ەفرات ءشارىپوۆتىڭ ستسەناريى بويىنشا Aray Media Group ستۋدياسى تۇسىرگەن ءفيلمنىڭ پروديۋسەرى – ايگۇل بايبەك, ال مۋزىكالىق درامانىڭ رەجيسسەرى – ايدىن ساحامان. كينوجوبا مادەنيەت جانە سپورت مينيسترلىگى مەن ۇلتتىق كينەماتوگرافيانى قولداۋ مەملەكەتتىك ورتالىعىنىڭ قولداۋىمەن تۇسىرىلگەن.
ءفيلمنىڭ باس پروديۋسەرى ايگۇل بايبەكتىڭ ايتۋىنشا, «دوس-مۇقاسان» ۆوكالدى-اسپاپتىق ءانسامبلى – ءبىزدىڭ ماقتانىشىمىز. «ولار جايلى فيلم ءتۇسىرۋ – ءبىز ءۇشىن ۇلكەن مارتەبە. بۇل مەنىڭ باس پروديۋسەر رەتىندەگى العاشقى تولىقمەترلى كوركەم ءفيلمىم. كاسىبي مۋزىكانت رەتىندە مەن ءۇشىن اتى اڭىزعا اينالعان ءانسامبلدىڭ نەگىزىن قالاۋشىلارمەن بىرگە قۇرىلۋ تاريحىن زەرتتەپ, جەكە ارالاسۋ, ونەردىڭ ەڭ نازىك باعىتى – مۋزىكا جايلى فيلم ءتۇسىرۋ قىزىق بولدى. ءبىز فيلم سيۋجەتىنە وزەك بولعان «دوس-مۇقاساننىڭ» شىنايى تاريحىن جەتكىزۋگە, سول كەزدەگى مۋزىكالىق رۋحتىڭ ەرەكشە اتموسفەراسىن جاساۋعا تىرىستىق», دەيدى ول.
فيلم رەجيسسەرى ايدىن ساحامان فيلمگە تارتىلعان اكتەرلەردىڭ كاسىبيلىگى, مۋزىكالىق العىرلىعى, حاريزماسىنىڭ ماڭىزى تۋرالى ايتتى. «جاس ارتىستەرىمىزدىڭ شەبەرلىگى بارلىق جاس ساناتى ءۇشىن قىزىقتى كارتينا جاساۋعا جول اشتى. اعا بۋىن جاستىق اتموسفەراسىن سەزىنۋدى, ال جاس ۇرپاق ءۇشىن ۆوكالدى-اسپاپتىق ءانسامبلدىڭ تاريحىمەن تانىسۋعا مۇمكىندىك الدى», دەدى ا.ساحامان.
بايوپيكتى سەنىمدى تۇردە بەيىمدەۋ جانە وعان قازاق روكىنىڭ نەگىزىن قالاۋشىلاردىڭ قايتالانباس تارتىمدىلىعىن بەرۋ ءۇشىن باس كەڭەسشى رەتىندە ۆوكالدى-اسپاپتىق ءانسامبلدىڭ نەگىزىن سالۋشىلار مۇرات قۇسايىنوۆ پەن دوسىم سۇلەەۆ شاقىرىلعان.
ءفيلمنىڭ اكتەرلىك قۇرامى پورترەتتىك ۇقساستىق بويىنشا تاڭدالعان. باستى رولدەردى اكتەر مەيىرعات امانگەلدين, ماقسات ءسابيتوۆ, ەلدوس شايكەنوۆ, سايات ماقۇلباەۆ, ايعانىم ساعىنباەۆا, نيكيتا پوگوداەۆ, نۇرعيسا قۋانىشباي ۇلى جانە ءابىلمانسۇر سەرىكوۆ وينادى. تانىمال بلوگەرلەر مەن ۆاينەرلەر ارتۋر اسقار ۇلى مەن زۋحرا سايپي دە فيلمدە دەبيۋت جاسادى.
«اۆتورلار, ەڭ باستىسى, ءبىزدىڭ مۋزىكاعا دەگەن سۇيىسپەنشىلىگىمىزدى, كوڭىل كۇيىمىزدى, سول كەزدەگى اتموسفەرانى جەتكىزە الدى. ۇزاق جىلدار بويى كادر سىرتىندا, ساحنا ارتىندا قالعانى – جولىمىزداعى قيىندىقتار مەن ينتريگالار, كەڭەستىك يدەولوگياعا قايشى كەلەتىن ءوز ءستيلىمىزدى ساقتاۋداعى قيىندىقتار, ۇجىم ىشىندەگى قارىم-قاتىناستار مەن رەنىشتەر تولىعىمەن دەرلىك بۇرمالانباي كورسەتىلدى», دەيدى ءانسامبلدىڭ نەگىزىن قالاۋشى دوسىم سۇلەەۆ.
