پرەزيدەنت قاسىم-جومارت توقاەۆتىڭ «ادىلەتتى مەملەكەت. ءبىرتۇتاس ۇلت. بەرەكەلى قوعام» اتتى جولداۋىندا ايتىلعان جاستارعا جاعداي جاساۋ, ولاردىڭ ساپالى ءبىلىم الىپ, تۇراقتى جۇمىسپەن قامتىلۋى, تومەن پايىزبەن نەسيە الۋى سياقتى مىندەت-ۇسىنىستار الداعى ۋاقىتتا جۇزەگە اساتىن بولسا, قوعامنىڭ جاستار بولىگى بىرقاتار جەڭىلدىككە يە بولار ەدى. ماسەلەگە وسى تۇرعىدان كەلەتىن بولساق, ەلىمىزدە ەندى جولعا قويىلىپ كەلە جاتقان مەملەكەت پەن كاسىپكەرلىك سەرىكتەستىگىن ءارى قاراي جالعاستىرىپ, قۇرىلىس كومپانيالارى ءۇشىن ءتيىمدى ۇسىنىستاردى, سالىقتىق جەڭىلدىكتەردى قاراستىرۋ مۇمكىندىكتەرىن كوبەيتكەن ابزال.
مەملەكەت باسشىسى جولداۋدا جاتاقحانا ماسەلەسى مەملەكەت موينىنداعى جاۋاپكەرشىلىك رەتىندە قالا بەرەتىنىن ايتتى. وسى ورايدا جەكەمەنشىك جوعارى وقۋ ورىندارىنداعى جاتاقحانا ماسەلەسىنە مەملەكەت تاراپىنان قولداۋ جاسالاتىنى دا ورىندى. بۇگىندە ەل جاستارىنىڭ الدىندا ۇلكەن مىندەتتەر تۇر. ولار ءوز ءبىلىمىن ءارى قاراي ەل كەلەشەگىنىڭ دامۋىنا ارناپ, ەكونوميكانىڭ قاي سالاسىندا بولسىن ەڭبەك ەتۋدى قالايدى. پرەزيدەنتتىڭ بالالارعا 18 جاسقا تولعانعا دەيىن ارنايى شوت اشىپ, ونىڭ الداعى ۋاقىتتا ساپالى ءبىلىم الۋىنا مۇمكىندىك جاساۋ تۋرالى ۇسىنىسى – بولاشاققا جاسالعان كاپيتال, كوپتەگەن قولداۋعا مۇقتاج وتباسىلار ءۇشىن ۇلكەن جەڭىلدىك.
پرەزيدەنت جولداۋىندا بەس باعىت بويىنشا كوتەرگەن ماسەلەنىڭ بارلىعى دا جۇرتشىلىقتىڭ كوكەيىندە شەشىمىن تاپپاي جۇرگەن كوپتەگەن تۇيتكىلدى جايتتى ىسكە اسىرۋعا مۇمكىندىك بەرەدى.
رۋسلان احماعانبەتوۆ,
ساياساتتانۋشى, PhD
الماتى
