قاستەرلى مەكەن سانالاتىن تورعايدىڭ دامۋىنا تىڭ سەرپىن بەرەدى دەپ سەنەمىز, – دەگەن سەنات توراعاسى ادىلەتتى قازاقستان قۇرۋ جانە وسكەلەڭ ۇرپاقتى وتانشىلدىق رۋحپەن تاربيەلەۋ جولىندا تورعاي توپىراعىنان تۇلەگەن تۇلعالاردىڭ رۋحاني مۇراسىن دارىپتەۋدىڭ ماڭىزدى ەكەنىن اتاپ ءوتتى.
القالى جيىندا ءسوز العان ايماق باسشىسى ارحيمەد مۇحامبەتوۆ جىل باسىنان بەرى احمەت بايتۇرسىن ۇلىنىڭ ءومىرى مەن قىزمەتىنە ارنالعان اۋقىمدى ءىس-شارالار ەلىمىزدە عانا ەمەس, بىرقاتار شەت مەملەكەتتەردە دە ۇيىمداستىرىلىپ جاتقانىن, وسىنىڭ ءبارى – الاش ارداقتىسىنا دەگەن الەمدىك دەڭگەيدەگى قۇرمەت, شەكسىز ىقىلاستىڭ بەلگىسى ەكەنىن ايتا كەلىپ, اقاڭ تويىنىڭ اۋليەكول اۋدانىندا بولعان توتەنشە جاعدايعا بايلانىستى كەيىنگە شەگەرىلگەنىنە تۇسىنىستىكپەن قاراپ, قولداۋ بىلدىرگەن كوپشىلىككە شىنايى العىس ايتتى.
– جالپى, مەرەيتوي اياسىندا اقاڭنىڭ تۋعان جەرىندە مۋزەي ءۇيى جانە جاڭادان كەسەنە سالىندى. مۋزەي ءۇي وسى كيەلى توپىراققا تاعزىم جاساي كەلگەن قوناقتارعا تاريحتان سىر شەرتىپ, حالقىمىزدىڭ تۇرمىس-تىرشىلىگىمەن, سالت-داستۇرلەرىمەن تانىستىرادى. تورعايدا احمەت بايتۇرسىن ۇلى مەن مىرجاقىپ دۋلات ۇلىنىڭ جاڭا ەسكەرتكىشى ورناتىلدى. قوس قايراتكەردىڭ اتىنداعى ادەبي مۋزەيى جوندەۋدەن ءوتتى, ەكسپوزيتسياسى تولىعىمەن جاڭارتىلدى. بۇل نىسانداردىڭ بارلىعى Torgai Tour تۋريستىك باعىتىنا ەنگىزىلەدى. ءبىز قازىر جوسپارلاپ وتىرعان ەكونوميكانىڭ تۇتاس باعىتتارى قامتىلعان اۋقىمدى جوبالار وبلىستىڭ وڭتۇستىك وڭىرىندە شامامەن 4,4 مىڭ جۇمىس ورنىن اشۋعا مۇمكىندىك بەرەدى. جىل سايىن بارلىق دەڭگەيدەگى بيۋدجەتتەرگە سالىق اۋدارىمدارى تۇرىندە شامامەن 50,0 ملرد تەڭگە تۇسەدى. وبلىسقا مول ينۆەستيتسيا تارتۋ ماقساتىندا ءبىز «قوستاناي وبلىسىنىڭ وڭتۇستىك وڭىرلەرىنىڭ ينۆەستيتسيالىق كارتاسى» ينتەرنەت پورتالىن ازىرلەۋگە كىرىستىك, ول الەۋەتتى بيزنەس سۋبەكتىسىنە وڭىرلەردىڭ ەكونوميكاسىمەن, جەر ۋچاسكەلەرى, ينفراقۇرىلىمى جانە وسى وڭىرلەردە دامىتۋعا بولاتىن باسىم سالالار بويىنشا اقپاراتقا قولجەتىمدىلىكپەن تانىسۋعا مۇمكىندىك بەرەدى. سايتتى جىل سوڭىنا دەيىن ىسكە قوسۋدى جوسپارلاپ وتىرمىز, ال 2023 جىلدىڭ ءبىرىنشى توقسانىندا ينتەرنەت رەسۋرستى دەرەكتەرمەن تولتىرۋ بويىنشا جۇمىس جۇرگىزەمىز, – دەدى وبلىس اكىمى.
ءوڭىر باسشىسىنىڭ ايتۋىنشا, وبلىستا «250+» باعدارلاماسى جانە بايلانىس وپەراتورلارىنىڭ ليتسەنزيالىق مىندەتتەمەلەرى شەڭبەرىندە وڭتۇستىك وڭىرلەردىڭ تۇرعىندارىن ءموبيلدى بايلانىسپەن جانە ينتەرنەت جەلىسىنە قولجەتىمدىلىكتى قامتاماسىز ەتۋ بويىنشا ۇلكەن جۇمىس جۇرگىزىلۋدە. بۇگىندە ارقالىق قالاسى مەن امانگەلدى, جانگەلدين اۋداندارىنا قاراستى 70 اۋىلدىڭ 64-ءى ءموبيلدى ينتەرنەتپەن قامتاماسىز ەتىلگەن.
– قالعان اۋىلداردىڭ حالقىنىڭ سانى از جانە كۇردەلى رەلەفتى جەرلەردە ورنالاسقان. بۇل اۋىلداردى الداعى جىلدارى گەوستاتسيونارلىق ەمەس سپۋتنيكتىك تەحنولوگيالاردى ەنگىزۋ ەسەبىنەن ينتەرنەتپەن قامتۋ جوسپارلانىپ وتىر. 2022 جىلى 20 اۋىلدا جەلىنى 4G ستاندارتىنا دەيىن جاقسارتۋ جوسپارلانعان, بۇگىندە 11 اۋىلدىق ەلدى مەكەندە جۇمىستار اياقتالدى. جىل سوڭىنا دەيىن 9 اۋىلدا ينتەرنەت بايلانىسى جاقسارتىلادى, – دەدى ارحيمەد مۇحامبەتوۆ.
كونفەرەنتسياعا بەلگىلى زيالى قاۋىم وكىلدەرى, ايتۋلى عالىمدار, كورنەكتى قوعام قايراتكەرلەرى قاتىستى. جيىندا ءسوز العانداردىڭ ىشىندە جازۋشى, عالىم قويشىعارا سالعارا ۇلى دا بولدى. قولتىعىنان دەمەگەن ەكى جاس جىگىتتىڭ كومەگىمەن مىنبەرگە كوتەرىلگەن عالىم:
– باۋىرلارىم, تالتىرەكتەپ الدارىڭا شىققانىما كەشىرىم سۇرايمىن. دەنساۋلىعىم بولماي, توسەكتە جاتقان ادام ەدىم. كەشە اقاڭنىڭ تويى العاش بولادى دەگەندە اۋىرىپ كەلە الماي قالدىم. وسى جولى وتكەندە تورعايعا ات باسىن تىرەپ, توي بولماي كەرى قايتقان ازاماتتاردىڭ ەندى كەلە المايتىنىن بىلگەننەن كەيىن, ەڭ بولماسا, ءوز اۋىلىنىڭ ازاماتتارى دا بوي كورسەتپەدى-اۋ دەگەن ءسوز ايتىلادى-اۋ دەپ سۇيرەتىلىپ كەلگەن جايىم بار. مەن كوپ سويلەمەيىن. اقاڭ جونىندە ءبارى ايتىلدى عوي. قازاقتا تالاي ۇلىلار شىققان, تالاي دانالار شىققان. سونىڭ ىشىندە احمەت دارا. دەمەك اقاڭا كورسەتىلەر قۇرمەت تە دارا بولۋعا ءتيىس, – دەپ تەبىرەنە سويلەدى.
اقاڭ تۋرالى ءسوز ايتقاندا الاش حاقىندا ءسوز ايتىلماي قالمايدى. كونفەرەنتسيا بارىسىندا الاشتانۋشى عالىم, فيلولوگيا عىلىمدارىنىڭ دوتسەنتى عاريفوللا انەس سوڭعى جىلدارداعى عىلىمي ىزدەنىستەر ناتيجەسىندە الاشتانۋعا, احمەتتانۋعا قاتىستى تىڭ دەرەكتەر تابىلعانىن ايتتى.
– وزدەرىڭىز جاقسى بىلەسىزدەر, 2020 جىلى 24 قاراشادا مەملەكەت باسشىسى قاسىم-جومارت توقاەۆتىڭ «قۋعىن-سۇرگىن قۇرباندارىن تولىق اقتاۋ تۋرالى» جارلىعى شىقتى. سول بويىنشا كوميسسيا قۇرىلىپ, جۇمىس ىستەپ جاتىرمىز. قانشاما جاڭالىق اشىلىپ جاتىر. وسىنىڭ ءبارى حالىققا جەتسە ەكەن دەيمىز. ماسەلەن, ءبىز ءاۋ باستا احمەت بايتۇرسىن ۇلىنا قاتىستى ارحيۆ قۇجاتتارىنان ءبىر تومدىق جيناق دايىنداعانبىز. ول ەكى توم بولدى. ودان كەيىن ءۇش توم بولدى. جۋىردا عانا ۇلتتىق قاۋىپسىزدىك كوميتەتىنىڭ جابىق قورىنان احمەت بايتۇرسىن ۇلى تۋرالى ءۇش توم قۇجات, دەرەكتەر شىقتى. قازىر بۇل قۇجاتتاردىڭ بارلىعى زەردەلەنىپ جاتىر. الاش قايراتكەرلەرى تۋرالى ءالى تالاي اڭگىمەلەر بولادى. جۇرتتىڭ ءبارى ءاليحان, احمەت, مىرجاقىپ باستاعان قايراتكەرلەر 1937-1938 جىلدارى ستاليندىك ۇلكەن تەرروردىڭ قۇربانى بولدى دەپ ويلايدى. شىن مانىندەگى ۇلكەن تەررور 1925 جىلى قازان ايىندا قازاق دالاسىنا گولوششەكيننىڭ باسشى بولىپ كەلۋىمەن باستالعان ەدى. ال ەندى 1929 جىلدان كەيىن بىردە-ءبىر الاش قايراتكەرىنىڭ نە اتى, نە ماقالاسى, نە كىتابى شىققان جوق. اقاڭدار باستاعان الاش اياۋلىلارى تەك 1988 جىلى 28 جەلتوقساندا اقتالدى. سوندا 60 جىل بويى ۇنسىزدىك بولدى. 60 جىل بويى بۇل كىسىلەردىڭ اتى اتالمادى, – دەدى عالىم.
جيىن بارىسىندا ش.شاياحمەتوۆ اتىنداعى ء«تىل-قازىنا» ۇلتتىق عىلىمي-پراكتيكالىق ورتالىعىنىڭ وكىلى گۇلنار توكەنقىزى احمەت قالىپتاستىرىپ كەتكەن ءتول تەرميندەر توڭىرەگىندە وي قوزعادى.
– «سويلەم», «وداعاي», «شىلاۋ» دەگەن تەرميندەردىڭ ءبارىنىڭ نەگىزىن قالاپ كەتكەن احمەت بايتۇرسىن ۇلى. بۇل تەرميندەر حالىقتىڭ ءوز تىلىنەن ءسۇزىلىپ, حالىق تانىمىنا سايكەس الىنعاننان كەيىن تەز ءسىڭىسىپ, تەز جاتتالىپ قالدى. مىسالى, شىلاۋ دەسەك, ول ءسوز بەن ءسوزدى بايلاۋ دەگەن ماعىنانى بىلدىرەدى. ۇستەۋ دەسەك, ول ماعىنا ۇستەيدى دەگەن سياقتى. دەگەنمەن احمەت بايتۇرسىن ۇلىنىڭ تىلدىك مۇراسىندا ءالى دە بولسا تىلدىك, عىلىمي اينالىمعا ەنگىزۋدى كەرەك ەتەتىن تەرميندەر تولىپ جاتىر. مىسالعا, قازىر ءبىز كومپيۋتەرگە تەرىپ وتىرىپ «پروبەل» دەگەن ءسوزدى بوس ورىن دەپ اۋدارىپ, ءسوز تابا الماي ءجۇرمىز. ال مۇنى اقاڭ «سىنا» دەپ اتاعان ەكەن. نەگە وسى ءسوزدى قولدانباسقا؟! – دەدى ءتىلشى-عالىم.
تاياۋدا ء«تىل-قازىنا» ۇلتتىق ورتالىعى احمەت بايتۇرسىن ۇلىنىڭ «ادەبيەت تانىتقىشى» مەن ء«تىل-قۇرالىن» تۇڭعىش رەت ءۇش تىلگە اۋداردى. جيناقتىڭ تۇساۋكەسەرى ءالى بولماعان. بىراق گۇلنار توكەنقىزى سوعان قاراماستان, وسى ەڭبەكتىڭ ەڭ العاشقى داناسى – قازاق, تۇرىك, اعىلشىن, ورىس تىلدەرىندەگى نۇسقاسىن ۇلت ۇستازىنىڭ تۋعان جەرى تورعايعا تويعا تارتۋ رەتىندە الىپ كەلگەنىن ايتىپ, ءتورت كىتاپتى مۋزەيلەر كەشەنىنىڭ ديرەكتورى گۇلبانۋ سارسەكەيگە تابىس ەتتى.
جالپى, كونفەرەنتسيادا ۇلت ۇستازى حاقىندا ۇلاعاتتى ويلار اقتارىلىپ, احمەتتانۋعا قاتىستى تىڭ دەرەكتەر ايتىلدى. جيىنعا قاتىسقان كوپشىلىك قازاقتىڭ ءتول تاريحىنان ويىپ ورىن العان نەبىر اياۋلى, نەبىر اسىل, نەبىر تەكتى ۇلى تۇلعالارى كوپ بولعانىمەن, احمەتى بىرەۋ-اق ەكەنىن تۇيسىنگەندەي بولدى.
عىلىمي-تانىمدىق جيىننىڭ سوڭى سالتاناتتى راسىمگە ۇلاسىپ, احمەتتانۋ سالاسىنا سۇبەلى ۇلەس قوسقان عالىمدار, زيالى قاۋىم وكىلدەرى, بيىل اقاڭنىڭ تويى دەپ شاپقىلاپ جۇرگەن ءبىرتالاي كاسىپكەرلەر احمەت بايتۇرسىن ۇلى مەدالىمەن, ء«تىل جاناشىرى» سىيلىعىمەن جانە «جانگەلدى اۋدانىنىڭ قۇرمەتتى ازاماتى» اتاعىمەن ماراپاتتالدى.
وسى كۇنى احمەت بايتۇرسىن ۇلى مەن مىرجاقىپ دۋلات ۇلىنىڭ ادەبي مۋزەي ءۇيى كوپشىلىككە تانىستىرىلدى. سەنات توراعاسى وبلىستا بولعان ءورتتىڭ سالدارىن جويۋعا قاتىسقان ەرىكتىلەرمەن ارنايى كەزدەسۋگە دە ۋاقىت تاپتى.
ءسوز ورايى كەلگەندە, تورعايدا اشىلعان اقاڭ مەن جاقاڭنىڭ ەڭسەلى ەسكەرتكىشىنىڭ ەل كوڭىلىنەن شىققانىن دا ايتا كەتكەن ابزال. ەسكەرتكىشتى بەلگىلى مۇسىنشىلەر جەڭىس جۇبانقوسوۆ پەن تيمۋر ەرماحامبەتوۆ جاساپتى.
– ەل مۇددەسى جولىندا باۋىرلاسىپ, ءبىر-ءبىرىن تۋعاننان ارتىق قادىر تۇتىپ وتكەن احمەت پەن مىرجاقىپ ەسكەرتكىشىن قالاي جاساپ شىعارامىز دەپ كوپ ويلاندىق. اقىرى قوس الىپتىڭ ەلدىڭ بولاشاق قامىن ويلاپ, كەڭەس قۇرىپ تۇرعان ءساتىن بەينەلەپ جاساپ شىعاردىق. ەڭ ءبىرىنشى الماتى قالاسىندا جاساپ شىعاردىق. ودان كەيىن اقتوبەگە اكەپ, جەتەر جەرىنە جەتكىزدىك. ودان كولىككە تيەپ, وعان ءوزىمىز ەرىپ وتىرىپ, ىرعىز ارقىلى تورعايعا جەتكىزدىك. جول قيىنداۋ بولدى. ەندى, مىنە, اشىلۋى بولدى, قۋانىشتىمىن. بۇل جەردە اقاڭ مەن جاقاڭنىڭ ەسكەرتكىشى بۇرىن دا بولعان. سونىڭ تۇعىرىن وزگەرتپەيىك دەپ شەشتىك. بۇل كىسىلەر ەندى قازاقتىڭ ەستەت ادامدارى عوي. سوندىقتان تۇرىستارىنىڭ وزىمەن ولاردىڭ ىشكى دۇنيەسىن اشۋعا تىرىستىق. ءۇش ايدىڭ ىشىندە جاساپ شىقتىق. جالپى, بيىكتىگى تۇعىرىمەن قوسىپ ەسەپتەگەندە 5 مەتردەي بولادى. ال ەسكەرتكىشتىڭ ەڭسەسى – 2,70 مەتر. قولادان قۇيىلدى, استى – گرانيت. ودان كەيىن استىڭعى تۇعىرعا قاشالعان جازۋدى وزگەرتىپ, «بايتۇرسىنوۆتى» «بايتۇرسىن ۇلى», «دۋلاتوۆتى» «دۋلات ۇلى» دەپ تۇزەدىك. ءوزىمىز دە ءاۋ باستا وسىلاي بولادى دەپ ويلاعان ويىما جەتكىزىپ, سوعان كەلتىرگەن سياقتىمىز, – دەدى جەڭىس جۇبانقوسوۆ.
توي تۇستەن كەيىن احمەت بايتۇرسىن ۇلىنىڭ كىندىك قانى تامعان سارىتۇبەك قونىسى مەن اقكول اۋىلىندا جالعاسىپ, مۇنداعى ءىس-شارالار ارۋاقتارعا دۇعا باعىشتاپ, ءتاۋ ەتۋدەن باستالدى. اقاڭنىڭ اتا قونىسى – سارىتۇبەكتەگى قورىمدا ۇلت ۇستازىنىڭ اكەسى بايتۇرسىن مەن اعاسى قالي جەرلەنگەن. ولاردىڭ جانىنا بيىل حالىق بولىپ قارجى جيىپ, اقاڭا اق كەسەنە تۇرعىزىلعان.
كەشكىلىك تورعايداعى «جاس تۇلپار» ستاديونىندا اقاڭ اندەرى مەن حالىق اندەرىن ورىنداۋشىلار اراسىندا بايقاۋ ءوتىپ, احمەت بايتۇرسىن ۇلىنىڭ ءوز اندەرى, زەرتتەگەن اندەرى, زاتاەۆيچتىڭ ءان قورجىنىنا قوسقان اندەرى شىرقالدى. بايقاۋدىڭ سوڭى مەرەكەلىك كونتسەرتكە ۇلاسىپ, قوستاناي وبلىسىنىڭ بەلدى ونەرپازدارى اقاڭا ارناعان اندەرىن ورىندادى, سونداي-اق ارنايى شاقىرىلعان ەلىمىزگە بەلگىلى ونەر جۇلدىزدارى ونەر كورسەتتى. ماسەلەن, بەلگىلى كۇيشى انار مۇزداحانوۆا احمەتكە ارناعان ءوزىنىڭ جەكە كۇيىن ورىندادى.
مەرەكەلىك ءىس-شارالار بارىسىندا ات بايگەسى مەن پالۋاندار بەلدەسۋى ءوتتى. اقاڭنىڭ 150 جىلدىعىنا ارنالعان قازاق كۇرەسىنەن وتكەن رەسپۋبليكالىق اشىق تۋرنيردە اقتوبەنىڭ اتىنان شىققان 2017 جىلعى «قازاقستان بارىسىنىڭ» جەڭىمپازى ەلامان ەرعاليەۆ تۇيە پالۋان اتانىپ, قوستانايدا قۇراستىرىلعان سۋ جاڭا جەڭىل كولىكتى يەلەندى.
ۇلتتىق ات سپورتىنان وتكەن رەسپۋبليكالىق ءتۋرنيردىڭ قۇنان بايگەسىندە دە, الامان بايگەسىندە دە الماتىنىڭ دۇلدۇلدەرى الدىنا قارا سالدىرماي, قوس بايگەگە دە قاتىسقان شىناشاقتاي عانا شاباندوز مەيىرحان بۇلبۇلوۆ قوس تەمىر تۇلپاردى ءمىندى.
قوستاناي وبلىسى
